އޭޑީބީން ރާއްޖެއަށް 21 މިލިއަން ޑޮލަރު ދެނީ

ހަސަން ހަލީމް

11 ނޮވެމްބަރ 2024 - 15:15

0 comments

މެނީލާގައި ހުންނަ އޭޑީބީގެ ހެޑްކުއާޓާސް.

މޫސުމަށް އަންނަ ބަދަލުތަކާ ދެކޮޅަށް ކުރާ މަސައްކަތްތަކާއި ކާބޯތަކެތީގެ ރައްކާތެރިކަން ކަށަވަރުކުރުމަށް ރާއްޖެއިން ކުރާ މަސައްކަތަށް 21.95 މިލިއަން ޑޮލަރު ދޭން އޭޝިއަން ޑިވެލޮޕްމަންޓް ބޭންކް (އޭޑީބީ)އިން ނިންމައިފި އެވެ.

އޭޑީބީން އިއުލާނުކުރި ޕެކޭޖުގައި ހިމެނެނީ ހަތަރު މިލިއަން ޑޮލަރުގެ ލުއި ލޯނަކާއި އެންމެ ފަގީރު އަދި ތަރައްގީވަމުން އަންނަ ގައުމުތަކަށް އެ ބޭންކުން ދޭ 17.95 މިލިއަން ޑޮލަރުގެ ހިލޭ އެހީއެކެވެ.

އެ ބޭންކްގެ އިކޮނަމިސްޓް މިޗިކޯ ކަޓަގަމި ވިދާޅުވީ، ރާއްޖޭގެ ގިނަ ރަށްތަކާއި އަތޮޅުތައް ހުންނަނީ ލޮނުގަނޑަށްވުރެ އެއް މީޓަރު އުހުގައި ކަމަށެވެ. އެހެންވެ، މޫސުމީ ބަދަލުތަކަށް ރާއްޖެއަކީ ވަރަށް ނާޒުކު ގައުމެއްކަން އޭނާ ފާހަގަކުރެއްވިއެވެ. އަދި، ކޮޅިގަނޑުތައް އިތުރުވުމުގެ ސަބަބުން މުސްތަގުބަލަށް ރާއްޖޭގެ ކާބޯތަކެތީގެ ރައްކާތެރިކަމާ މެދު ވެސް ކަންބޮޑުވުން ހުރިކަން އޭނާ ފާހަގަކުރެއްވިއެވެ.

އޭޑީބީން ބުނި ގޮތުގައި، މޫސުމީ ބަދަލުތަކާއި ކާބޯތަކެތީގެ ރައްކާތެރިކަން ކަށަވަރުކުރުމަށް ހިންގާ މި މަޝްރޫއުގެ ދަށުން:

މޫސުމީ ކާރިސާތަކާ ގުޅިގެން ދުރާލާ އިންޒާރުދިނުމަށް މާލެ އަދި އައްޑޫގައި ގާއިމުކޮށްފައިވާ ނިޒާމުތައް އަޕްގްރޭޑް ކުރެވިގެންދާނެ
މި ސިސްޓަމްތައް އަޕްގްރޭޑްކުރުމުން ރާއްޖޭގެ މޫސުމާ ބެހޭ ގައުމީ އިދާރާ (މެޓް)އަށް ރިއަލް ޓައިމްކޮށް މޫސުމާއި އާލީ ވާނިން ސިސްޓަމް މޮނިޓާ ކުރެވިގެންދާނެ
ހދ. ކުޅުދުއްފުށީގައި ދިމާވާ ފެން ބޮޑުވުމުގެ ހާދިސާތައް މެނޭޖުކުރުމަށް ފެން ހިންދުމާއި ފިލްޓަރޭޝަންގެ ނިޒާމު ގާއިމުކުރެވޭނެ
ރަށް ގިރުން ފަދަ ކަންކަން ހުއްޓުވުމަށް މަސައްކަތްތަކެއް ކުރެވިގެންދާނެ
ދިގު މުއްދަތަކަށް ކާބޯތަކެތީގެ ރައްކާތެރިކަން ކަށަވަރުކުރަން އެހީވުމުގެ ގޮތުން ކްލައިމެޓް ސްމާޓް އާބަން ފާމިން ޓެކްނޮލަޖީ ތައާރަފުކޮށް އައްޑޫ އަދި ހދ. އަތޮޅުގައި އެކަން ފަށާނެ

މީގެ އިތުރުން، މި ފައިސާއިން ކުޅުދުއްފުށި ސިޓީގައި ފެން ބޮޑުވުން ހައްލުކުރަން ފެން ހިންދާ ނިޒާމާއި ފިލްޓަރޭޝަން ނިޒާމު ގާއިމުކުރަން ވަނީ ނިންމާފައެވެ. އަދި، އެ ސިޓީގެ ކަނޑޫފާ ސަރަހައްދު އަލުން އާލާކޮށް، ގުދުރަތީ ވެށި ހިމާޔަތްކުރާނެ ކަމަށް ވެސް އޭޑީބީން ވަނީ ބުނެފައެވެ.