އާންމުންނަށް ހުޅުވާލައިގެން ބާއްވާ އެމްއެންޑީއެފްގެ މިލިޓަރީ ޑިސްޕްލޭ މިއަދު ހަވީރު

މަރިޔަމް އަނާ

03 ނޮވެމްބަރ 2024 - 12:07

0 comments

މިއަދު ފާހަގަ ކުރަމުން އަންނަ ނަސްރުގެ ދުވަހާ ގުޅިގެން ސިފައިން ބާއްވާ މިލިޓަރީ ޑިސްޕްލޭ މިއަދު ހަވީރު އޮންނާނެކަމަށް އެމްއެންޑީއެފުން ބުނެފި އެވެ.

އާއްމުންނަށް ހުޅުވާލައިގެން ބާއްވާ ޚާއްޞަ މިލިޓަރީ ޑިސްޕްލޭ އޮންނާނީ މިއަދު ހަވީރު 16:15 ގައި ޖުމްހޫރީ މައިދާނުގަ އެވެ.

މި މިލިޓަރީ ޑިސްޕްލޭގައި އެމްއެންޑީއެފުން ގެންގުޅޭ އެކި އުޅަނދުތަކާއި ބަޑިތައް ދައްކާލާނެއެވެ.

ނަޞްރުގެ ދުވަހުގެ ރަސްމީ ހަރަކާތްތައް މިއަދު ފެށީ ސިފައިން އެއް ޖަމާޢަތެއްގައި ކުރި ފަތިސްނަމާދުންނެވެ.

ނަސްރުގެ ދުވަހާ ގުޅުވައިގެން އެމްއެންޑީއެފުން މިއަދު ވަނީ ނޮވެމްބަރު 3، 1988 ގެ އުދުވާނީ ހަމަލާގެ ހަނދާންތަކާ ގުޅޭ އެތައް އެއްޗެއް ދައްކުވައިދޭ މައުރަޒެއް ވެސް ފަށައިފަ އެވެ. އާޓް ގެލެރީގައި މިއަދު ހެނދުނު ފެށި މި މައުރަޒު މި މަހުގެ 9 އާ ހަމައަށް ކުރިއަށް ގެންދަން އޮތީ ނިންމައިފަ އެވެ.

މިއީ އާންމުންނަށް ހުޅުވާލާފައިވާ މައުރަޒެކެވެ.

ނަސްރުގެ ދުވަސް ފާހަގަކުރަނީ ނަވާރަސަތޭކަ އަށްޑިހަ އަށްވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ގައި އަވަށްޓެރި ސްރީލަންކާގެ ތަމަޅަ ހަނގުރާމަވެރިންގެ ބަޔަކު ގޮވައިގެން ދިވެހީންގެ ބަޔަކު ރާއްޖޭގެ ވެރިރަށް މާލެއަށް ހަމަލާދިން ދުވަހާ ގުޅުވައިގެންނެވެ. އެ ހާދިސާއަށް މިއަދު 36 އަހަރު ވަނީ ފުރިފަ އެވެ. އެ ދުވަހު، ދިން ނުރައްކާތެރި އުދުވާނީ ހަމަލާގައި ސިފައިންގެ 8 ބޭކަލަކާއި އާންމުންގެ 11 މީހުން ހިމެނޭހެން 19 ދިވެއްސަކު ޝަހީދުވި އެވެ.