ޕްރައިމަރީން 3 ވޯޓް ލިބުނު މީހަކާއިއެކު އެޑިޔުކޭޝަން މިނިސްޓަރު މި ކުޅުއްވަނީ ކޮން ޑްރާމާއެއް؟

އިސްމާއިލް ރިޒާ

10 ފެބުރުއަރީ 2024 - 17:24

4 comments

ގައްދޫ ދާއިރާއަށް ހޮވުނު އަމިއްލަ ކެންޑިޑޭޓަކަށް ތާއީދު ހޯއްދެވުމަށް ބައެއް މިނިސްޓަރުން އެ ދާއިރާގައި

ރައީސް ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގަތުމަށްފަހު ކެބިނެޓް އެކުލަވާލުމާއިއެކު، އެތައްބައެއްގެ ސުވާލުތައް އެއްމެ ފުރަތަމަވެސް ގޮސް ހުއްޓުނީ މިނިސްޓަރ އޮފް އެޑިޔުކޭޝަން މަގާމަށް ޑރ.އިސްމާއިލް ޝަފީއު އައްޔަނުކުރުމާއި އެކު އެވެ.

އެއީ، އެއްވެސް އިރަކު ސިޔާސީ މައިދާނުގައި، އުޅުއްވި ފަރާތަކަށްނުވެފައި، ސަރުކާރުގެ ނުވަތަ ޕްރައިވެޓް ސެކްޓަރ ތެރެއިން ވެސް، އިސްމަގާމެއް އަދާކުރައްވާފައި ނުވުމާއިއެކު އެވެ. އަދި އެޑިޔުކޭޝަން މިނިސްޓްރީ ފަދަ، މެންޑޭޓް ބޮޑު ވުޒާރާއެއް ހިންގޭނެފަދަ ގާބިލްކަމެއް ހުރިކަމަށް ގިނަބަޔަކު ސުވާލު އުފައްދާތީ އެވެ.

ރިޔާސީ އިންތިޚާބުގެ ކެމްޕޭނުގެ ތެރޭގައިވެސް، ރައީސް ޑރ.މުހައްމަދު މުއިއްޒު ތައުލީމީ ދާއިރާއާއި ގުޅުވައިގެން ދެއްކެވި ވާހަކަފުޅުތަކަކީ އެއްމެ ގިނަ ފާޑުކިއުންތައް އަމާޒުވި އެއް ދާއިރާއެވެ. އޭރުވެސް އެވާހަކަފުޅުތައް ދެއްކެވީ، މިހާރުގެ އެޑިއުކޭޝަން މިނިސްޓަރު އިސްމާއިލް ޝަފީއުގެ ލަފާފުޅާއެކުކަމަށް، މަޝްރަހު ދިރާސާކުރާ ފަރާތްތަކުން ދެކިލައްވަ އެވެ. މީގެ ތެރޭގައި، ދިރާސީ އަހަރު ފެށުން ބަދަލުކުރަން ރައީސް ދެއްކެވި ވާހަކަފުޅު ފާހަގަކޮށްލެވެ އެވެ. އަދި ސީއެޗްއެސްސީ އެއީ ހަމައެކަނި މާލޭގައި ހުންނަންޖެހޭ ތަނެއްކަމަށް ވިދާޅުވެ ހުޅުމާލެ ސީއެޗްއެސްސީ އަށް ކިޔަވަންދާ ދަރިވަރުންނަށް މިނިސްޓަރު "ފުރައްސާރަ" ކުރެއްވުން ހިމެނެ އެވެ.

