އައިޑީކާޑުގެ ހިދުމަތް ކުޑަހުވަދޫގައި ފަަށަން ތައްޔާރުވެއްޖެ

މަރިޔަމް އަނާ

04 ނޮވެމްބަރ 2024 - 13:59

0 comments

ދ. ކުޑަހުވަދޫ: އެރަށުގައި އައިޑީކާޑު ޕްރިންޓް ކުރުމުގެ ޚިދުމަތް ފަށަނީ -- ފޮޓޯ/ އެމްއާރްޑީސީ

އައިޑީ ކާޑު، ޕްރިންޓް ކުރުމުގެ ހިދުމަތް ދ. ކުޑަހުވަދޫގައި ފަށަން ތައްޔާރުވެއްޖެ އެވެ.

އެ ވުޒާރާއިން ވަނީ މިއީ މާލެ ފިޔަވައި އަތޮޅުތެރޭގެ ރަށެއްގައި އައިޑީ ކާޑު ޕްރިންޓް ކުރުމުގެ ހިދުމަތް ދޭން ފަށާ ދެވަނަ ފަހަރު ކަމަށް ބުނެފައެވެ. މީގެ ކުރިން މި ހިދުމަތް ދެމުން އައީ ވެލާނާގެ ބިލްޑިންގައި ހުންނަ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އޮފީހުންނާއި ގއ. ވިލިނގިލީގައިކަން ހޯމްލޭންޑް މިނިސްޓަރީން ވަނީ ފާހަގަކޮށްފަ އެވެ.

ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން ޑީއެންއާރުން ވަނީ އައިޑީ ކާޑު، ޕްރިންޓް ކުރުމުގެ ހިދުމަތް ދ. ކުޑަހުވަދޫގައި މާދަމާގެ ވަގުތެއްގައި ފަށާނެ ކަމަށާއި މި ހިދުމަތް ދޭން ފަށަނީ ދ. އަތޮޅު ކައުންސިލްގެ އެހީތެރިކަމާއި އެކުގައި ކަމަށް ބުނެފަ އެވެ.

މި ހިދުމަތް ކުޑަހުވަދޫގައި ފައްޓަވައިދެއްވާނީ ހޯމްލޭންޑް މިނިސްޓަރު އިހުސާންއެވެ.

ރާއްޖޭގައި ދިރިއުޅޭ ރައްޔިތުންގެ މަޢުލޫމާތު އެއްކޮށް އެއްތަނަކުން ބެލެހެއްޓުމުގެ މަސައްކަތް 1984 ގައި ފެށީ އައިޑެންޓިޓީ ކާޑު ޔުނިޓުންނެވެ. އޭގެ ފަހުން އެތަން ޑީއެންއާރް އަށް އަށް ބަދަލުކުރީ 11 ނޮވެމްބަރު 1993 ގަ އެވެ.

ޑީއެންއާރުގެ 174 ކަލެކްޓިން ސެންޓަރު ގާއިމު ކޮށްފައިވާ އިރު ފުރަތަމަ ފަހަރަށް އޮންލައިންކޮށް އައިޑީ ކާޑު ހެދުމުގެ މަަސައްކަތް ފެށީ ކޮވިޑާ ގުޅިގެން 2021 ގަ އެވެ. އޭގެ ކުރިން ބޭނުން ކުރަމުން އައި އޮންލައިން ޕޯޓަލްގެ ބަދަލުގައި ޑީއެންއާރު އޮންލައިން ޕޯޓަލްއެއް ގާއިމުކޮށް އަމިއްލަ އަށް ކާޑަށް ހުށަހެޅޭ ގޮތް ހަމަޖެއްސީ މިދިޔަ އަހަރުގެ މާޗް މަހުގެ ތެރޭގަ އެވެ. އަދި ކާޑު ޕްރިންޓުކުރުމަށް ފަހު، ޑީއެންއާރުން އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ހިދުމަތް ތައާރަފުކޮށްފައިވެ އެވެ.