ރަށު މީދާ މާލޭ މީދަލަކަށް ބަދަލުވުމުގެ ބޮޑު ޚިޔާނާތް..!

ޢަބްދުﷲ ޖުނައިދު

08 މާޗް 2024 - 11:12

1 comments

އަތޮޅުތެރޭގެ ރަށެއް

ދާއިރާއަށް ޚިޔާނާތްތެރިވުމުގެ ސަބަބުން މެމްބަރާއި މެދުގައި ކުރިން ކުރި އިތުބާރު ދާއިރާގެ ރައްޔިތުންގެ ކުރިމަތީގައި ގެއްލިގެން ދިޔުމުގެ ޓްރެންޑަކީ އަޅުގަނޑުމެންގެ ޑިމޮކްރަސީގެ ހިތުގައިވާ އުނދަގޫ ވާހަކައެކެވެ. ވޯޓު ހޯދަންވެގެން ޓީވީ ޑިބޭޓުތަކުގައިވެސް އެ ދާއިރާގެ ހުރިނަމަ ހުރި ހުރިހާ ގޮންޖެހުންތަކާއި، ދުވަހުގެ ދިރިއުޅުމުގެ ކުދިކުދި ކަންތައްތަކުން ފެށިގެން އަލިފުން ޔާ އާއި ހަމަޔަށް ކިޔައިދީފައި، މަގާމަށް ވަޑައިގަތުމުން، މި މަންދޫބުން އެމީހުންގެ ދާއިރާތަކަށް ކުރިމަތިވެފައިވާ ގްރާސްރޫޓް މައްސަލަތަކާ ވަރަށް އަވަހަށް ދުރުވެވަޑައިގަންނަވަ އެވެ.

އެގޮތުން ވެރިރަށް މާލޭގެ ކޮރިޑޯތަކުގައި ހިމާޔަތް ހޯދުމާއި ބާރު ހޯދަނީ، އެމީހުންގެ ދާއިރާގެ ރައްޔިތުން ތާށިވެފައި ތިއްބައެވެ. މަޖިލީހުގައި އެމީހުންގެ އަޑުވެސް ކަނޑާލާފަ އެވެ. ދާއިރާގެ ރައްޔިތުން ތިބި އުނދަގޫ ހާލަތް ހަނދާން ނައްތައިލީ އެވެ. ރައްޔިތުންނާ ގާތުން މަސައްކަތް ކުރުމަށް ވެފައިވާ ވައުދުތައް ފުއްދުމުގެ ބަދަލުގައި ފަހަތަށް ޖެހެނީ "މާލޭ މީހާ" ގެ ލައްޒަތަށްޓަކަ އެވެ. އެތަނުން އެމީހުންނަށް އަލަށް ލިބުނު ބާރާއި ނުފޫޒު ބޭނުންކުރުމަށެވެ.

މި އުނދަގޫ ޓްރެންޑުގެ ސަބަބުން އިންތިޚާބުވެފައިވާ މެމްބަރުންގެ ނަޒާހަތްތެރިކަމާއި ޖަވާބުދާރީވުމާ މެދު އަސާސީ ސުވާލުތަކެއް އުފެދެ އެވެ. ކެންޑިޑޭޓުންގެ ކެމްޕޭން ވައުދުތައް ފުއްދައި، ރައްޔިތުންގެ ބޭނުންތަކަށްވުރެ އަމިއްލަ މަސްލަހަތު އިސްކަންދީފިނަމަ، ޑިމޮކްރެޓިކް ޕްރޮސެސްއަށް ރައްޔިތުންނަށް އިތުބާރު ކުރެވޭނީ ކިހިނެއް ހެއްޔެވެ؟

އިންތިޚާބުވެފައިވާ މަންދޫބުން އެމީހުންގެ ދާއިރާގެ ރައްޔިތުންނާ ގުޅިގެން ހެޔޮ ބަދަލެއް ގެންނަން އުޅުނު ދުވަސްތައް ފާއިތުވެއްޖެ އެވެ. އޭގެ ބަދަލުގައި އެމީހުން ވެގެންދަނީ ވެރިކަމުގެ ހޯލްތަކުގައި އަމިއްލަ އެޖެންޑާއެއް ހިފައިގެން ވަށައިގެން އެނބުރޭ ބައެއްގެ ގޮތުގަ އެވެ. އެމީހުން ޚިދުމަތް ކުރަން އިންތިޚާބުވި ދާއިރާއާއިމެދު ސަމާލުކަމެއް ނެތެވެ. އެހާވެސް ދުރުގައެވެ. "ރަށުމީދާ މާލޭ މީދަލަކަށް" ބަދަލުވުމުގެ މި ހާދިސާ ތަމްސީލު ކުރަނީ މި އިންތިޚާބުވެފައިވާ އޮފިޝަލުންނަށް ކުރާ އިތުބާރަށް ބޮޑު ޚިޔާނާތެކެވެ.

ދާއިރާގެ ރައްޔިތުންނާ ގާތް ގުޅުމެއް އޮތުމުގެ ވައުދުތައް ދޫކޮށްލުމާއި އިހުމާލުގެ ހަގީގަތާ ބައްދަލުވުމުން މިވަގުތަކީ ވޯޓުލާ މީހުން އިންތިހާބު ކުރާ މަންދޫބުންގެ ފަރާތުން ޖަވާބުދާރީވުމަށް ޑިމާންޑް ކުރަންވީ ވަގުތެވެ. ރަށުމީދާ މާލޭ މީދަލަކަށް ބަދަލުވާނެތޯ ދެނެގަންނަންވީ ވަގުތެވެ. ބަލަންވީ ހަމައެކަނި "ސިޔާސީ ހޮޅި" ވައުދުތަކަށް ނޫނެވެ. ގާނޫނު ހެދުމާ އެކަމަށް ބޭނުންވާ ބިލް ޑްރާފްޓް ކުރުމުގެ "ކޮލިޓީ" ޓްރެކް ރެކޯޑް ވެސް ބަލަން އެބަޖެހެއެވެ. މި ޚިޔާނާތް ހުއްޓުވުމަށްޓަކައި ނިޒާމީ އިސްލާހުތައް ގެނައުމަކީ ކޮންމެހެން ކުރަންޖެހޭ ކަމެކެވެ.

ރިކޯލް މެކޭނިޒަމްތަކާ ބެހޭގޮތުން ސުވާލުކޮށް އެކަމަށް ތާއީދުކުރާތޯވެސް ޑިބޭޓުގައި އެހުމަކީ ނޫސްވެރިންގެވެސް ޒިންމާއެކެވެ. ސިޔާސީ މާލިއްޔަތު ހާމަކަން ބޮޑުކުރުމާއި، ޖަވާބުދާރީވުމުގެ ހަރުކަށި ފިޔަވަޅުތައް ފަދަ ފިޔަވަޅުތަކުގެ އެހީގައި އިންތިޚާބުވެފައިވާ އޮފިޝަލުން އަމިއްލަ ފައިދާއަށް ދާއިރާތައް ދޫކޮށްލުން ހުއްޓުވޭނީ މިގޮތަށެވެ. އެހެންނޫނީ ރަަށުމީދާ ދެން ވެސް ގޮނޑި ލިބުނީމާ ވާނީ މާލޭ މީދަލަކަށެވެ.