އިންޑިއާގެ ކްރިކެޓު ޓީމަށް ރާއްޖެ އިން ދައުވަތު

އަލީ ރާޒީ

08 ޖުލައި 2024 - 19:55

0 comments

އިންޑިއާގެ ގައުމީ ކްރިކެޓު ޓީމު: އިންޑިއާގެ ކާމިޔާބީ ރާއްޖޭގައި ފާހަގަކުރަން ދައުވަތުދީފި -

އިންޑިއާގެ ގައުމީ ކްރިކެޓު ޓީމުން ޓީ20 ވޯލްޑް ކަޕު ކާމިޔާބު ކުރުމުން އެކަމުގެ އުފާފާޅުކުރުން ރާއްޖޭގައި ކުރިއަށް ގެންދަން އެމްއެމްޕީއާރުސީ އަދި މަޓީ އިން ދައުވަތު ދީފި އެވެ.

މި ދައުވަތުގައި ރާއްޖެ އާއި އިންޑިއާއާ ދެމެދު އޮންނަ ވަރުގަދަ ސަގާފީ އަދި ކުޅިވަރުގެ ގުޅުންތައްވެސް ފާހަގަކޮށްފައިވާ ކަމަށް އެމްއެމްޕީއާރްސީން މައުލޫމާތު ދެއްވިއެވެ.

"ރާއްޖެއަކީ އިންޑިއާގެ ކްރިކެޓް ޓީމުން މި ވަރުގަދަ ކާމިޔާބީ ފާހަގަކުރުމަށް އެންމެ ފުރިހަމަ މަންޒިލެވެ. އެމްއެމްޕީއާރުސީގެ ސީއީއޯ އެންޑް މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވި ފަދައިން، "އިންޑިއާގެ ކްރިކެޓް ޓީމަށް މަރުހަބާ ކިޔައި، އެ ޓީމަށް ލިބުނު ކާމިޔާބީގެ އުފަލުގައި ބައިވެރިވުމަކީ ރާއްޖެއަށް ލިބޭނެ ވަރަށް ބޮޑު ޝަރަފެއް." ޝިއުރީ ވިދާޅުވިއެވެ.

އަދި ކާމިޔާބީ ފާހަގަކުރުމުގެ ހަނދާންތައް އާކުރުމަށް އެންމެ ފުރިހަމަ މަންޒިލެއް ފޯރުކޮށްދީ، އިންޑިއާގެ ކްރިކެޓް ޓީމް ހޯސްޓް ކުރުމުގެ ފުރުސަތަށް އިންތިޒާރު ކުރާކަމަށްވެސް ޝިއުރީ ވިދާޅުވިއެވެ.

މިއީ އިންޑިއާގެ ފަތުރުވެރިން ރާއްޖެއައުން މަދުވެފައިވާ ދުވަސްވަރެއްގައި، އެ މާކެޓު އަލުން ހޯދުމަށް ކުރެވޭ މަސައްކަތެއް ކަމުގައި ބެލެވެ އެވެ. ބަޔާނުގައި ބުނެފައިވަނީ މި ދައުވަތުން ރާއްޖެއާއި އިންޑިއާއާ ދެމެދު އޮތް ޒަމާންވީ ގާތް ގުޅުން ފާހަގަވާނެ ކަމަށެވެ.

މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން އައި އިންޑިއާ މިހާރު އޮތީ ހަ ވަނައިގަ އެވެ. އެ ގައުމުން މިދިޔަ އަހަރުގެ ފުރަތަމަ ހަ މަހު ރާއްޖެ އައި ފަތުރުވެރިންނަށްވުރެ މި އަހަރުގެ ފުރަތަމަ ހަ މަހު އައި ފަތުރުވެރިންގެ އަދަދު 40،000 އާ ގާތްކުރާ އަދަދަކުން ވަނީ ދަށްވެފަ އެވެ.