އިދިކޮޅުން އުޅެނީ ރައްޔިތުން ބައިބައިކުރަން: މުހައްމަދު

އަހުމަދު ނިހާން

09 ނޮވެމްބަރ 2024 - 18:04

0 comments

ވިލިމާލެ ދާއިރާގެ މެމްބަރު މުހައްމަދު އިސްމާއީލް

ސަރުކާރާ ދެކޮޅު ފަރާތްތަކުން އަބަދުވެސް ވާހކަ ދައްކަނީ ރައްޔިތުން ބައިބައިވާ ގޮތަށް ކަމަށް ވިލިމާލެ ދާއިރާގެ މެންބަރު މުހައްމަދު އިސްމާއީލް ވިދާޅުވެއްޖެ އެވެ.

ޕީއެންސީއަށް މެންބަޝިޕް އިތުރުކުރުމަށް މިއަދު ކުރިއަށް ގެންދިޔަ ހަރަކާތް ފެށުމުގެ ގޮތުން ނޫސްވެރިންނާ ވާހަކަދައްކަވައި މުހައްމަދު ވިދާޅުވީ ޕީއެންސީއަށް މެންބަރުން ބާރު ސްޕީޑުގައި އިތުރުކުރަމުންދާތީ، އިދިކޮޅުގެ ފަރާތްތަކުން އެއީ މަޖުބޫރުންނާއި ސިޔާސީ ނުފޫޒު ފޯރުވައި، މަގާމުގެ ބިރު ދައްކައިގެން ކުރާ ކަމެއްގެ ގޮތުގައި ތުހުމަތުތައް ކުރާ ކަމަށެވެ.

އޭނާ ވިދާޅުވީ ޕީއެންސީގެ މަޖިލިސް މެންބަރުން ތިބީ މި ސަރުކާރު ދިފާއުކޮށް ރައީސްގެ ވައުދުފުޅުތައް ފުއްދުމަށްޓަކައި ގާނޫނު ހަދާ މަޖިލިސް ތެރެއިން ހަދަންޖެހޭ ގާނޫނުތަކާއި، އިސްލާހުކުރަންޖެހޭ ގާނޫނުތައް އިސްލާހުކުރުމަށް ތައްޔާރަށް ކަމަށެވެ.

އަދި މި ފަސް އަހަރުތެރޭ ކުރުމަށް ރައީސް މުއިއްޒު ވައުދުވެވަޑައިގެންފައިވާ ހުރިހާ ކަމެއް ފުރިހަމަކޮށްދެއްވާނެ ކަމުގެ ޔަގީންކަން ވެސް އޭނާ ދެއްވި އެވެ.

"ދެން އިދިކޮޅު ފަރާތްތަކުން ބައެއް ސިޔާސީ ބޭފުޅުން ހަގީގަތުގައި ވެސް އަޅުގަނޑުމެންނާ ދިމާލަށް ދެންމެ ފާހަގަކުރެއްވިހެން މަޖުބޫރުކޮށްގެންނޭ، އެކިއެކި ގޮތްގޮތަށް ސަރުކާރުން ނުފޫޒު ފޯރުވައިގެންނޭ ފޯމު ފުރަނީ، އެ ދައްކަނީ ވަރަށް ޣައިރު ޒިންމާދާރު ވާހަކައެއް. އެ ދައްކަނީ ރައްޔިތުންތެރޭ ފިތުނަ އުފައްދަން ދައްކާ ވާހަކައެއް. ރައްޔިތުން ބައިބައިކުރަން ދައްކާ ވާހަކައެއް،" މުހައްމަދު ވިދާޅުވި އެވެ.

މީގެ ކުރީގައި ރާއްޖޭގައި އޮތް ބައިބައިވުން މިހާރު ނެތްކަމަށާއި، ޑިމޮކްރަސީގެ ފުރިހަމަ ނިޒާމު ރާއްޖެއިން ބަލައިގަންނަން ފަށާފައިވާކަމަށް އޭނާ ވިދާޅުވި އެވެ.

މުހައްމަދު އިސްމާއިލް ވިދާޅުވި ގޮތުގައި ޕާޓީގެ އަމާޒަކީ ނޮވެމްބަރު 17ގައި މި ސަރުކާރަށް އަހަރެއް ފުރުމުގެ ކުރިން ޕާޓީއަށް 75،000 މެމްބަރުން ހަމަކުރުމެވެ. ނަމަވެސް މިއަދުގެ ހަރަކާތުގެ ތެރެއިން 85،000 ހަމަވާނެ ކަމަށާއި އީސީއަށް ހަވާލުނުކުރެވި މިހާތަނަށް ހުރި 28،000 ފޯމު މިމަހުގެ 17 ވަނަ ދުވަހު އެ ކޮމިޝަނާ ހަވާލުކުރާނެ ކަމަށް ވެސް އޭނާ ވިދާޅުވިއެވެ.