ޕީއެންސީއަށް ވަނުމަށް މަޖުބޫރުކަމެއް ނެތް: މުހައްމަދު

އިސްމާއިލް ރިޒާ

26 އޮކްޓޫބަރ 2024 - 21:00

0 comments

މަޖުބޫރުކޮށްގެން ޕީޕަލްސް ނެޝަނަލް ކޮންގްރެސް (ޕީއެންސީ)އަށް މެމްބަރުން ވައްދާ ކަމަށް އިދިކޮޅުން ދައްކާ ވާހަކަތައް، އެޕާޓީގެ ޕާލިމެންޓްރީ ގްރޫޕުގެ ޑެޕިއުޓީ ލީޑަރު، ވިލިމާލޭ ދާއިރާގެ މެންބަރު މުހައްމަދު އިސްމާއިލް ދޮގުކުރައްވައިފި އެވެ.

ޕީއެންސީއަށް މެންބަރުން ވެއްދުމަށް މިއަދު މާލޭގައި ބޮޑު ހަރަކާތެއް ކުރިއަށްގެންދާއިރު މި ހަރަކާތުގައި ޕީއެންސީގެ ލީޑާޝިޕްގައި ހިމެނޭ ފަރާތްތަކުންނާއި ސަރުކާރުގެ އކި މަގާމުތަކުގައި ތިބި ފަރާތްތަކުން ބައިވެރިވެ އެވެ.

މި ހަރަކާތާއި ގުޅޭގޮތުން މުހައްމަދު ވިދާޅުވީ ދިވެހި ރައްޔިތުންނަށް މަޖުބޫރުކޮށްގެން މި ސަރުކާރުން ކުރަން ޖެހޭނެ އެއްވެސް ކަމެއް ނުހުންނާނެ ކަމަށާއި ރާއްޖޭގެ ރައްޔިތުން ދުށް ސިޔާސީ ލީޑަރުންގެ ތެރެއިން ދިވެހި ގައުމާއި ދިވެހި ރައްޔިތުންގެ ހައްގުގައި އެންމެ ފުރިހަމަކޮށް ހިދުމަތް ކުރެއްވި އަދި ކުރައްވަމުން ގެންދަވާ ރައީސަކީ ރައީސް ޑރ. މުއިއްޒު ކަމަށް ދިވެހިން ގަބޫލުކޮށްފި ކަމަށެވެ.

އަދި ޕީއެންސީއަށް މެމްބަރުން ވަންނަ ސަބަބަކީ ވެސް ރައީސްގެ ހުލްގުހެޔޮކަމާއި ތެދުވެރިކަންކަމުގައި މެމްބަރު ވިދާޅުވި އެވެ.

އިލެކްޝަންސް ކޮމިޝަންގެ ވެބްސައިޓުން ދައްކާގޮތުން ޕީއެންސީގައި މިވަގުތު ތިބީ 28،983 މެންބަރުންނެވެ. ނަމަވެސް އަންނަ މަހުގެ މެދު ތެރޭގައި އެ ޕާޓީއަށް 75،000 މެމްބަރުން ރަޖިސްޓަރީ ހަމަވާނެ ކަމަށް، ޕީއެންސީ ޕީޖީގެ ލީޑަރު އަދި އިނގުރައިދޫ ދާއިރާގެ މަޖިލިސް މެމްބަރު އަހުމަދު ފަލާހު ވަނީ ވިދާޅުވެފަ އެވެ.