އިރާންގެ އިންތިހާބީ ރައީސަށް ރައީސް މުއިއްޒު މަރުހަބާ ވިދާޅުވެއްޖެ

މަރިޔަމް އަނާ

06 ޖުލައި 2024 - 21:15

0 comments

އީރާނުގެ އާ ރައީސަށް އިންތިހާބު ވެފައިވާއިރު، މައްސޫދު ޕެޒޭޝިއަންއަށް ރައީސް، ޑރ. މުހައްމަދު މުއިއްޒު މަރުހަބާ ދަންނަވައިފި އެވެ.

އެކްސް ގައި ކުރެއްވި ޕޯސްޓެއް ގައި ރައީސް ވިދާޅުވީ ރާއްޖެ-އިރާން ގުޅުން އިތުރަށް ބަދަހިވުމަށް އުންމީދު ކުރައްވާ ކަމަށެވެ.

އިރާނަށް ކާމިޔާބަށް އެދިވަޑައިގެން ހަމަޖެހުމާއި ސުލްހައަށް އިރާންގެ ދައުރާ މަސައްކަތަށް ވެސް ރައީސް ކާމިޔާބަށް އެދިވަޑައިގަތެވެ. އީރާނުގެ ރައީސް، އިބްރާހިމް ރައީސީ ދަތުރު ކުރެއްވި ހެލިކަޕްޓަރު ވެއްޓުނު ހާދިސާގައި މޭއި މަހުގެ 19 ވަނަ ދުވަހު އޭނާ އަވަހަރާވުމާއި ގުޅިގެން ބޭއްވި އިންތިހާބު މައްސޫދު ކާމިޔާބު ކުރައްވާފައިވަނީ ހަ ކެނޑިޑޭޓުން ވާދަ ކުރިއިރު، ދެވަނަ ބުރަކަށް ގޮސްގެންނެވެ.

އިންތިހާބުގެ ފުރަތަމަ ބުރު މިދިޔަ މަހުގެ 28 ވަނަ ދުވަހު ބާއްވާފައިވާއިރު، ދެވަނަ ބުރަކަށް އިންތިހާބު ގޮސްފައިވަނީ އެއްވެސް ކެނޑިޑޭޓަކަށް އިންތިހާބު ކާމިޔާބު ކުރެވޭ ވަރަށް ވޯޓު ނުލިބުމުންނެވެ.

ދެވަނަ ބުރުގައި މައްސޫދު މިއިންތިހާބު ކާމިޔާބު ކުރައްވާފައިވަނީ އޭނާއާއި ވާދަ ކުރެއްވި ސައީދު ޖަލީލީ ބަލިކުރެއްވުމަށްފަހު އެވެ. މި އިންތިހާބުގެ ދެވަނަ ބުރުގައި މައްސޫދަށް ވަނީ 53.3 އިންސައްތަ ލިބިވަޑައިގެންފައެވެ. ޖަލީލީއަށް ލިބިވަޑައިގަތީ 44.3 އިންސައްތަ ވޯޓެވެ.