ކުރީގެ ރައީސުންގެ އިނާޔަތް ކުޑަކުރަން މުހައްމަދު އިސްމާއިލް ގޮވާލައްވައިފި

އިސްމާއިލް ރިޒާ

06 ނޮވެމްބަރ 2024 - 15:39

0 comments

މަޖިލީހުގެ ޖަލްސާއެއްގައި ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ވާހަކަ ދައްކަވަނީ

ކުރީގެ ރައީސުންނަށް ދޭ އިނާޔަތް ކުޑަކުރަން ވިލިމާލެ ދާއިރާގެ ޕީއެންސީ މެންބަރު މުހައްމަދު އިސްމާއީލް ގޮވާލައިފި އެވެ.

މުހައްމަދު އިސްމާއީލް މިހެން ވިދާޅުވީ އެންޓި-ކޮރަޕްޝަން ކޮމިޝަން (އޭސީސީ)ގެ ރައީސުންނާއި ނައިބު ރައީސުން އައްޔަންކުރުމުގެ ބާރު ރައީސަށް ދިނުމާ ގުޅޭ ގޮތުން ހުށަހަޅާފައިވާ ބިލުގެ އިބްތިދާއީ ބަހުސްގައި ވާހަކަ ދައްކަވަމުންނެވެ.

"ހަތަރު، ފަސް ލައްކަ ރުފިޔާ ނަގައިގެން ގޮސް އިނގިރޭސިވިލާތުގައި އެކަކު، ޖަރުމަނުގައި އަނެކަކު ގޭގައި ބޮޑު ގޮޅިއެއް ހަދައިގެން ހަމަ ކޮންމެ ރެއަކު ފުރޮންޓޭ، މުރޮންޓޭ އުރޮންޓޭ ކިޔައިގެން ޖަލްސާ ބާއްވަނީ،" މުހައްމަދު އިސްމާއިލް ވިދާޅުވި އެވެ.

މުހައްމަދު އިސްމާއިލް ވިދާޅުވި ގޮތުގައި ކުރީގެ ރައީސުން ގައުމު ފަސާދަަކޮށް ރައްޔިތުން ބައިބައި ކުރަން ނޫނިއްޔާ ކުރި މަސައްކަތެއް ނެތެވެ. އަދި ދައުލަތުން މި ބޭފުޅުންނަށް އިނާޔަތް ދޭންޖެހޭ ސަބަބާއި މެދު ސުވާލު އުފައްދަމުން އޭނާ ވަނީ ނައިބު ރައީސްކަން ކުރައްވާފައި ތިއްބެވި ބޭފުޅުންނަށް އިނާޔަތް ނުދިނުމަކީ ހަމަޖެހޭ އުސޫލެއް ނޫން ކަމަށްވެސް ވިދާޅުވެފަ އެވެ.

މުހައްމަދު އިސްމާއިލްގެ ވާހަކައިގައި ވަނީ ކުރީގައި ވެރިކަން ކުރައްވާފައި ތިއްބެވި ބައެއް ރައީސުން ދައުލަތުގެ ފައިސާއަށް ހިޔާނާތްތެރިވެފައިވާ ކަމަށް ތުހުމަތު ކުރައްވާފަ އެވެ. ހާއްސަކޮށް، ކުރީގެ ރައީސް އަބްދުﷲ ޔާމީންއަށް ތުހުމަތުތައް ކުރައްވާ އޭނާ ވާހަކަ ދެއްކެވި އެވެ.

މުހައްމަދު އިސްމާއީލް ވިދާޅުވީ އެފަދަ އެތައް ހިޔާނާތުގެ މައްސަލައެއް ހުރިއިރު، މުއައްސަސާތަކުން އެ މައްސަލަތަކާ މެދު ކުރެވުނު ކަމެއް ނެތް ކަމަށެވެ.

ކުރީގެ ރައީސުންގެ އިނާޔަތް: (މަހަކަށް)

މާލީ އިނާޔަތް: 50،000ރ. (ދައުރަކަށް)

ދިރިއުޅުއްވާ ތަނުގެ ހަރަދު: 50،000ރ.

އޮފީސް ހިންގުމުގެ ހަރަދު: 175،000ރ.

ބޭސްފަރުވާގެ ހަރަދު (އަހަރަކަށް) : 700،000ރ.

ގާނޫނުގައި އޮންނަ ގޮތުން ރައީސްކަން ކުރައްވާފައިވާ ބޭފުޅުންނާއި އެ ބޭފުޅުންގެ އަނބިކަނބަލުންނަށް އެމްއެންޑީއެފުން ސަލާމަތާއި ރައްކާތެރިކަން ފޯރުކޮށްދޭން ޖެހޭނެ އެވެ. ކުރީގެ ރައީސުންނަށް މިހާރު ދޭ އިނާޔަތްތަކަށް ބަލާއިރު، ރައީސް ކަމުގައި ފަސް އަހަރު ފުރިހަމަކުރައްވާފައި ވާތީ، ޔާމީނަށް މަހަކު ގާތްގަނޑަކަށް 975،000 އަށް ވުރެ ގިނަ ރުފިޔާ (ހުރިހާ ހަރަދަކަށް) ހަމަޖައްސަން ޖެހެ އެވެ.

ބޭސްފަރުވާގެ ހަރަދަށް ބިލްކުރާ ގޮތަށް އޮތުމުން، އިނާޔަތުގެ ގޮތުގައި މަހަކަށް ދޭން ޖެހޭނީ 275،000ރ. އެވެ.

އެހެންކަމުން ޖަލުގައި ހުންނެވި ދެ އަހަރަށް ގާތްގަނޑަަކަށް 6.6 މިލިއަން ރުފިޔާ ދައުލަތުން އެމަނިކުފާނަށް ހަމަޖައްސައިދޭން ޖެހެ އެވެ.