މަޖިލިސް އިންތިހާބުގައި ވާދަކުރަން ޖޭޕީގެ 10 ބޭފުޅުން ފޯމު ހުށަހަޅުއްވައިފި

އިސްމާއިލް ރިޒާ

14 ފެބުރުއަރީ 2024 - 16:27

0 comments

ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިޚާބުގައި ޖުމްހޫރީ ޕާޓީ (ޖޭޕީ)ން ޖުމުލަ 93 ދާއިރާގެ ތެރެއިން 10 ދާއިރާއަކަށް ވާދަކުރަން ފޯމު ހުށަހަޅައިފިއެވެ.

20 ވަނަ ރައްޔިތުންގެ މަޖިލީހުގައި 93 ދާއިރާއަކަށް ކެންޑިޑޭޓުން އިންތިހާބު ކުރާނެއެވެ. އޭގެތެރެއިން 10 ދާއިރާއަކަށް ޖޭޕީން ކެންޑިޑޭޓުން ވާދަކުރުމަށް ވަނީ ފޯމު ހުށަހަޅާފައެވެ.

ޖޭޕީގެ ޓިކެޓުގައި ވާދަކުރަނީ މާމިނގިލީ ދާއިރާއަށް އެ ޕާޓީގެ ލީޑަރު ޤާސިމް އިބްރާޙިމް، ހުޅުމާލެ ދެކުނު ދާއިރާއަށް ކުރީގެ ޓްރާންސްޕޯޓް މިނިސްޓަރު އައިޝަތު ނަހުލާ، ކެންދޫ ދާއިރާއަށް އެ ދާއިރާގެ މިހާރުގެ މެންބަރު އަލީ ހުސައިން، ހެންޥޭރު ހުޅަނގު ދާއިރާއަށް ޖޭޕީގެ ޑެޕިއުޓީ ލީޑަރު ޑރ. އަމީން އިބްރާހިމް، އުންގޫފާރު ދާއިރާއަށް ކުރީގެ ހެލްތު މިނިސްޓަރު އަބްދުﷲ އަމީން، ދުވާފަރު ދާއިރާއަށް ކުރީގެ ހޯމް މިނިސްޓަރު އަޒްލީން އަހުމަދު، ތިނަދޫ އުތުރު ދާއިރާއަށް ކުރީގެ މެންބަރު އަހުމަދު އަބްދުﷲ، ނޮޅިވަރަމް ދާއިރާއަށް ކުރީގެ މެންބަރު ހުސައިން ޝަހުދީ، ދާންދޫ ދާއިރާއަށް ނިޝާމާ މުހައްމަދު އަދި އޭދަފުށީ ދާއިރާއަށް މުހައްމަދު ނާސިރުއެވެ.

މީގެތެރެއިން މާމިނގިލީ ދާއިރާއަށް ސަރުކާރަށް ނިސްބަތްވާ ޕީއެންސީން ކެންޑިޑޭޓެއް ނުނެރުމަށް ވަނީ ނިންމާފައެވެ.

ޖޭޕީގެ މެންބަރުންގެ ގޮތުގައި ރައްޔިތުންގެ މަޖިލީހުގައި މިހާރު ތިއްބެވީ ގާސިމް އިބްރާހީމާއި އަލީ ހުސައިން އެކަންޏެވެ.

ރައްޔިތުންގެ މަޖިލީހުގެ އިންތިހާބު ބޭއްވުމަށް އިލެކްޝަންސް ކޮމިޝަނުން ނިންމާފައިވަނީ ކުރިއަށް އޮތް މާޗް 17 ވަނަ ދުވަހު އެވެ. ނަމަވެސް އިންތިހާބުތަކާ ބެހޭ އާންމު ގާނޫނަށް އިސްލާހު ހުށަހަޅައި ކުރިއަށް އޮތް ރޯދަ މަސް ނިމޭ ދުވަހުން ފެށިގެން 10 ދުވަސް ފަހުން އިންތިހާބު ބާއްވަން މަޖުބޫރުވާ ގޮތަށް ރައްޔިތުންގެ މަޖިލީހުން އިއްޔެ ވަނީ ގާނޫނު ފަސްކޮށްފަ އެވެ. މިއިސްލާހަށް އަމަލުކުރަންޖެހޭނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިބިލް ތަސްދީގުކުރެއްވުމުންނެވެ.