ލ. އަތޮޅުގެ ހިމާޔަތްކޮށްފައިވާ ސަރަހައްދުތަކަށް ހަވާލުކުރި ގްރާންޓްތަކަކީ އަގުހުރި ފުރުސަތެއް: ތޯރިގު

އިސްމާއިލް ރިޒާ

12 އޮކްޓޫބަރ 2024 - 22:15

0 comments

ލ. އަތޮޅުގެ ހިމާޔަތްކޮށްފައިވާ ސަރަހައްދުތައް ހިމެނޭ، މީހުން ދިރިއުޅޭ ރަށްރަށަށް އެންދެރި މަޝްރޫޢުގެ ދަށުން މިއަދު ހަވާލުކުރި ގްރާންޓްތަކަކީ މި ސަރަހައްދުތަކުގެ ފައިދާ ފުރިހަމަ ގޮތުގައި ހޯދުމަށް ލިބުނު އަގުހުރި ފުރުޞަތެއްކަމުގައި މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ތޯރިގު އިބްރާހިމް ވިދާޅުވެއްޖެ އެވެ.

މިނިސްޓަރ ޠާރިގް މިހެން ވިދާޅުވީ މި ގްރާންޓްތައް ހަވާލުކުރުމަށްޓަކައި މިއަދު ލ. ފޮނަދޫގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ. މިނިސްޓަރ އިތުރަށް ވިދާޅުވީ މި ގްރާންޓްތައް އަވަސް ގޮތެއްގައި ރަނގަޅަށް ބޭނުންކޮށްފިނަމަ މިފަދަ އެހެން ގްރާންޓްތަކާއި މަޝްރޫޢޫތަކަށް ވެސް ދޮރުތައް ހުޅުވިގެންދާނެކަމަށެވެ.

މި އަދު މިދޫ ކުރި ގްރާންޓްތަކުގެ ދަށުން ލ. ގަން، މާބައިދޫ އަދި ހިތަދޫއަށް ކޮންމެ ރަށަކަށް 2 މިލިއަން ރުފިޔާގެ ހިލޭ އެހީ ވަނީ ދެވިފައެވެ. މި ފައިސާ ބޭނުންކުރުމަށް ހަމަޖެހިފައިވަނީ އެންދެރި މަޝްރޫޢުން މި ރަށްތަކުގެ ހިމާޔަތްކޮށްފައިވާ ސަރަހައްދުތަކަށް ތައްޔާރުކޮށްދީފައިވާ މެނޭޖްމަންޓް ޕްލޭންތައް ތަންފީޒުކުރުމަށެވެ.

މީގެ އިތުރުން ތިމާވެށި ހިމާޔަތްކުރުމުގެ މަސައްކަތުގައި މަދަނީ ޖަމްޢިއްޔާތަކާއި އާންމު ފަރުދުންގެ ބައިވެރިވުން އިތުރުކުރުމަށްޓަކައި އެންދެރި މަޝްރޫޢުން ދޫކުރާ ސްމޯލް ގްރާންޓްސް ގެ ދެވަނަ ބުރަށް ހޮވުނު ފަރާތްތަކަށްވެސް މިއަދު ގްރާންޓް ލިބުނު ކަމުގެ ލިޔުން ހަވާލު ކުރެވުނެވެ. މި ބުރުގެ ގްރާންޓަށް ހޮވުނު ތިން ޖަމްޢިއްޔާއަކަށް ޖުމްލަ 1.5 މިލިއަން ރުފިޔާ ފޯރުކޮށްދެވޭނެއެވެ. 2022 ވަނަ އަހަރު ހިންގި ގްރާންޓްގެ ފުރަތަމަ ބުރުގައި ލ. އަތޮޅުގެ 10 ރަށަކުން 10 ޖަމްޢިއްޔާއަކަށް ޖުމްލަ 2.1 މިލިއަން ރުފިޔަ ވަނީ ފޯރުކޮށްދީފައެވެ.

ހިތަދޫ، މާބައިދޫ އަދި ގަމު ކައުންސިލްގެ ރައީސުންނާއި އިސް ބޭފުޅުން ބައިވެރިވެލެއްވި މި ރަސްމިއްޔާތުގައި ލާމު އަތޮޅު ކައުންސިލުގެ ރައީސް، އަލްފާޟިލް އިސްމާއީލް ޢަލީ ވެސް ވާހަކަފުޅު ދެއްކެވިއެވެ.