ހިތާދޫ އާއި ކުޑަރިކިލުގައި ވެސް ފުލުހުންގެ ޕޯސްޓެއް ހުޅުވައިފި

އިސްމާއިލް ރިޒާ

20 ފެބުރުއަރީ 2024 - 17:33

0 comments

ބ. ހިތާދޫ އާއި ބ. ކުޑަރިކިލުގައި ފުލުހުންގެ ޕޯސްޓެއް ހުޅުވައި ފުލުހުން ގާއިމުވެ ތިބެ ހިދުމަތް ދޭން ފަށައިފި އެވެ.

މިއަދު ކުޑަރިކިލުގައި ބޭއްވި ރަސްމިއްޔާތެއްގައި އެރަށު ފުލުހުންގެ ޕޯސްޓް ހުޅުވައި ދެއްވީ ޕޮލިސް ކޮމިޝަނަރު އަލީ ޝުޖާއު އާއި ކުޑަރިކިލު ކައުންސިލުގެ ރައީސް އަހުމަދު އަފްރާހެވެ.

ސީޕީ ވިދާޅުވީ ކުޑަރިކިލުގެ ރައްޔިތުންނާއި ރަށަށް ޒިޔާރަތްކުރާ އެންމެހައި ފަރާތްތަކަށް އަމާންކަމާއި ރައްކާތެރިކަން ކަށަވަރު ކޮށްދިނުމަށްޓަކައި ފުރަތަމަ ފަހަރަށް ފުލުހުންގެ ދިދަ އުފުލައިލެވޭ ދުވަހަކީ ވަރަށް ތާރީހީ ދުވަހެއް ކަމަށެވެ. އަދި އެ ރަށަކީ ނިސްބަތުން އާބާދީ މަދު ރަށެއް ކަމަށާއި ކުށްމަދު އެއްބައިވަންތަ ރައްޔިތަކު ދިރިއުޅޭ ރަށެއް ކަމަށް ވެސް ވިދާޅުވި އެވެ.

ފުލުހުންގެ ޕޯސްޓް ހުޅުވަން ބ. ހިތާދޫ ގައި މިއަދު ހެނދުނު ބޭއްވި ރަސްމިއްޔާތު ޝަރަފުވެރިކޮށް ދެއްވީ ޕޮލިސް ކޮމިޝަނަރު އަލީ ޝުޖާއު އާއި ހިތާދޫ ކައުންސިލު ރައީސް އަބްދުލްއަޒީޒް މުހައްމަދެވެ.

ސީޕީ ވިދާޅުވީ ފުލުހުން ރެ އާއި ދުވާލު އެއްވެސް ވަރުބަލި ކަމެއްނެތި ކުރާ މަސައްކަތުގެ ބޭނުމަކީ ރާއްޖެ އަކީ އެންމެނަށް އަމާން ރައްކާތެރި ތަނަށްކަށް ހެދުން ކަމަށެވެ. އެގޮތުން ރައްޔިތުންގެ މުދަލާއި ގެދޮރު ހިމާޔަތްކޮށް، ރައްޔިތުންގެ ފުރާނަ ސަލާމަތްކުރުމަށް ޖާނާއި މާލުން ފުލުހުން ގުރުބާންވަމުން އަންނަނީ ކޮންމެ ރައްޔިތަކަށް ވެސް ހިތްހަމަ ޖެހިލައިގެން އުޅެވޭނެ ފަހި މާހައުލެއް ތަނަވަސްކޮށް ދިނުމަށް ކަމަށް ވިދާޅުވި އެވެ.

އިއްޔެ ނ. އަތޮޅުގެ ދެ ރަށެއްގެ ޕޮލިސް ޕޯސްޓް ހުޅުވާފައިވެ އެވެ. ފުލުހުން އަންނަނީ ރާއްޖޭގެ ހުރިހާ ރަށަކަށް ހިދުމަތް ފުޅާކުރަން ގިނަ މަސައްކަތްތަކެއް ކުރަމުންނެވެ.