މަޖިލީހުގެ ތެރެއިން ދިވެހި ރައްޔިތުންނަށް ސަރުކާރުން އިއްޔެ ދައްކާލީ ހުދުމުހުތާރުކަން: އެމްޑީޕީ

މަރިޔަމް އަނާ

21 ނޮވެމްބަރ 2024 - 14:11

0 comments

ރައްޔިތުންގެ މަޖިލީހުގެ ތެރެއިން ދިވެހި ރައްޔިތުންނަށް ސަރުކާރުން އިއްޔެ ދައްކާލީ ބޭނުންއިރަކު ގާނޫނުއަސާސީއާ ކުޅެލެވިދާނެ ކަމާއި ސަރުކާރުގެ ހުދުމުހުތާރުކަން ހުރި މިންވަރު ކަމަށް އިދިކޮޅު އެމްޑީޕީން ބުނެފި އެވެ.

އެ ޕާޓީގެ މިއަދުގެ ނޫސްވެރިންގެ ބައްދަލުވުގައި އޭނަ ވިދާޅުވީ މި ސަރުކާރުން މިހާރު ކަންކަން ކުރަމުން އަންނަނީ ޑިމޮކްރަސީގެ ހަމަތަކާ ވަރަށް ބީރައްޓެހިކޮށް ކަމަށެވެ. އެގޮތުން އިއްޔެ އާއި ރޭ މަޖިލީހުގެ ތެރެއިން ފެނިގެން ދިޔައީ ޚުދުމުހުތާރު ވެރިކަމެއްގައި ކަންކަން ފެންނަ ގޮތަށް ކަމަށެވެ.

"އަޅުގަނުމެން އަބަދު ވެސް ދަންނަވަމުން މި އަންނަނީ އަދި މި ސަރުކާރުގެ ވިސްނުމާއި ފިކުރު ހިމެނޭ ޕާޓީތަކަކީ އެކި ފަހަރު އެކި އިރު ދިވެހި ރާއްޖޭގައި ޑިމޮކްރަސީގެ ހަމަތައް ބޭނުން ކުރައްވައިގެން އަބަދު ވެސް ވެރިކަމާ ހަވާލުވެވަޑައިގަތުމަށް ފަހު، އެ ޑިމޮކްރަސީގެ ހަމަތައް ގަބޫލު ނުރައްވައި ޚުދުމުހުތާރު ވެރިކަމާ ދިމާލަށް ދަތުރު ކުރައްވާ ޕާޓީއެެއް ނޫނޭ، ފިކުރެއް ނޫނޭ،" ފައްޔާޒް ވިދާޅުވި އެވެ. "އެކަން ފެންނަމުން ފެންނަމުން ގޮސް އިއްޔެ މި ފެނުނީ ވަރަށް ސާފުކޮށް މިއަދުގެ ރައީސުލްޖުމްހުރިއްޔާ ރައްޔިތުންނަށް ތިމަންނަ ބޭނުން ގޮތަކަށް ގާނޫނުއަސާސީ ބަދަލުކުރާނަމޭ އަދި ކުރެވޭނެކަން ދައްކުވައި ދިން ތަން."

ސުޕްރީމް ކޯޓަށް ދިއުމާ ގުޅޭ ގޮތުން ތަކުރާރުކޮށް ނޫސްވެރިން ސުވާލު ކުރުމުން ފައްޔާޒު ވިދާޅުވީ ޕާޓީން އޭގައި ވަކި ގޮތެއް ނުނިންމާ ކަމަށެވެ. ނަމަވެސް މަޖިލީހުން ގާނޫނުއަސާސީ އާއި ޑިމޮކްރެޓިކް ހަމަތަކާ ހިލާފުވުމުން ދެން އޭގައި ބަސް ބުނަންވީ އެއް ތަަނަކީ ސުޕްރީމް ކޯޓު ކަމަށް އޭނާ ވިދާޅުވި އެވެ.

"އަޅުގަނޑުމެންގެ ޕާޓީއަކީ މަޝްވަރާގެ މަތިން ކަންކަން ނިންމާ ޕާޓީއެއް. މި ކަމުގައި އަޅުގަނޑުމެން މަޝްވަރާ ކުރަނާން،" ފައްޔާޒު ވިދާޅުވި އެވެ.

ގާނޫނުއަސާސީއަށް އިއްޔެ ގެނައި އިސްލާހުތަކާ އެކު މެންބަރުން މަސައްކަތް ކުރަންޖެހޭ ގޮތުގެ މިނިވަންކަން ގެއްލި މެންބަރުން ތަޅުއެޅުވިފައިވާ ކަމަށްވެސް ވިދާޅުވި އެވެ. އެމްޑީޕީއަށް މެޖޯރިޓީ ލިބިއްޖެނަމަ އިއްޔެ ގާނޫނުއަސާސީއަށް ގެނައި އިސްލާހުތަކަށް ބަދަލުތަކެއް ގެންނާނެ ކަމަށްވެސް ވިދާޅުވި އެވެ.

"ޕާޓީން ވަކިކޮށްފި ހާލަތުގައި ގޮނޑި ގެއްލޭނަމަ ރައްޔިތުން އެބަ ބުނަންޖެހޭ އާނއެކޭ އޭނާ ދުރަށް ލާން އެބަޖެހެއޭ،" މެންބަރަކު ޕާޓީން ވަކިކުރާ ހާލަތުގައި ގޮނޑި ގެއްލެންވާނީ ރައްޔިތުންގެ ބަހަކާ އެކު ކަމަށް ވަކާލާތު ކުރައްވަމުން ފައްޔާޒު ވިދާޅުވި އެވެ.

އޭނާ ވިދާޅުވީ އެމްޑީޕީ އަބަދުވެސް މަސައްކަތް ކޮށްފައިވާނީ އަދި މިއަދު ކުރަމުންދަނީ ވެސް ރައްޔިތުންގެ ހައްގުތައް ވީހާވެސް ފުޅާކޮށް ކަށަވަރުކުރެވޭ ގޮތަށް ކަމަށެވެ. ނަމަވެސް ޕީއެންސީގެ ވިސްނުމާއި ފިކުރަކީ ރައްޔިތުން "ތަޅުއެޅުވުން" ކަމަށްވެސް ވިދާޅުވި އެވެ.