ގާނޫނުއަސާސީ ބަދަލުކުރީ ރައްޔިތުންގެ ހައްގުގައި: ރައީސް

އަލީ ރާޒީ

21 ނޮވެމްބަރ 2024 - 14:01

0 comments

ރައްޔިތުންގެ މަޖިލީހުން ބިލެއް ފާސްކުރަން އޮންނަ މަރުހަލާތައް ކުރުކޮށްލައި، އިއްޔެ ހުށަހަޅައި އިއްޔެ ފާސްކޮށް ތަސްދީގުކުރި ގާނޫނުއަސާސީ އަށް ގެނައި ބަދަލުތަކަކީ "ރައްޔިތުންގެ ހައްގުގައި" އަދި "ރާއްޖޭގެ ހަމަޖެހުމަށް" މުހިއްމު ބަދަލުތަކެއް ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ދެއްވި ވީޑިއޯ މެސެޖެއްގައެވެ.

"މި ކަންކަމަކީ ހަގީގަތުގައި ރާއްޖޭގެ ރައްޔިތުންގެ ހައްގުގައި ރާއްޖޭގެ މިނިވަންކަމާ، ސިޔާދަތާ، ތަރައްގީއާ، ހަމަޖެހުމަށް، މި ކަންކަމަށްޓަކައި ނިންމުނު ވަރަށް މުހިއްމު ނިންމުންތަކެއް،"އެ މަނިކުފާނު ވިދާޅުވި އެވެ.

"ރައްޔިތުންގެ މަޖިލީހުގެ އިއްޒަތްތެރި މެންބަރު ގައުމީ ޖޯޝާއެކު ގައުމަށްޓަކައި ނިންމި ނިންމުންތަކެއް."

ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ މެންބަރުންގެ ފުރިހަމަ ތާއިދާއެކު ގާނޫނުއަސާސީގެ ފަސް މާއްދާއަކަށް އިއްޔެ ބަދަލު ގެނަ އެވެ.

އެ ވީޑިއޯ ނިންމަވައިލައްވަމުން، އެމަނިކުފާނު ވަނީ މަޖިލީހުން ގެނައި އިޞްލާޙުތަކަކީ ރާއްޖޭގެ ރައްޔިތުންގެ ހައްގުގައި މިނިވަންކަމާއި ސިޔާދަތާއި ތަރައްގީއާއި ހަމަޖެހުމަށްޓަކައި ނިންމެވި ވަރަށް މުހިންމު ނިންމެވުންތަކެއް ކަމުގައި ވިދާޅުވެފައެވެ. އަދި، އެފަދަ ނިންމެވުމެއް ރައްޔިތުންގެ މަޖިލީހުގެ މެންބަރުން ނިންމެވީތީ، އެ މެންބަރުންނަށް އެމަނިކުފާނު ވަނީ ޝުކުރު އަދާކުރައްވާފައެވެ.