ލޯންޗުން ޖެހި މީހާ މަރުވި މައްސަލައިގައި ލޯންޗު ދުއްވަން އިން މީހާ ހައްޔަރުކޮށްފި

މަރިޔަމް އަނާ

01 ޖޫން 2024 - 12:04

0 comments

އދ. ދަނގެތި ކައިރިއަށް ފާނަ މަސްވެރިކަން ކުރަން ފައިބާ އުޅުނު މީހެއްގެ ގައިގައި ލޯންޗަކުން ޖެހުމުގެ ސަބަބުން މީހާ މަރުވި މައްސަލައިގައި ލޯންޗު ދުއްވަން އިން މީހާ ހައްޔަރުކޮށްފި އެވެ.

ފުލުހުން މީޑިއާތަކާ ހިއްސާކުރި މެސެޖެއްގައި ވަނީ ލޯންޗުގެ ކެޕްޓަން ހައްޔަރުކޮށްފައިވާ ކަމަށާއި އެއީ ދިވެހި ފިރިހެނެއް ކަމަށެވެ. ނަމަވެސް އޭނާއާ ބެހޭ އިތުރު ތަފުސީލެއް ނުދެ އެވެ.

ދަނގެތިން ވާހަކަ ދެއްކި މީހަކު ބުނީ ނިޔާވެފައި ވަނީ ބަންގްލަދޭޝްގެ މީހެއް ކަމަށެވެ. އޭނާ ބުނީ ބިދޭސީ މީހާ ގައިގައި ލޯންޗުން ޖެހުނު ހަބަރު ފުލުހުންނަށް ރިޕޯޓް ކޮށްފައި ވަނީ މިއަދު ހެނދުނު 7:55 ހާއިރު ކަމަށެވެ.

މައުލޫމާތު ލިބިފައިވާ ގޮތުގައި ލޯންޗު ދިޔައީ ބިދޭސީ މީހާ ގައި މަތިންނެވެ. އެ މީހާ ދަނގެތި ސިއްހީ މަރުކަޒަށް ގެންދިޔައިރު ވެސް އޮތީ މަރުވެފައި ކަމަށް ފުލުހުން ބުންޏެވެ.

މި މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުނެފައިވެ އެވެ.