މާލެ ދާއިރާގެ އެމްޑީޕީގެ ރައީސްކަން އާޒިމް އަށް

ހަސަން ހަލީމް

02 އޯގަސްޓް 2024 - 23:14

0 comments

މާލެ ސިޓީގެ މޭޔަރު އާދަމް އާޒިމް

އެމްޑީޕީގެ ދާއިރާތަކުގެ ރައީސުންގެ މަގާމުތަކުގެ ތެރެއިން ހުސްވެފައިވާ މަގާމުތަކަށް ބޭފުޅުން ހޮވުމަށް މިއަދު އޮތް ބައި އިލެކްޝަން ގައި މާލެ ދާއިރާގެ ރައީސް ކަމަށް މާލެ ސިޓީގެ މޭޔަރު އާދަމް އާޒިމް އިންތިހާބު ވެވަޑައިގެންފި އެވެ.

ވަގުތީ ނަތީޖާތަކުން ދައްކާ ގޮތުން އާޒިމަށް 617 ވޯޓު ލިބިވަޑައިގެންފައިވެ އެވެ. އޭނާއާ ވާދަކުރެއްވި، ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހަށް ލިބިވަޑައިގެންފައިވަނީ 255 ވޯޓެވެ.

އާޒިމްއާ ވާދަކުރެއްވި ފަލާހަކީ އެމްޑީޕީގެ ވަރަށް ދުވަސްވީ އެ ޕާޓީއަށް ވަރަށް ގިނަ ހިދުމަތްތަކެއް ކޮށްދެއްވި ބޭފުޅެކެވެ. މި ފަހުން ޕާޓީގައި އުފެދުނު ހިޔާލުތަފާތުވުންތަކުގައި ޕާޓީ ހީނަރުވިޔަ ނުދީ ހިފެހެއްޓުމުގައި ވަރަށް މުހިންމު ދައުރެއް ފަލާހު އަދާކުރެއްވި އެވެ.

އެމްޑީޕީގެ މާލެ ދާއިރާގެ ރައީސް ކަމުގައި ހުންނެވީ މާލޭގެ ކުރީގެ މޭޔަރު ޝިފާ އެވެ. އެ ގޮނޑި ހުސްވީ ޝިފާ އެމްޑީޕީން ވަކިވުމުންނެވެ.

އެމްޑީޕީގެ މާލެ ދާއިރާގެ ރައީސްގެ މަގާމް ހުސްވީ މީގެ ކުރިން އެ މަގާމުގައި ހުންނެވި މާލޭގެ ކުރީގެ މޭޔަރު މުހައްމަދު ޝިފާ އިސްތިއުފާ ދެއްވުމާ ގުޅިގެންނެވެ.

މިއަދު މާލެ ދާއިރާ ހިމެނޭހެން ޖުމްލަ 20 ދާއިރާއެއްގެ ބައި އިލެކްޝަން ކުރިއަށް ދިޔަ އެވެ.