ރާއްޖޭގައި ބައިނަލްއަގުވާމީ ބަންކަރިންގެ ހިދުމަތް ފަށައިފި

ހަސަން ހަލީމް

19 ސެޕްޓެމްބަރ 2024 - 18:13

0 comments

ބަންކަރިން ހިދުމަތް ފެށުމަށް ތެޔޮ ބާޖާއި ތެޔޮ އަޅައިދޭ އުޅަނދު ތައްޔާރަށް، ފޮޓޯ: ހަތާވީސް

އިގްތިޞާދަށް އިންގިލާބީ ބަދަލެއް ގެންނާނެ ބަންކަރިންގެ ޚިދުމަތް, އިހަވަންދިއްޕޮޅުގައި ރަސްމީކޮށް މިއަދު ފަށައިފިއެވެ.

މިއަދު ހއ.ހޯރަފުށީގައި އޮތް ރަސްމިއްޔާތެއްގައި އެ ހިދުމަތް ފައްޓަވައިދެއްވީ ތިލަދުންމަތީގެ އެކި ދާއިރާތައް ރައްޔިތުންގެ މަޖިލީހުގައި ތަމްސީލުކުރައްވާ މެންބަރުންނެވެ. އެ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދުގެ އިތުރުން އެސްޓީއޯގެ މެނޭޖިން ޑިރެކްޓާ ޝިމާދު އިބްރާހީމް ބައިވެރިވެވަޑައިގެންނެވި އެވެ.

ބަންކަރިން ހިދުމަތް ފަށާފައިވަނީ ދައުލަތުގެ ކުންފުނިތަކުގެ ތެރެއިން އެސްޓީއޯއާއި އެމްޕީއެލް ގުޅިގެންނެވެ. ބަންކަރިން ހިދުމަތުގެ ތެރެއިން އާގުބޯޓުފަހަރަށް ތެޔޮ އަޅައިދިނުމުގެ ހިދުމަތް ފޯރުކޮށްދެނީ ސީދާ އެސްޓީއޯއިންނެވެ.

ބަންކަރިންގެ ހިދުމަތް އިފްތިތާހުކޮށް އެސްޓީއޯއިން އެންމެ ފުރަތަމަ ހިދުމަތް ފޯރުކޮށްދިނީ މޯލްޑިވްސް ސްޓޭޓް ޝިޕިން -- އެމްއެސްއެސް އިން އޮޕަރޭޓްކުރާ "ވައިސީ ބެރިއާ" އަށެވެ. މި ހިދުމަތް ފެށުމުގެ ގޮތުން ވަނީ އެންމެ ފުރަތަމަ ހިދުމަތް ފޯރުކޮށްދިން ބޯޓުތަކަށް ވޯޓާ ސެލިއުޓް ދީފަ އެވެ.

އެމްޕީއެލް އިން އަންނަނީ އެ ސަރަަހައްދުން ކުރިއަށް އޮތްތަނުގައި 14 ހިދުމަތެއް ފޯރުކޮށްދިނުމަށްޓަކައި ތައްޔާރުވަމުން ކަމަށެވެ.

އެސްޓީއޯއިން ބަންކަރިންގެ ހިދުމަތް ފެށި ޗެނަލުން މިހާރު ވެސް މަހަކު 300 އުޅަނދު ރާއްޖެ ހުރަސްކޮށް ދުނިޔޭގެ އެކި ކަންކޮޅުތަކަށް ދަތުރުކުރެއެވެ.

ސަރުކާރުގެ އަމާޒަކީ އިހަވަންދިއްޕޮޅު ސަރަހައްދުން ދަތުރު ކުރާ އެއް ޕަސެންޓު ބޯޓަށް ހިދުމަތް ދީގެން ވެސް ރަނގަޅު އާމްދަނީއެއް ހޯދުމެވެ. ގާތްގަނޑަކަށް 400 މިލިއަން ޑޮލަރުގެ އާމްދަނީއެއް ހޯދޭނެ ކަމަށް އަންދާޒާކުރާ ކަމަށް މީގެ ކުރިން ސަރުކާރުން ހާމަކޮށްފައި ވެ އެވެ.