ޝޭޑްސް އޮފް މައިންޑް ކުރެހުމުގެ މައުރަޒު އިފްތިތާހުކޮށްފި

އަލީ ރާޒީ

12 ނޮވެމްބަރ 2024 - 22:16

0 comments

ނައިބު ރައީސް ހުސައިން މުހައްމަދު ލަތީފް "ޝޭޑްސް އޮފް މައިންޑް" ކުރެހުމުގެ މައުރަޒު އިފްތިތާހުކޮށްދެއްވައިފި އެވެ.

މައުރަޒު ހުޅުއްވައިދެއްވުމުގެ ގޮތުން، މައުރަޒުގައި ބަހައްޓާފައިވާ ފޮޓޯތައް ހިމެނޭ ކެޓަލޮގެއް ނައިބުގެ އަތްޕުޅަށް އަރުވާފައިވެ އެވެ. އަދި އެއަށްފަހު ހާއްސަ ފޮޓޯއެއް ވަނީ ނަންގަވާފައެވެ. މަޢުރަޒު އިފްތިތާހުކޮށްދެއްވުމަށްފަހު ނައިބު ރައީސް ވަނީ މައުރަޒުގެ ކުރެހުންތައް ބައްލަވާލައްވާފަ އެވެ.

މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް އިން އިންތިޒާމުކުރާ މި މަޢުރަޒަކީ، ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކޮށް، ނަފްސާނީ ދުޅަހެޔޮކަމުގެ މުހިންމުކަމާމެދު ހޭލުންތެރިކަން އިތުރުކުރުމުގެ މަޤްޞަދުގައި ބާއްވާ މަޢުރަޒެކެވެ.

މި މަހުގެ 12 އިން 17 އަށް ނޭޝަނަލް އާޓް ގެލެރީގައި ކުރިއަށްގެންދާ މި މަޢުރަޒުގައި ދައްކާލާ ކުރެހުންތަކަކީ، ޢާންމުކޮށް ހުޅުވާލައިގެން ރާއްޖޭގެ އެކި ކަންކޮޅުތަކުގެ ޒުވާނުން ހުށަހެޅި ކުރެހުންތަކެވެ.