ބީއެމްއެލް އިން ގެންނަން އުޅުނީ ބަގާވާތެއް ކަމަށް ތުހުމަތުކޮށް މައްސަލަ ތަހުގީގު ކުރަނީ

އައިމިނަތު ޝިޔާޒާ

26 އޯގަސްޓް 2024 - 22:11

0 comments

ގައުމީ ބޭންކް ބީއެމްއެލް އިން އިއްޔެ ނިންމި ބޮޑު ނިންމުމާއި އެކަމާ ގުޅުވައި ސިޔާސީ ބަޔަކު އަޑީގައި ތިބެގެން ސަރުކާރު ވައްޓާލަން އުޅުނު ކަމަށް ބެލެވޭ ކަންތައްތަކެއް ހުރި ކަމަށް ބުނެ ފުލުހުން ތަހުގީގު ފަށައިފި އެވެ.

ޕީއެންސީގެ ހަރުގެ ޖަލްސާ ވެސް ކުރިއަށް ދަނިކޮށް ދާދި ދެންމެއަކު ފުލުހުން ނެރުނު ނޫސްބަޔާނެއްގައި ބުނީ ސަރުކާރުގެ މައި ހިއްސާ އޮންނަ، ބީއެމްއެލްއިން އިއްޔެ ނިންމި ނިންމުމަކީ ސަރުކާރުގެ މަޝްވަރާ އާ ހިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ފަދަ ނިންމުމެއް ކަމަށެވެ.

އަދި ހަމަ އެވަގުތު މީސް މީޑިއާގައި ބޮޓް(އަސްލު މީހަކަށް ނިސްބަތް ނުވާ) އެކައުންޓުތައް ބޭނުންކޮށްގެން ސަރުކާރު ވައްޓާލުމަށް މަގުތަކަށް ނިކުތުމަށް ގޮވާލާ އާންމު ހަމަޖެހުން ނަގާލުމަށް ގޮވާލާފައިވާ ކަމަށެވެ. އަދި އެފަރާތްތަކުން ޤައުމުގެ މަސްލަހަތު ނަގާލުމަށް ހިތްވަރު ދީފައިވާ ފުލުހުން ނެރުއްވި ބަޔާނުގައި ބުންޏެވެ.

މިކަންކަމަށް ބަލައި، މިއީ ގާނޫނީ ސަރުކާރެއް ޢައިރު ޤާނޫނީކޮށް ބަދަލުކުރުމަށް ކުރެވިގެންދިޔަ ކަމެއްގެ ގޮތުގައި ބެލުމުގެ ޖާގަ އޮތް ކަމަށް ވިދާޅުވެ ފުލުހުން ވަނީ މިމައްސަލަ ބަލަމުންދާކަން ހާމަކުރައްވާފަ އެވެ.

ދިވެހި ރާއްޖޭގައި އެންމެ ގިނަ ބަޔަކު ބޭނުންކުރަމުންދާ ބޭންކް އޮފް މޯލްޑިވްސްއިން އިއްޔެ މެންދުރެއްހާއިރު، ވަނީ ދިވެހި ފައިސާ ކާޑުތަކުން ބޭރުގެ އެއްވެސް މުޢަމަލާތެއް ނުކުރެވޭނެ ގޮތަށް ނިންމާފައެވެ. ސަރުކާރުން ވަނީ ބީއެމްއެލްގެ މި ނިންމެވުމަކީ ސަރުކާރުން އެކަމާއި ދެކޮޅަށް ދީފައިވާ ލަފާއާއި އެކު ނިންމާފައިވާ ނިންމުމެއް ކަމަށެވެ.

މިފަދަ މައްސަލައެއް ފުލުހުން ތަހުގީގު ކުރަން ފަށާފައިވާއިރު އިއްޔެ ރާއްޖެ އަށް މާލީ ބަޣާވާތެއް ގެންނަން އެމްޑީޕީ އަޑީގައި އޮވެގެން މަސައްކަތް ކުރި ކަމަށް ފިޝަރީޒް މިނިސްޓަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް ވަނީ މިރޭ ތުހުމަތުކުރައްވާފަ އެވެ.

ޕީއެންސީގެ ހަރުގެ ޖަލްސާގައި ވާހަކަދައްކަމުން ޝިޔާމް ވިދާޅުވީ ބަޣާވާތަކީ އެމްޑީޕީން ވަރަށް ކުރާ ހިތްވާ ކަމެއް ކަމަށާއި ބަޣާވާތުގެ ވަރަށް ގިނަ ވައްތަރުތައް ހުންނަ ކަމަށެވެ. އެގޮތުން އިއްޔެ އިރު އެރިއިރު އެމްޑީޕީ އަޑީގައި އޮވެގެން މާލީ ބަޣާވާތެއް ގައުމަށް ގެންނަން މަސައްކަތް ކުރި ކަމަށް ޝިޔާމް ވަނީ ތުހުމަތުކޮށްފަ އެވެ.

އެގޮތުން ގައުމީ ބޭންކުން ދިވެހި ރައްޔިތުންގެ ކަރުގައި ހިފަން ނިންމުން ނިންމި އިރުގައި، އެމްޑީޕީ ސަރުކާރުގައި މަސައްކަތް ކުރި ބޭފުޅުން ޕްރެސްކޮންފަރެންސްގައި ތިބީ އެ ވާހަކަ ދައްކަވަން ކަމަށާއި އެއީ އިއްތިފާގެއް ނޫން ކަމަށް ޝިޔާމް ވިދާޅުވި އެވެ.

"މިއީ އިންތިޒާމު ކުރެވިގެން، މިއީ ރޭވިގެން ހިންގަން އުޅުނު ބަޣާވާތެއް،" ޝިޔާމް ވިދާޅުވި އެވެ.