ވެރިކަމާއި ހަވާލުވެވަޑައިގެންފަހުންވެސް، ތަޢުލީމީ ދާއިރާގެ މައްސަލައެއް ނުވަތަ، ހިތްހަމަނުޖެހުމެއް ފާޅުނުކުރާ ދުވަހެއް މަދުވާނެއެވެ. މަދަރުސާތަކުގައި ޓީޗަރުން ހަމަނުވުމާއި، ދިރާސީ އަހަރު ފެށުން ބަދަލުކުރުމާއި، ޓީޗަރުންނާއި ދަރިވަރުން ހަފްތާ ބަންދުގައި ނެރުން ފަދަ، އަރަބިއްޔާ ސްކޫލްގެ އައު ޢިމާރާތް އެޅުން ފަދަ އެތަކެއް ކަމެކެވެ. އެއްމެފަހުން ނޫސްތަކުގެ ފަލަސުރުޚީ އިން ޖާގަ ހޯދީ، ލަންކާގައި ތައުލީމް ހާސިލްކުރާ ފަރާތްތަކަށް، ސޯސަންވިލާ މެދުވެރިކޮށް ދިވެހި އަދި އިސްލާމް ކިޔަވައިދިނުން ހުއްޓާލިކަމަށް ބުނެ މިނިސްޓަރު ދެއްކެވި ވާހަކަފުޅެވެ.

މިނިސްޓަރުގެ އަމަލުފުޅުތަކާއި، ބަސްމަގު ހުންނަގޮތުން، ބައެއްފަހަރު ރައީސް ޑރ.މުއިއްޒަށް ވަފާތެރި ވަޒީރެއްތޯ ވެސް ސުވާލުއުފެދެ އެވެ.

އިތުރަށް ކިޔާލަން: ސަރުކާރާއި ދެކޮޅަށް 2 ވަޒީރަކު އަމިއްލަ ގޮތުން ގައްދޫ ދާއިރާއަށް ކެނޑިޑޭޓަކު ނެރެނީ!

ޕީޕީއެމް ޕީއެންސީގެ ފަރާތުން ރައްޔިތުންގެ މަޖިލީހަށް މެމްބަރަކު ނެރުމަށް ބޭއްވި މަޖިލިސް ޕްރައިމަރީއަށް ބަލާލަމާ ހިންގަވާށެވެ. މި ޕްރައިމަރީގައި ވާދަކުރުމަށް މިނިސްޓަރުގެ ފަރާތުން ހުށަހެޅުއްވި ކެނޑިޑޭޓް އަކީ، ނިމިގެންދިޔަ އެމްޑީޕީގެ ސަރުކާރުގެ ފަރާތުން ޔޫތު މިނިސްޓްރީ މެދުވެރިކޮށް އެއްމެ ގިނަ ޕްރޮޖެކްޓްތައް އެވޯޑް ކުރެވުނު އެއްފަރާތެވެ. އަހުމަދު ޝަފްއާން އަބްދުﷲ އާއި އެކު، މިނިސްޓަރު ޕީއެންސީގެ އޮފީހަށް ވަޑައިގެން، ފޯމް ހުށަހެޅުއްވި މަންޒަރުގެ ފޮޓޯ އެހެރީ ފެންނާށެވެ. އަހުމަދު ޝަފްއާން އަބްދުﷲ އަކީ، 2013 އިން 2018 އަށް ޕީޕީއެމް ވެރިކަންކުރި ދުވަސްވަރު، ޚިޔާނާތުގެ މައްސަލައެއްގައި، ވަޒީފާއިން ވަކިކޮށްފައިވާ ފަރާތެކެވެ.

ޖިނާއީ ތަހްގީގު ހިންގައި ދައުވާ ކުރަން ފޮނުވި މައްސަލަތައް އަދިވެސް އެހެރީ ކޯޓް ތަކުގައި އެވެ. އެހެންނަމަވެސް، މިއިން އެއްވެސް ކަމަކަށް ނުބައްލަވައި، އަހުމަދު ޝަފްއާން އަބްދުﷲ އަކީ މިނިސްޓަރު ތާއީދުކުރައްވާ ކެންޑިޑޭޓްކަމަށް ހައްދަފައި، ފޯމް ހުށަހެޅުއްވީ ވެސް މިނިސްޓަރުގެ އަރިހުގައި ހުރެގެންނެވެ. ޕްރައިމަރީގައި ގައްދޫ ދާއިރާއަށް ޖުމްލަ 1325 ވޯޓް އެޅިއިރު، އެޑިޔުކޭޝަން މިނިސްޓަރު ތާއީދުކުރެއްވި ކެންޑިޑޭޓް އަށް ލިބިލެއްވީ އެއްމެ 03 ވޯޓް އެވެ.

