ރަޖިސްޓްރީނުކޮށް ސިއްހީ ހިދުމަތް ދޭނަމަ ގާނޫނީ ފިޔަވަޅު އަޅާނެ ކަމުގެ އިންޒާރު ދީފި

އަލީ ރިޒާ

11 ސެޕްޓެމްބަރ 2024 - 18:47

0 comments

ރަޖިސްޓްރީ ނުކޮށް ސިއްހީ ހިދުމަތްދޭ ފަރާތްތަކަށް ފިޔަވަޅު އަޅާނެ ކަމަށް ހެލްތު މިނިސްޓްރީން ބުނެފި އެވެ.

އެ މިނިސްޓްރީން ކުރި އިއުލާނެއްގައި ބުނީ ރާއްޖޭގައި ސިއްހީ އެއްވެސް ހިދުމަތެއް ދެވޭނީ ސިއްހީ ހިދުމަތްދޭ ތަންތަން ހިންގުމާ ބެހޭ ގަވާއިދުގެ ދަށުން އެ ތަން ރަޖިސްޓްރީކޮށް އަދި އޮޕަރޭޓިން ލައިސެންސް ހޯދުމަށް ފަހު ކަމަށެވެ.

ސިއްހީ ހިދުމަތް ދިނުމާ ބެހޭ ގާނޫނުގެ ދަށުން ހަދާފައިވާ ގަވައިދުގެ ދަށުން އެއްވެސް ބާވަތެއްގެ ސިއްހީ ހިދުމަތެއް ރާއްޖޭގައި ދެވޭނީ މިނިސްޓްރީގައި ރަޖިސްޓްރީކޮށް ލައިސެންސް ހޯދުމަށް ފަހު ކަމަށް ބުންޏަސް، އެ ގާނޫނާ ހިލާފަށް މިހާރަކަށް އައިސް އޯލްޓަނޭޓިވް ބޭސްފަރުވާ ނުވަތަ ދިވެހި ބޭހާއި ހިޖާމާގެ ހިދުމަތް ދޭ ކަމަށް މިނިސްޓްރީން ބުންޏެވެ.

އެއާ ހިލާފަށް މަސައްކަތްކުރާ ނަމަ ފިޔަވަޅު އަޅާނެ ކަމަށް ބުންޏެވެ.

ސިއްހީ ހިދުމަތުގެ ގާނޫނު އޮތް ގޮތުން، އެއްވެސް ސިއްހީ ހިދުމަތެއް ދެވޭނީ ހެލްތު މިނިސްޓްރީގައި އެ ހިދުމަތް ދޭ ތަނެއް ރަޖިސްޓްރީ ކުރުމަށް ފަހު، އޮޕަރޭޓިން ލައިސެންސް ނަގައިގެންނެވެ. މިގޮތަށް ހުއްދަ ނުނަގާ ނޫނީ ލައިސެންސް ބާތިލުކޮށްފައި ވަނިކޮށް ހިދުމަތް ދީފިނަމަ، އެތަން ބަންދުކޮށް ގިނަ އަދަދެއްގެ ފައިސާއިން ޖޫރިމަނާ ކުރުމުގެ ބާރު ހެލްތު މިނިސްޓްރީއަށް ލިބެ އެވެ.

މި ފަދަ މައްސަލައެއް ފާހަގަވެއްޖެ ހާލަތެއްގައި އެ ތަނުގެ ވެރިފަރާތައި، އެތަނުގައި މަސައްކަތް ކުރާ މީހުން އެއީ ފަންނީ މީހަކަށްވާ ހާލަތުގައި ވެސް ފިޔަވަޅު އެޅުމުގެ ބާރު ވެސް މިނިސްޓްރީއަށް އޮވެ އެވެ.

ރަޖިސްޓްރީ ނުކޮށް ސިއްހީ ހިދުމަތްދޭ ފަރާތްތަކާ ދެކޮޅަށް ފިޔަވަޅު އަޅާނެ ކަމުގެ އިންޒާރު މިނިސްޓްރީން ދިންއިރު، އެއްވެސް ހުއްދައެއް ނުނަގާ ހިޖާމާ ޖަހައިދޭ ފަޒީލާ އުސްމާންގެ މައްސަލައެއް މިނިސްޓްރީން ދަނީ ބަލަމުންނެވެ. ލިޔުންތައް ފުރިހަމަކޮށް، ކަމާގުޅޭ ހުއްދަތައް ނެގުމަށް ފަޒީސް ހިޖާމާ ހިންގާ ފަޒީލާއަށް ހެލްތު މިނިސްޓްރީން ވަނީ މުއްދަތެއް ވެސް ދީފަ އެވެ.