އިމްރާން މަޖިލީހަށް ވާދަ ކުރައްވަން ނިންމަވައިފި

މަރިޔަމް އަނާ

28 ޖެނުއަރީ 2024 - 11:11

0 comments

ރައްޔިތުންގެ މަޖިލީހުގެ އިންތިހާބުގައި ފުރަތަމަ ފަހަރަށް ވާދަކުރެއްވުމަށް އަދާލަތު ޕާޓީގެ ރައީސް ޝެއިހް އިމްރާން އަބްދުالله ނިންމަވައިފި އެވެ.

އަދާލަތު ޕާޓީން ދެންމެ ބުނީ 20 ވަނަ މަޖިލީހުގެ އިންތިހާބު ގައި އަދާލަތު ޕާޓީގެ ޓިކެޓް ގައި ވާދަކުރަން ހުޅުވާލުމުން ކުރިމަތިލީ މެންބަރުންގެ ތެރެއިން އެ ޕާޓީގެ ޓިކެޓް ދިނުމަށް ފެންނަ މެންބަރުން އަދާލަތުގެ މަޝްވަރާ މަޖިލީހުގެ ބައްދަލްވުމުގައި ފާސްކޮށްފައިވާ ކަމަށެވެ.

އަދާލަތުން ހުޅުވާލީ އެންމެ ހަތަރު ދާއިރާ އަށެވެ. އެއީ ވައިކަރަދޫ ދާއިރާ އާއި މަކުނުދޫ ދާއިރާ އާއި ފުނަދޫ ދާއިރާގެ އިތުރުން އިނގުރައިދޫ ދާއިރާ އަށެވެ. މި ދާއިރާތަކަށް ކުރިމަތިލީ ކިހާ މީހުނެއް ކަމެއް ވެސް ނުބުނެ އެވެ.

ޕާޓީގެ ބަޔާނުގައި އޮތީ ކުރިމަތިލީ މެންބަރުންގެ ތެރެއިން އެ ޕާޓީގެ ޓިކެޓް ދިނުމަށް ފެންނަ މެންބަރުން އަދާލަތުގެ މަޝްވަރާ މަޖިލީހުގެ ބައްދަލްވުމުގައި ފާސްކޮށްފައިވާ ކަމަށެވެ. އެއީ؛

އިމްރާން އަބްދުﷲ | މަކުނުދޫ ދާއިރާ
ހުސައިން ސަގީފް | ވައިކަރަދު ދާއިރާ
އިސްމާއީލް ހަމީދު | ފުނަދޫ ދާއިރާ
އިސްމާއީލް އަލީ | އިނގުރައިދޫ ދާއިރާ

ޢަދާލަތު ޕާޓީގެ އިތުރުން އެހެން ސިޔާސީ ޕާޓީތަކުންވެސް އަންނަނީ ކުރިއަށް އޮތް މަޖިލިސް އިންތިހާބަށް ވާދަކުރާނެ ކެންޑިޑޭޓުން ކަނޑައަޅަމުންނެވެ. އެގޮތުން ޕީޕީއެމް/ޕީއެންސީން ވަނީ ޕްރައިމަރީ ބާއްވާ ކެންޑިޑޭޓުން ކަނޑައަޅާފައެވެ. އަދި އެމްޑީޕީއާއި ދަ ޑިމޮކްރެޓްސްއިން އަންނަނީ އަންނަ މަހު 3 ގައި ޕްރައިމަރީ ބޭއްވުމަށް މަސައްކަތްކުރަމުންނެވެ.