ބޮޑުވަޒީރުގެ އޮޕަރޭޝަން ކާމިޔާބު: ސްލޮވާކިޔާ ސަރުކާރު

ހަސަން ހަލީމް

16 މެއި 2024 - 14:49

0 comments

ސްލޮވާކިއާގެ ބޮޑުވަޒީރު ފިކޯގެ ފުރާނައަށް މިވަގުތު ނުރައްކަލެއް ނެތް ކަމަށް އޭނާގެ ސަރުކާރުން ބުނޭ

ބަޑިޖަހައި އިއްޔެ ޒަހަމްކޮށްލި ސްލޮވާކިއާގެ ބޮޑުވަޒީރު ރޮބަޓް ފިކޯ މި ވަގުތު އޮންނެވީ ފުރާނަ އަށް ނުރައްކާވާ ހާލަތެއްގައި ނޫން ކަމަށް އޭނާގެ ނައިބު ވިދާޅުވެއްޖެ އެވެ.

ސްލޮވާކިއާގެ ބޮޑުވަޒީރު އަވަހާރަ ކޮށްލުމަށް ބަޑީގެ ހަމަލާއެއް ދީފައިވަނީ ބައްދަލުވުމަކަށްފަހު ސަޕޯޓަރުންނާ ސަލާން ކުރަންދިޔަ ވަގުތުއެވެ. އޭނާއާ ވަރަށް ކައިރީގައި ހުރެ ބަޑިން ދިން ހަމަލާގައި 5 ފަހަރު ބަޑިޖަހާފައިވެއެވެ. ބަޑިން ހަމަލާ ދިނުމާއެކު ބޮޑުވަޒީރު ރޮބާޓް ފީކޯއަށް ފަރުވާދިނުމަށް ވަނީ ހެލިކޮޕްޓަރުގައި ހޮސްޕިޓަލަށް ގެންގޮސްފައެވެ.

ބޭރު މީޑިއާތަކުން ރިޕޯޓް ކޮށްފައިވާގޮތުގައި ހޮސްޕިޓަލަށް ގެންދިއުމަށްފަހު ބޮޑުވަޒީރު ވަނީ ދިގު އޮޕަރޭޝަންތަކެއް ކޮށްފައެވެ. އަދި އޭގެފަހުން މިހާރު ހާލު ރަނގަޅުވަމުން އަންނަކަމަށާއި، ބޮޑުވަޒީރު ރޮބާޓް ފީކޯގެ ފުރާނައަށް މިހާރު ނުރައްކަލެއް ނެތްކަމަށް ބޮޑުވަޒީރުގެ ނައިބު ޓޮމާސް ތަރާބާއާ ހަވާލާދީ ބޭރު މީޑިއާތަކުން ރިޕޯޓް ކޮށްފައިވެއެވެ.

މީޑިއާ ރިޕޯޓުތައް ބުނާ ގޮތުން، ފުލުހުން ހައްޔަރުކޮށްފައިވަނީ އުމުރުން 71 އަހަރުގެ ލިޔުންތެރިއެކެވެ. އެކަމަކު ރަސްމީކޮށް ހައްޔަރުކުރި މީހާގެ މައުލޫމާތު ހާމަނުކުރާތީ، އެ ހަމަލާދިން ސީދާ ސަބަބެއް ވެސް އަދި ސާފެއް ނުވެ އެވެ.

ފިކޯއަކީ މީގެ ކުރިން ދެ ފަހަރެއްގެ މަތިން ބޮޑުވަޒީރުގެ މަގާމު އަދާކުރައްވާފައިވާ ސްލޮވާކިއާގެ ތަޖުރިބާކާރު ސިޔާސީ ލީޑަރަކެވެ.