ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން މާލެ ސަރަހައްދުގައި ޓްރާންސްފާ ސްޓޭޝަންތަކަށް ނަގާ ގޭޓްފީ ކުޑަކޮށްފި އެވެ.

ޓްރާންސްފާ ސްޓޭޝަނަށް އުޅަނދެއް ވަންނަ ކޮންމެ ފަހަރަކަށް ނަގަމުން އައި ފީ ނެގުން ވެމްކޯ އިން ހުއްޓާލީ އަނގާރަ ދުވަހުން ފެށިގެނެވެ. މި ފީ ނެގުން ހުއްޓާލި ނަމަވެސް ކުނީގެ ބަރުދަނަށް އަގު ނަގާނެ އެވެ. ކުރިން ޓްރާންސްފާ ސްޓޭޝަން ތަކަށް ނަގާ އަގަށް ބަދަލު ގެނެސް އުޅަނދު ފަަހަރުން 150ރ. ގެ ފީއެއް ނަގަން ފެށީ މި އަހަރުގެ މާޗް މަހުން ފެށިގެންނެވެ.

މި ބަދަލު އެންގުމަށް ވެމްކޯ އިން މި މަހުގެ 13 ވަނަ ދުވަހު ކުރި އިއުލާނުގަ، ކިލޯ އިން ކުނި ކިރައިގެން ބަރުދަނަށް އަގު ކަނޑައެޅުން ހުއްޓާލައި އަގު ނަގާނީ ޓަނަކަށެވެ. މި ބަދަލާ ގުޅިގެން ކުރިން ކިލޯ އަކަށް ނަގަމުން އައި 50 ލާރިގެ ބަދަލުގަ އަގު ނަގާނީ ޓަނަކަށް 500ރ. އެވެ. (ކިލޯ އަކަށް، 50 ލާރިން ހިސާބު ހެދުމުން ޓަނަކަށް ޖެހޭނީ 500ރ. އެވެ.)

މީގެ ކުރިން ކުނި ޓަނަކަށް ޓިޕިންގް ފީގެ ގޮތުގައި ނަގަމުން އައީ 750 ރުފިޔާ އެވެ.

ޓްރާންސްފާ ސްޓޭޝަންތަކަށް ވަންނަ ކޮންމެ އުޅަނދަކުން ނަގަމުންދިޔަ 150 ރުފިޔާގެ ގޭޓް ފީ ވެސް މިމަހުގެ 14 ވަނަ ދުވަހުން ފެށިގެން ނެގުން ހުއްޓާލާފައިވާ ކަމަށް ވެމްކޯ އިން ބުނެ އެވެ.

މީގެ އިތުރުން މާލެ ސަރަހައްދުގެ ހުރިހާ ޓްރާންސްފާ ސްޓޭޝަންތަކެއްގައި ކުނީގެ ބަރުދަން ބެލުމުގެ އިންތިޒާމް ނުވަތަ ވެއި ބްރިޖް ގާއިމުކުރެވެންދެން މާލެ ޓްރާންސްފާ ސްޓޭޝަންގައި ބަރުދަން ރިޢާޔަތްކޮށް އަގު ނެގުން ހުއްޓާލާފައިވާ ކަމަށްވެސް ވެމްކޯ އިން ބުނެފައިވެ އެވެ.