އެމްޑީޕީއާ ގުޅިގެން މި ސަރުކާރާ ދެކޮޅަށް ސިޔާސީ މަސައްކަތެއް ނުކުރާނަން: ޔާމީނު

ހަސަން ހަލީމް

07 ނޮވެމްބަރ 2024 - 18:24

0 comments

ރާއްޖޭގެ ވެރިކަމަށް ވަޑައިގަތުމަށްޓަކައި އެމްޑީޕީއާ ގުޅިގެން މަސައްކަތް ނުކުރައްވާނެ ކަމަށް ކުރީގެ ރައީސް އަދި ޕީޕަލްސް ނެޝަނަލް ފްރޮންޓް (ޕީއެންއެފް)ގެ ބާނީ އަބްދުﷲ ޔާމީން އަބްދުލްގައްޔޫމު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރޮގްރާމުގައި ވާހަކަ ދައްކަވަމުން ޔާމީން ވިދާޅުވީ، އެމްޑީޕީއަށް އެމަނިކުފާނު އިތުބާރު ނުކުރައްވާ ކަމަށާއި އެ ޕާޓީން މަސައްކަތް ކުރަނީ ރާއްޖެއަށް ހެޔޮ ގޮތް އެދިގެން ކަމަށް ގަބޫލު ނުކުރައްވާ ކަމަށެވެ.

"ނޫން. ތިއީކީ ވާނެ ކަމެއް ނޫން. ވާގޮތަކީ، އަޅުގަނޑުމެންގެ އައިޑޮލޮޖީއާ އެމްޑީޕީގެ އައިޑޮލޮޖީއާ ތަފާތު. އަޅުގަނޑަށް މި ކުރި ހުރިހާ ޖެއްސުމަކާ ހުރިހާ ގޯނާއެއް ކުރީ އެމްޑީޕީ ސަރުކާރުން ނޫންތޯ. އެހެންވީމަ ކީއްކުރަންތޯ އެމީހުންނާ އެކީ ކުރިއަށްދާންވީ،" އެމްޑީޕީއާއެކު ކޯލިޝަނަކަށް ވަޑައިގެންފާނެތޯ އެހުމުން ޔާމީން ވިދާޅުވި އެވެ.

"އަޅުގަނޑުމެންނާ އެމްޑީޕީއާ ވާހަކަތަކެއް ދެއްކިދާނެ. އެކަމު އެމީހުންނާ އެކީ އެގްރީމެންޓެއް ހަދައިގެން، އެމީހުންނާ އެކީ ސިޔާސީ މަސައްކަތް ކޮށް މި ސަރުކާރު ވައްޓާލަން. ސަރުކާރަށް ދެރަދޭން. މިކަންކައް ކުރާކަށް ކޮންމެހެން އަޅުގަނޑު ނެތިން އެމްޑީޕީއާ އެކީ."

ރައީސް ޔާމީން އިތުރަށް ވިދާޅުވީ ރާއްޖެ މިއަދު އޮތް އިގްތިސާދީ ހާލަތަށް ދިޔައީވެސް އަދި ރާއްޖެ، އިންޑިއާގެ އަޅުވެތި ކަމުގެ ދަށަށް މިހާ ބޮޑަށް ދިޔައީވެސް ސީދާ އެމްޑީޕީ ސަރުކާރުގެ ސަބަބުން ކަމަށެވެ. އެހެންވެ މިކަންކަމުގެ ޒިންމާ ސީދާ އެމްޑީޕީން ނަގަންޖެހޭނެ ކަމަށްވެސް ވިދާޅުވި އެވެ.

ޖަލުން މިނިވަންވެ ވަޑައިގަތުމަށް ފުރަތަމަ ފަަހަރަށް ޓީވީ ޕްރޮގުރާމަކަށް އަރާ ދިން އިންޓަވިއުއެއްގައި ރައީސް މުއިއްޒުއަށް ތާއީދު ކުރެވުނީތީ ހިތާމަކުރަންތޯ، ރާއްޖެޓިވީގެ ފަށާއިރު ޕްރޮގްރާމްގެ ޕްރެސެންޓަރު ސުވާލު ކުރުމުން ވިދާޅުވީ އެކަމަށް ވަރަށް ބޮޑަށް ހިތާމަ ކުރާ ކަމަށެވެ.

" އެބްސޮލިއުޓްލީ، ވަރަށް ބޮޑަށް ރިގްރެޓްކުރަން، މުއިއްޒު އަކީ އަޅުގަނޑުމެންގެ މުޑުވަކެއް، އަޅުގަނޑުމެން ރައްޔިތުންނަށް ދެއްކި ބޭފުޅެއް. އެކަމަކު މިހާރު މުއިއްޒު ވެރިކަމަށް ވަޑައިގެން ނިންމަވާ ނިންމެވުންތަކުގެ ސަބަބުން ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް ." އެ ސުވާލަށް ޖަވާބުދެއްވަމުން ވިދާޅުވިއެވެ.

އިދިކޮޅު ލީޑަރެއްގެ ގޮތުގައި މިހާރު ހަރަކާތްތެރިވަމުން އަންނަ ކުރީގެ ރައީސް ޔާމީން ވިދާޅުވީ ވެރިކަމާ ހަވާލުވެ ވަޑައިގެން މުއިއްޒު އަމަލު ކުރައްވާ ގޮތް ކަމު ނުދާ ކަމަށެވެ. އަދި ދޭސީކޮށް، ޣައިރު ޒިންމާދާރުކޮށް އަމަލުތައް ކުރާނެ ކަމާމެދު އުންމީދު ނުކުރައްވާ ކަމަށްވެސް ވިދާޅުވިއެވެ.

ރައްޔިތުން ތަހައްމަލު ކުރަމުންދަނީ ވަރަށް ހިތްދަތި، ވަރަށް ދަތި ދުވަސްތަކެއް. މި ހިނގާ ހުރިހާ ކަންތައްތަކަށް ބަލާއިރު ދިވެހިރާއްޖޭގެ ރައްޔިތުން ސާމްޕަލްއެއް ނަންގަވާ. މިވަގުތު 10 މީހުން ނެގިޔަސް، 10 މީހުންގެ ތެރެއިން 10 މީހުން ބުނާނެ ތިމަންނަމެން މިހާރު މިހިނގާ ސަރުކާރުން ކުރާ ކަންތައްތަކާއި ހިތްހަމައެއް ނުޖެހެއޭ، ހަރުގެ ޖަލްސާތަކުގަ އަޅުގަނޑު ފާޑު މިކިޔަނީކީ ރައީސް މުއިއްޒަކަށް ނޫން. ގައުމުގެ ކަންތައް ހިނގަމުންދާ ގޮތަށް." އެމަނިކުފާނު ވިދާޅުވިއެވެ.