މާލެ ސީއެޗްއެސްއީ ރަސްމީކޮށް ހުޅުވައިފި

ހަސަން ހަލީމް

04 ނޮވެމްބަރ 2024 - 22:27

0 comments

މާލެ ސީއެޗްއެސްސީ ރައީސް މުއިއްޒު މިރޭ ރަސްމީކޮށް ހުޅުވައި ދެއްވަނީ. --ފޮޓޯ: ރައީސް އޮފީސް

ރައީސް ޑރ. މުހައްމަދު މުއިއްޒު، ސެންޓާ ފޯ ހަޔަ ސެކަންޑަރީ އެޑިއުކޭޝަން (ސީއެޗްއެސްއީ)ގެ މާލޭ ކެމްޕަސް މިރޭ ރަސްމީކޮށް ހުޅުއްވައިދެއްވައިފި އެވެ.

އެ ސްކޫލު މިރޭ ރަސްމީކޮށް ހުޅުވިޔަސް، އެތަނުގައި މިދިޔަ ސެޕްޓެމްބަރު މަހުގެ ތެރޭގައި ވަނީ ކިޔަވައިދޭން ފަށައިފަ އެވެ.

ސްކޫލު ރަސްމީކޮށް ހުޅުވުމަށް ކުރިއަށް ގެންދިޔަ ރަސްމިއްޔާތުގައި އެ ސްކޫލުގެ ފަރާތުން ވަނީ އެހާރާއި މިހާރުގެ ހަނދާނީ ރަމްޒެއް ވެސް ރައީސަށް އަރުވައިފަ އެވެ.

އަމީނިއްޔާ ސްކޫލުގެ ފުރަގަހުގައި ހިންގަމުން އައި އިމާރާތް ބޭނުންކުރުން މިދިޔަ އޮގަސްޓް މަހު ހުއްޓާލުމަށް ފަހު، ސީއެޗްއެސްއީ ބަދަލުކުރީ ހުޅުމާލޭގައި އަލަށް ހެދި އިމާރާތަށެވެ.

ރައީސް މީގެ ކުރިން ވަނީ މަތީ ސާނަވީއަށް ކިޔަވަން ބޭނުންވާ ހުރިހާ ކުދިންނަށް މާލޭގައާއި އަދި ރާއްޖޭގެ އެކި ކަންކޮޅުތަކުގައި ވަރަށް ގިނަ ފުރުސަތުތައް ސަރުކާރުން އިތުރުކުރުމަށް މަަސައްކަތް ކުރަމުންދާކަން ފާހަގަކުރައްވާފަ އެވެ.

މާލޭގައި މިރޭ ސީއެޗްއެސްއީގެ ކެމްޕަސް ރަސްމީކޮށް ހުޅުވިއިރު މި ކެމްޕަސްގައި މިހާރު 424 ދަރިވަރުން ދަނީ ތައުލީމު ހާސިލްކުރަމުންނެވެ.

ސީއެޗްއެސްއީގެ މާލޭ ކެމްޕަސްގައި ކިޔަވައިދިނުން މެދުކަނޑާލީ ހުޅުމާލޭގައި ގުރޭޑް 11 އާއި 12 އަށް ކިޔަވަން އާ ސްކޫލެއް އެޅުމަށްފަހު ސީއެޗްއެސްއީގެ ނަމުގައި އެތަން ހުޅުވުމަށްފަހު ރައީސް އިބްރާހީމް މުހައްމަދު ސޯލިހްގެ ވެރިކަމުގައެވެ.

ސެންޓާ ފޯ ހަޔަ ސެކަންޑަރީ އެޑިއުކޭޝަން އެންމެ ފުރަތަމަ ހުޅުވާފައިވަނީ ޖުލައި 3، 1979 ގައެވެ.