ޕީއެންސީގެ އެތެރޭގެ އިންތިހާބު ފަސްކޮށްފި

މަރިޔަމް އަނާ

01 ނޮވެމްބަރ 2024 - 22:40

0 comments

މަޖިލިސް އިންތިހާބުގައި، ޕީއެންސީ އަށް ލިބުނު ބޮޑު ކާމިޔާބީ ފާހަގަކުރަނީ - މިހާރު ފައިލް ފޮޓޯ

ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު ނޮވެމްބަރު 9 އަކުން ނޮވެމްބަރު 23 ވާ ހޮނިހިރު ދުވަހަށް ފަސްކޮށްފި އެވެ.

މީގެ ކުރިން މި އިންތިހާބު ބޭއްވުމަށް ނިންމާފައި އޮތީ މިމަހުގެ 9 ވަނަ ދުވަހު އެވެ.

ޕީއެންސީން މިރޭ ނެރުނު ބަޔާނެއްގައި ބުނީ އެ އިންތިހާބު މިހާރު ބޭއްވުމަށް ހަމަޖެހިފައިވަނީ މި މަހުގެ 23 ވަނަ ދުވަހު ކަމަށެވެ.

އެތެރޭގެ އިންތިހާބު ފަސްކޮށްފައިވަނީ، ޖުމްހޫރީ ދުވަހާއި ގުޅިގެން މިމަހުގެ 10 ވަނަ ދުވަހަކީ ރަސްމީ ބަންދު ދުވަހެއްގެ ގޮތުގައި ރައީސް ހަމަޖެއްސެވުމާ ގުޅިގެން، އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރުކުރަން ހަމަޖެހިފައިވުމާއެކު، މި މަހުގެ 9 ވަނަ ދުވަހު އިންތިހާބު ބާއްވައިފިނަމަ މެންބަރުންނަށް ވޯޓުލުމަށް ދަތިވާނެތީ ކަމަށެވެ.

މި ނިންމުން ނިންމީ ގިނަ އަދަދެއްގެ ކެންޑިޑޭޓުންނާއި ޕާޓީގެ މެންބަރުންގެ އެދެމުގެ މަތިން ކަމަށްވެސް ޕީއެންސީން ބުނެފައިވެ އެވެ.

ޕީއެންސީގެ އެތެރޭގެ އިންތިހާބުގައި އިންތިހާބުކުރަން ހަމަޖެހިފައިވާ މަގާމުތަކުގެ ތެރޭގައި ދާއިރާތަކުގެ ރައީސުންނާއި ނައިބުރައީސުންނާއި ޒުވާނުން ހަރަކާތުގެ ރައީސް އާއި އަންހެނުން ހަރަކާތުގެ ރައީސްގެ އިތުރުން ސްޓިއަރިން ކޮމެޓީގެ މެމްބަރުން ހިމެނެ އެވެ.

ޕީއެންސީން ބުނީ، ދާއިރާތަކުގެ އިންތިހާބުގެ ވޯޓު ނަގާ ތާރީހު ބަދަލުވުމާއި ގުޅިގެން އިންތިހާބު ބާއްވަން ޖެހޭ ދާއިރާތަކާއި ރަށްރަށް އަދި ކެނޑިޑޭޓުންގެ ނަންތައް އަދި ވޯޓު ލެވޭ މީހުންގެ ލިސްޓު މިމަހުގެ 10 ގައި އާންމު ކުރާނެ ކަމަށެވެ.