ބޭސްފަރުވާއަށް ޒަކާތު ފަންޑުން 740،000 ރުފިޔާ ހަރަދުކޮށްފި

މަރިޔަމް އަނާ

19 މާޗް 2024 - 14:18

0 comments

ޒަކާތުގެ ކަންކަން ބެލެހެއްޓުމަށް މި ސަރުކާރުން އުފެއްދި އާ އިދާރާ، މޯލްޑިވްސް ޒަކާތު ހައުސް އިން އެހީގެ ގޮތުގައި މިދިޔަ މަހު 700،000 އަށް ވުރެ ގިނަ ރުފިޔާ ހަރަދުކޮށްފި އެވެ.

އެ އިދާރާއިން މިއަދު އާންމުކުރި ތަފާސްހިސާބުތަކުން ދައްކާގޮތުން މިދިޔަ މަހު ފަގީރުންނާއި މިސްކީނުންގެ ތެރެއިން 69 މީހުންނަށް ބޭސްފަރުވާގެ އެހީގެ ގޮތުގައި ޖުމްލަ 740،805.79 ރުފިޔާ ޚަރަދުކޮށްފައިވެއެވެ.

އޭގެ ތެރޭގައި:

ކެންސަރު ބަލީގެ ފަރުވާއަށް: 245،948.50 ރުފިޔާ
ހިތުގެ އޮޕަރޭޝަންތަކަށް: 16،962 ރުފިޔާ
ޓްރާންސްޕްލާންޓްތަކަށް: 76،329 ރުފިޔާ
ސިކުނޑީގެ އޮޕަރޭޝަންތަކަށް: 16،962 ރުފިޔާ
އެހެނިހެން ޚަރަދުތައް: 473،746 ރުފިޔާ

އެ އިދާރާއިން ފެބްރުއަރީ މަހުގެ ތެރޭގައި އެހެނިހެން ޚަރަދުގެ ގޮތުގައި ދީނީ އެކި ޕްރޮގްރާމްތައް ހިންގުމަށާއި އިދާރީ މުވައްޒަފުންގެ އުޖޫރަ ހަމެޖެއްސުމުގެ އިތުރުން ޖަލްސާ އަދި ސެމިނާ ފަދަ ކަންކަމަށް ވަނީ ޚަރަދުކޮށްފައެވެ.

ތަފާސްހިސާބުތައް ދައްކާ ގޮތުގައި، ހާއްސަ ހާލަތްތައް މެދުވެރިވެގެން އެކި ފަރާތްތަކަށް ޖެނުވަރީ އަދި ފެބްރުއަރީ މަހުގައި 12،750 ރުފިޔާ ވަނީ ދޫކޮށްފަ އެވެ. އަދި 7،200 ރުފިޔާ މިހާރު ވަނީ ދޫކުރަން ހަމަޖެހިފަ އެވެ.

ދީނީ އެކި ޕްރޮގްރާމްތައް ހިންގަން 374،950.28 ރުފިޔާ ޒަކާތު ފަންޑުން ވަނީ މިދިޔަ މަހު ހަރަދުކޮށްފަ އެވެ. އަދި އެ އިދާރާގެ މުވައްޒަފުންގެ މުސާރައަށް 192،432.81 ރުފިޔާ ހަރަދުކޮށްފައިވާއިރު، ޖަލްސާތަކާއި ސެމިނާތައް ބޭއްވުމަށް 93،761.61 ރުފިޔާ ވަނީ ހަރަދުކޮށްފަ އެވެ.