ސީއެޗްއެސްއީގެ މާލޭގެ އިމާރާތުގައި އަލުން ކިޔަވައިދޭން ފަށަނީ

މަރިޔަމް އަނާ

30 ޖޫން 2024 - 22:46

0 comments

އެޑިއުކޭޝަން މިނިސްޓަރު: ސީއެޗްއެސްއީގެ މާލޭގެ އިމާރާތުގައި އަލުން ކިޔަވައިދޭން ފަށަނީ

ގުރޭޑް 11 އާއި 12 އަށް ކިޔަވާ ދަރިވަރުންނަށް ހާއްސަ ސްކޫލެއްގެ ގޮތުގައި މާލޭގައި ހިންގަމުން ދިޔަ ސީއެޗްއެސްއީގެ މާލޭގެ އިމާރާތުގައި މިއަހަރުގެ ސެޕްޓެމްބަރު މަހު އަލުން ކިޔަވައިދޭން ފަށަން ނިންމައިފި އެވެ.

ފޭސްބުކްގައި މިނިސްޓަރު ކުރެއްވި ޕޯސްޓެއްގައި ވިދާޅުވީ މި ހިނގާ 2024 ވަނަ އަހަރު ގްރޭޑް10 ގައި 1700 ދަރިވަރުން މާލޭގެ އެކި ސްކޫލްތަކުގައި ކިޔަވަމުން އަންނަ ކަމަށާއި މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމަކީ އެ ކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާ ކަމެއް ކަމަށެވެ.

ސަރުކާރު ސްކޫލެއްގެ ގޮތުގައި، އޭ ލެވެލް މިހާރު ކިޔަވައިދެނީ ހުޅުމާލޭގަ އެވެ.

މާލޭގައި ސަރުކާރު ސްކޫލަކުން އޭލެވެލް ކިޔެވޭނެ އިންތިޒާމު ހަމަޖެހުމުން މާލެއިން ހުޅުމާލެއަށް ދަތުރުކުރާ ދަރިވަރުންގެ އަދަދު މަދުވެ، ގާތުން ތައުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވިގެން ދާނެ ކަމަށްވެސް މިނިސްޓަރު ވިދާޅުވި އެވެ.

މިކަމުގެ ސަބަބުން ދިމާވާ އުނދަގޫތަކަށް ހައްލެއް ހޯދައިދިނުމުގެ ގޮތުން އަންނަ ސެޕްޓެމްބަރު މަހު އޭލެވެލް ކިޔެވުން ފަށަންވާއިރަށް ކުރީގެ ސީއެޗްއެސްއީގެ އިމާރާތުގައި އޭ ލެވެލް ކިޔެވެމުގެ އިންތިޒާމު ހަމަޖައްސާނެ ކަމަށް މިނިސްޓަރު ވިދާޅުވި އެވެ.

ޝަފީއު ވިދާޅުވީ މާލޭގައި ހުރި ސީއެޗްއެސްއީ އިމާރާތް އަލުން ހުޅުވުމުން އޭލެވަލްއަށް ކިޔަވައިދިނުމަށް ސަރުކާރުން ކުރަމުންދާ ހަރަދުތައްވެސް ކުޑަކުރެވޭނެ ކަމަށެވެ.

"ކައިރި މުސްތަގުބަލެއްގައި އޭލެވެލް ކިޔަވައިދުމަށް މުޅިން އާ އިމާރާތެއް މާލޭގައި ބިނާކުރެވޭނެ،" މިނިސްޓަރު ވިދާޅުވި އެވެ.

މިނިސްޓަރު އިތުރަށް ވިދާޅުވީ މާލޭގައި އޭލެވަލްއަށް ކިޔަވައިދޭން ސީއެޗްއެސްއީގެ ކުރީގެ އިމާރާތް އަލުން ހުޅުވި ނަމަވެސް އެމްޑީޕީގެ ސަރުކާރުން ހުޅުމާލޭގައި ހުޅުވި ސީއެޗްއެސްއީގެ އިމާރާތަށް އެއްވެސް ބަދަލެއް ނުގެންނާނެ ކަމަށެވެ.

މިހާރު އޭލެވެލް މާލޭގައި ކިޔެވެނީ ހަމައެކަނި ވިލާ ހައި ސްކޫލާއި، އަހްމަދިއްޔާ އިންޓަނޭޝަނަލް ސްކޫލުގައެވެ. އޭލެވެލަށް ކިޔަވައިދޭ ސަރުކާރު ސްކޫލެއް މާލޭގައި ނެތެވެ.

ހުޅުމާލޭގައި ސީއެޗްސީގެ އިމާރާތް ގާއިމްކުރުމާއެކު މިހާރު އެ ތަނުގައި ކިޔަވާ ދަރިވަރުން ޖެހެނީ ހުޅުމާލެ ދާށެވެ.