ހަންކެޑެ ބްރިޖު އަންނަ މަހު އާންމުންނަށް ހުޅުވާލަނީ

އަލީ ރާޒީ

26 ޖޫން 2024 - 14:24

0 comments

އައްޑޫ ގައުކެޑި އާއި މަރަދޫ ގުޅާލުމަށް އެ ދެމެދުގައި އަޅާ ހަންކެޑެ ބްރިޖު.--

އައްޑޫ ގައުކެޑި އާއި މަރަދޫ ގުޅައިލުމަށް އެ ދެމެދުގައި އަޅާ ހަންކެޑެ ބްރިޖުގެ މަސައްކަތް ނިންމައި އަންނަ މަހު އާންމުންނަށް ހުޅުވާލަން ތައްޔާރުވާން ފަށައިފި އެވެ.

އިންފްރާސްޓްރަކްޗާ މިިނިސްޓްރީން ބުނީ ބްރިޖުގެ މަސައްކަތުގެ މިހާރު 95 ޕަސަންޓް މަސައްކަތް މިހާރު ނިންމާފައިވާ ކަމަށެވެ.

މިނިސްޓްރީން ބުނި ގޮތުގައި ބްރިޖުގައި ނިންމަންޖެހޭ މަސައްކަތްތަކުގެ ތެރޭގައި ހުރީ ކްރޭޝް ބެރިއާ އަދި އެކްސްޕެންޝަން ޖޮއިންޓް ހަރުކުރުމާއި ބްރިޖުގެ މަސައްކަތް ކުރުމަށް ވަގުތީ ގޮތުން އަޅާފައިވާ ވެލިތައް ބްރިޖުގެ ދަށުން ނެގުމެވެ.

ހަންކެޑެ ބްރިޖަކީ އައްޑޫ ގައުކެޑި އާއި މަރަދޫ ގުޅާލުމަށް އިންޑިއާގެ އެފްކޮންސް ކުންފުންޏާ ހަވާލުކޮށް ހަދާފައިވާ ބްރިޖެކެވެ. މިއީ 2021 ވަނަ އަހަރު 1.1 ބިލިއަން ރުފިޔާ ހަރަދުކުރާ ގޮތަށް ފެށި މަޝްރޫއެކެވެ.

އެ ބްރިޖު ހަދަނީ ހަންކެޑެ ހިމެނޭ ސަރަހައްދުގައި މިހާރު ބޭނުންކުރަމުން އަންނަ ލިންކް ރޯޑުގެ ހުޅަނގުން ހަންކެޑެ އަށް ނާރާ ގޮތަށް، ހިތަދޫ ގައުކެޑި އާއި މަރަދޫ ގުޅާލެވޭ ގޮތަށެވެ. އެއީ ދިގުމިނުގައި 1.5 ކިލޯމީޓަރު ހުންނާނެ، ހަތަރު ލޭނުގެ ބްރިޖެކެވެ.