ނަތީޖާ އިއުލާނުކުރުމާއެކު، މިނިސްޓަރު ތާއީދުކުރައްވާ ކެންޑިޑޭޓް އަށް ލިބުނު ނަތީޖާ ގަބޫލުފުޅު ނުކުރައްވާ، މިނިސްޓަރަށް ބޮޑުބޭބެ ވިދާޅުވާ ސްޕޯޓްސް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި، މުހައްމަދު އަލީ، އަމިއްލަގޮތުން އެދާއިރާއަށް ވާދަކުރައްވާނެކަން އިއުލާނުކުރެއްވި އެވެ. އެވެސް "ސަރުކާރުގެ ތާއީދާއިއެކު" ކަމަށް ބުނެ އެވެ.

މިވާހަކަތައް އެއްމެ ފުރަތަމަ ދެކެވެންފެށުމާއިއެކު، މިނިސްޓަރު މިވާހަކަތައް ދޮގުކުރި އެވެ. އެހެންނަމަވެސް، އެއްމެފަހުން މިމަހުގެ 9 ވީ ހުކުރުދުވަހު ފެނިގެންދިޔައީ، އިސްލާމިކް މިނިސްޓަރާއެކު، އެޑިއުކޭޝަން މިނިސްޓަރަށް ބޮޑުބޭބެ ވިދާޅުވާ މިނިވަން ކެނޑިޑޭޓްއަށް ތާޢީދު ހޯއްދެވުމަށް އަމިއްލަ ރަށް ކަމަށްވާ ގައްދޫއަށް ވަޑައިގެންނެވި މަންޒަރެވެ. އެވެސް ލަދުވެތި މަންޒަރެކެވެ. ސޯޝަލް މީޑިއާގައި ވީޑިއޯ އާންމުކުރި މީހުން ވަނީ ސަރުކާރު ކެންޑިޑޭޓާ ދެކޮޅަށް މިނިސްޓަރުން މަސައްކަތް ކުރައްވާތީ ނުރުހުން ފާޅުކޮށްފަ އެވެ. މި ވީޑިއޯއާއި ގުޅިގެން ހުރި ސުވާލުތަކާ ގުޅޭ ގޮތުން ޕީޕީއެމް/ޕީއެންސީން ރަސްމީކޮށް ވާހަކައެއް ނުދައްކަ އެވެ. ސުވާލު ކުރުމުން ވެސް ވަކި ޖަވާބެއް ނުދެއްވަ އެވެ.

މިނިސްޓަރުގެ ވަފްދުގެ އިސްތިގުބާލު އަދާކުރުމަށް ބަނދަރު ސަރަޙައްދަށް އެއްވެތިބީ އަމިއްލަ ރަށުން 10 ވަރަކަށް މީހުންނެވެ. އޭގެތެރޭގައި ބިދޭސީ ޓީޗަރުންނާއި، ރައީސް ޔާމީނަށް ތާއީދުކުރައްވާ ފަރާތްތައް ހިމެނެ އެވެ. ގދ.ވާދޫއަށް ވަޑައިގެންނެވުމުން މަރުހަބާ ދެންނެވީ 06 މީހުންނެވެ. އެންމެންވެސް މިނިސްޓަރާއި ކުރިމަތި ކުރީ އެންމެ ސުވާލެކެވެ. ޕީއެންސީގެ ޕްރައިމަރީ ކާމިޔާބުކުރި ކެންޑިޑޭޓް ހުއްޓާ، އަމިއްލަފުޅަށް ކެންޑިޑޭޓް އަކު ނެރެ، ތިޔަ ޖައްސަވަނީ ކޮން ސަކަރާތެއްތޯއެވެ؟

ކޮންމެއަކަސް މިނިސްޓަރުގެ އަމަލުފުޅުތައް މިހާރު ހުރި ގޮތުން، އެއީ ރައީސް ޑރ.މުއިއްޒަށް ވަފާތެރި ބޭފުޅެއްތޯ ސުވާލު އުފެދެ އެވެ. އެ ސުވާލު އެންމެ ބޮޑަށް އުފައްދަނީ ގައްދޫ ދާއިރާގެ ރައްޔިތުން ނެވެ.