ނަފްސާނީ ބަލިމީހުންނަށް އެހީ ފޯރުކޮށްދިނުމަށް ހެލްޕް ލައިން 1677 އިފްތިތާހުކޮށްފި

ހުމާ ނަސީމް

21 ފެބުރުއަރީ 2024 - 13:04

0 comments

ނަފްސާނީ ފުރަތަމަ އެހީ ފޯރުކޮށްދިނުމަށް ތައާރަފްކުރި ހެލްޕްލައިން، މިނިސްޓަރު ރާފިއު ލޯންޗުކޮށްދެއްވަނީ

ނަފްސާނީ ބަލި ތަޙައްމަލު ކުރަމުންދާ މީހުންނަށް ފުރަތަމަ އެހީ ފޯރުކޮށްދިނުމުގެ ގޮތުން ޤައުމީ ހެލްޕް ލައިން އިފްތިތާހުކޮށްފި އެވެ.

ހެލްތު މިނިސްޓްރީގައި ބޭއްވި ރަސްމިއްޔާތުގައި، 24 ގަޑިއިރު އެހީތެރިކަން ލިބޭ 1677 ހެލްޕްލައިން ތައާރަފްކޮށްދެއްވީ ސްޕޯޓްސް، ފިޓްނެސް އެންޑް ރިކްރިއޭޝަން މިނިސްޓަރު އަބްދުﷲ ރާފިއު އެވެ.

މިނިސްޓްރީން ބުނީ އެ ހެލްޕްލައިންގެ މަގުސަދަކީ ދިރިއުޅުމުގައި ދިމާވާ ގޮންޖެހުންތަކުން އަރައިގަތުމަށް އެހީތެރިވުމާއި ނަފްސާނީ އެކި އުނދަގޫތައް ކުރިމަތިވާ މީހުންނަށް ފޯނު މެދުވެރިކޮށް ނަފްސާނީ ފުރަތަމަ އެހީ ފޯރުކޮށްދީ ނަފްސާނީ ދުޅަހެޔޮކަން ކުރިއެރުވުން ކަމަށެވެ.

މިނަންބަރުން ނަފްސާނީ ސިއްހަތުގެ ފުރަތަމަ އެހީގެ އިތުރުން މައްސަލަ ހައްލުކުރުމަށް އެހީތެރިވުމާއި މަޢުލޫމާތު ފޯރުކޮށްދިނުމާއި ހެދިފައިވާ އުސޫލްގެ ތެރެއިން ގުޅުން ހުރި ހިދުމަތްތަކަށް ރިފަރަލް ހެދިގެންދާނެކަމަށްވެސް ހެލްތް މިނިސްޓްރީން ބުނެ އެވެ.

2022 ވަނަ އަހަރު ރާއްޖޭގައި ކުރިއަށްގެންދިޔަ ސްޓެޕް ސަރވޭއިން ދެއްކި ގޮތުގައި ރާއްޖޭގައި ކޮންމެ 5 މީހަކުން އެކަކު ޑިޕްރެޝަންގެ އަލާމާތް ތަހައްމަލު ކުރަމުންދެ އެވެ. އަދި ކޮންމެ 20 މީހަކުން އެކަކު ފުރާނައަށް ނުރައްކާތެރި ކަންކަން ކުރުމާއި އަމިއްލައަށް މަރުވުންފަދަ ހިޔާލު ގެންގުޅޭ ކަމަށްވެސް ދިރާސާއިން ދައްކަ އެވެ.

ނަފްސާނީ ސިއްހަތުގެ ގައުމީ ހެލްޕްލައިން ފެށުމަކީ ރައީސް ޑރ. މުހައްމަދު މުއިއްޒުގެ ހަފުތާ 14 ގައި ހިމެނޭ ކަމެކެވެ.

ސްކޫލް ދަރިވަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށް ކުރީގެ ސަރުކާރުން ވެސް ހެލްޕްލައިންގެ ހިދުމަތް ފެށި އެވެ. އެކަމަކު، އެ ހެލްޕްލައިންގެ ހިދުމަތް ދެމުން އަންނަނީ ހުކުރު ދުވަސް ފިޔަވައި ކޮންމެ ދުވަހަކު މެންދުރުފަހު 3:00 އިން ރޭގަނޑު 9:00 އަށެވެ.