ބޭނުމެއް ނެތި ވަރިއަށް އެދުމަކީ ދީނުގައި ނަހީކުރައްވާފައިވާ ކަމެއް: ހުތުބާ

އިބްރާހިމް އާދަމް

03 މެއި 2024 - 20:19

0 comments

ދެމަފިރިންގެ މެދުގައި ގުޅުން ގޯސްވެ އެއްވެސް ހައްލެއް ނުފެނިއްޖެ ނަމަ، ވަރި ހުއްދަވާނެ ކަމާމެދު ޝައްކެއް ނެތް ކަމަށާއި ނަމަވެސް، އަނބިމީހާ ބޭނުމެއް ނެތި ވަރިއަށް އެދުމަކީ ދީނުގައި ނަހީކުރައްވާފައިވާ ކަމެއް ކަމަށް މިއަދުގެ ހުކުރު ހުތުބާގައި ބުނެފި އެވެ.

ޚުތުބާގައި ބުނެފައިވާ ގޮތުން ބައެއް ފިރިހެނުން ކައިވެނީގެ އަހުދާމެދު ފަރުވާކުޑަކޮށް "ވަރި" މިބަހަކީ އާންމު ބަހަކަށް ވަނީ ހަދާފައެވެ. އެގޮތުން މަޖަލަކަށް ބުނާ ބަސްބަހުންނާއި އޮޅުވާލުމަށް ބުނާ ބަސްތަކުންނާއި އެނޫން ވެސް ގޮތްގޮތަށް ވަރިކުރާ ކަމަށް ވަނީ ބުނެފަ އެވެ.

ނަމަވެސް އިސްލާމް ދީނުގައި ވަރިކުރުމުގެ ބާރު ފިރިމީހާއަށް ދީފައިވަނީ ބޭނުންވާ ކޮންމެ ވަގުތަކު އަނބިމީހާ ވަރިކުރުމަށް ނޫން ކަމަށް މިއަދުގެ ހުތުބާގައި ވަނީ ބުނެފަ އެވެ.

ދެމަފިރިންގެ މެދުގައި ޖެހޭ މައްސަލަތަކުގައި ވަރަށް ތާކުންތާކު ނުޖެހޭ ސަބަބުތަކުގައި ބައެއް ފަހަރަށް އާއިލީ ގުޅުމުގައި ނިމުމުގެ ސިއްކަ ޖެހިފައިވާ ކަމަށާ ދެމަފިރިންގެ މެދުގައި މައްސަލަ ޖެހި ހިޔާލު ތަފާތުވުން އުފެދޭ ހާލަތުގައި ކެތްތެރިވެ ރުޅީގެ މައްޗަށް ބުއްދި އިސްކޮށް ނަބަވީ އިރުޝާދުގައި ބަޔާން ކޮށްފައިވާ ގޮތަށް އަމަލު ކުރުމަށް ސަމާލުކަން ދިނުމަކީ ވަރަށް މުހިންމު ކަމެއް ކަމަށް ހުތުބާގައި ބުނެފައިވެ އެވެ.

މީގެ އިތުރުން ބައެއް މީހުން ދެމަފިރިންގެ މެދުގައި ފިތުނައިގެ އަލިފާން ރޯކުރާ ކަމަަށާ މިކަމުގެ ސަބަބުން ޢާއިލާތައް ބިކަވެ މައިން ބަފައިންގެ ލޯބިން ދަރިން މަހްރޫމްވާކަން ފާހަގަކޮށް އެކަމުގެ ނުރައްކާތެރިކަން ބަޔާން ކޮށްދީފައިވެ އެވެ.

އެހެންކަމުން ދެމަފިރިންގެ މެދުގައި މައްސަލައެއް އުފެދިއްޖެނަމަ ދެމަފިރިން އަމިއްލައަށް ނުވަތަ ދެމަފިރިން އިތުބާރުކުރާ މީހަކާ މަޝްވަރާ ކޮށްގެން އެ މައްސަލައެއް ހައްލު ކުރަން ވަނީ ޚުތުބާގައި ނަސޭހަތްތެރިވި އެވެ.

އެގޮތުންވެސް ހައްލެއް ނުފެނިއްޖެނަމަ ވަރި ހުއްދަ ވާނެ ކަމަށް ޚުތުބާގައި ވަނީ ވިދާޅުވެފައެވެ. ނަމަވެސް އަނބިމީހާ ބޭނުމެއް ނެތި ވަރިއަށް އެދުމަކީ ދީނުގައި ނަހީ ކުރައްވާފައިވާ ކަމެވެ.

"ދެމަފިރިންގެ މެދުގައި ގުޅުން ގޯސްވެ އެއްވެސް ހައްލެއް ނުފެނިއްޖެ ނަމަ، ވަރި ހުއްދަވާނެ ކަމާމެދު ޝައްކެއް ނެތް. ނަމަވެސް، އަނބިމީހާ ބޭނުމެއް ނެތި ވަރިއަށް އެދުމަކީ ދީނުގައި ނަހީކުރައްވާފައިވާ ކަމެއް،" ހުތުބާގައި ބުންޏެވެ.