ރައީސްގެ ސިޔާސަތުތައް ދުނިޔެ ބަލައިގަނޭ: ނައިބު

އައިމިނަތު ޝިޔާޒާ

17 ނޮވެމްބަރ 2024 - 14:29

0 comments

ރައީސް ޑރ. މުހައްމަދު މުއިއްޒު ގެންގުޅުއްވާ ހާރިޖީ ސިޔާސަތުތައް މުޅި ދުނިޔެއިން ވެސް ބަލައިގަންނަމުންދާ ކަމަށާއި އޭގެ ސަބަބުން ގައުމަށް އެތައް ފައިދާއެއް ވަމުންދާ ކަމަށް ނައިބް ރައީސް ހުސެއިން މުހައްމަދު ލަތީފް ވިދާޅުވެއްޖެ އެވެ.

ސަރުކާރަށް މިއަދު އެއް އަހަރު ފުރުމާ ގުޅިގެން ދައުލަތުގެ މީޑިއާ ޕީއެސްއެމުން ގެނެސްދެމުން އަންނަ "ހަފުތާ 52" ލައިވް ކަވަރޭޖްގައި ނައިބު ވިދާޅުވީ މި ސަރުކާރު ވެރިކަމާ ހަވާލުވި އިރު، ރާއްޖެ އޮތް ހާލަތުން އަރައިގަތުމަށް ވަރަށް ގިނަ މަސައްކަތްތަކެއްކޮށްފައިވާ ކަމަށެވެެ.

ނައިބު ރައީސް ވިދާޅުވީ ހަދާފައިވާ ގާނޫނުތަކާއި ގަވާއިދުތަކާ ހިލާފަށް އޭރުގެ ސަރުކާރުން މާލީ ނިޒާމުގެ ކަންކަން ބައްޓަންކޮށްފައިވާ ގޮތުން މި ސަރުކާރަށް ބޮޑެތި ދަތިތަކާ ކުރިމަތިވި ކަމަށެވެ. އޭގެ އެއް މިސާލަކަށް އެމަނިކުފާނު ދެއްކެވީ ދަރަނީގެ މައްސަލަ އެވެ.

ވިދާޅުވީ، އޭގެ ކުރީގެ 40 އަހަރާ ނުބައްދަލު ދަރަނި ނަންގަވާފައި ހުރި ކަމަށާއި، އެ ދަރަނިތައް ނަގާފައި ވަނީ ދެއްކޭނެ ގޮތެއް ނުހޯދައި ކަމަށެވެ. ރައީސް މުއިއްޒު ވެެރިކަމާ ހަވާލުވެވަޑައިގެން ވިސްނުންތެރިކަމާއި ހިކުމަތްތެރިކަމާއެކު އެޅުއްވި ފިޔަވަޅުތަކުގެ ސަބަބުން އެކަން މިއަދު ހަމައަކަށް އެޅިފައިވާ ކަމަށް ވިދާޅުވި އެވެ.

އެކަންކަން ހަމައަކަށް އެޅުނީ އެމަނިކުފާނު ގެންގުޅުއްވާ ހާރިޖީ ސިޔާސަތުތައް ރަގަޅު ކަމުން ކަމަށް ވެސް ނައިބް ރައީސް ވިދާޅުވި އެވެ. ދަރަނި ނަގާފައި ހުރި ގައުމުތަކާ ގުޅުން ބަދަހިކޮށް، އެގައުމުތަކުން ލިބެމުންދާ ފައިދާތަކުގެ ސަބަބުން މިއަދު ގައުމު ދަނީ ރަގަޅު މިސްރާބަކަށްކަން ފާހަގަކުރެއްވި އެވެ.

"ދުނިޔެ ގަބޫލުކޮށްފި ރައީސްގެ ސިޔާސަތުތައް. އެއީ އަޅުގަނޑުމެންނަށް ލިބެމުންދާ އެންމެ ބޮޑު ކާމިޔާބީއަކީ،" ނައިބް ރައީސް ވިދާޅުވި އެވެ.

އެ މަނިކުފާނޖު ވިދާޅުވީ ކުރިއަށް އޮތް ދުވަސްތަކުގައި ރާއްޖޭގެ އެކި ހިސާބުތަކުގައި ގިނަ މަޝްރޫޢުތަކެއް ފެށިގެން ދާނެ ކަމަށެވެ. ހާއްސަކޮށް ބޯހިޔާވަހިކަމުގެ މަޝްރޫއުތައް ހިމެނޭ ކަމަށް ވިދާޅުވި އެވެ.

"ބޯހިޔާވަހިކަމުގެ މަޝްރޫޢުތައް ފެށި، ރައްޔިތުންނަށް ބޮޑު ހައްލެއް ލިބިގެންދާނެ،" ނައިބު ވިދާޅުވި އެވެ. "ބަޖެޓުގެ ބޮޑު ބައި އޮތީ އެކަމަށް ހައްލު ހޯދުމަށް."