މުއިއްޒުގެ ވެރިކަމުގެ އެއް އަހަރު ތެރޭ ފެނުނީ އަމާޒެއް ނެތް ސަރުކާރެއް: ސޯލިހު

އައިމިނަތު ޝިޔާޒާ

17 ނޮވެމްބަރ 2024 - 12:46

0 comments

މި ސަރުކާރަށް އުއްމީދެއް، އަމާޒެއް ނެތް ކަމުގައި ކުރީގެ ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.

ރާއްޖެ ޓީވީއަށް ދެއްވި އިންޓަވިއުއެއްގައި އިބޫ ވިދާޅުވީ މި ސަރުކާރަށް މިއަދު އަހަރެއް ފުރޭއިރު ރައްޔިތުން ވައްޓާލާފައި ވަނީ މާޔޫސްކަމާއި ބިރުވެރިކަމެއްގެ ތެރެއަށް ކަމަށެވެ.

އިބޫ ވިދާޅުވި ގޮތުގައި ރައީސް މުއިއްޒު ވެރިކަމަށް ވަޑައިގެން، އެމަނިކުފާނު އެންމެ ފުރަތަމަ މަސައްކަތް ފެއްޓެވީ ނޫސްވެރިކަމާ ދެކޮޅަށެވެ. އަހަރަށް ވީއިރު އެމަނިކުފާނު ވަނީ ސަރުކާރުގެ ބާރުގެ ދަށަށް ނޫސްވެރިކަން ގެންދިއުމަށް ގާނޫނީ ގޮތުން މަސައްކަތް ފައްޓަވައިފައި ކަމަށް ވެސް ވިދާޅުވި އެވެ.

"އެއް އަހަރުވީއިރު މި އޮތީ ސަރުކާރުގެ ބާރުގެ ދަށަށް ނޫސްވެރިކަން ގެނައުމަށްޓަކައި ގާނޫނީ ގޮތުން އެ ބާރު ނެންގެވުމަށްޓަކައި މަޖިލީހަށް ބިލެއް ހުށަހަޅުއްވާފަ،" ރައީސް ސޯލިހް ވިދާޅުވި އެވެ.

އެ ބިލް ގާނޫނަކަށްވުމުން އުފައްދާ ކޮމިޝަންގެ މެޖޯރިޓީއަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅުން ގޮތުގައި ބިލްގައި އޮތްކަން ރައީސް ސޯލިހް ފާހަގަކުރެއްވި އެވެ.

"އެ ކޮމިޝަނަށް މީޑިއާއަކާ ބެހޭ ގޮތުން ކަމެއް ފާހަގަކުރެވިއްޖެނަމަ އެކަމެއް ބަލައި ނިމެންދެން މުޅި މީޑިއާ ސަސްޕެންޑްކޮށްފައިވެސް އެބަ އޮވޭ. މިއީ ޑިމޮކްރަސީއެއްގައި އެޅޭނެ އެންމެ އެންމެ ނުރައްކާތެރި އެއް ފިޔަވަޅު،" ރައީސް ސޯލިހް ވިދާޅުވި އެވެ.

ރައީސް ސޯލިހް ވަނީ ރައްޔިތުން ސިއްހީ ފަރުވާއަށް ސަލާންޖަހަން ޖެހިފައިވާ ކަމަށްވެސް ވިދާޅުވެފަ އެވެ.

ސަރުކާރުގެ ސިޔާސަތުގެ އަމާޒު ހުރީ ނާއުންމީދުކޮށް ކަމަށާއި ވައުދުތައް ނުފުއްދޭއިރު ސަރުކާރުން ދޮގު ހަދަމުންދާ ކަމަށް ރައީސް ސޯލިހް ވިދާޅުވި އެވެ.

"މިގޮތަށް ކުރިއަށްދާ ކަމަށްވަންޏާ ރައްޔިތުންނަށް ވަރަށް ދަތި އުނދަގޫ ދުވަސްތަކެއް ކުރިމަތިވާނެ،" ސޯލިހް ވިދާޅުވި އެވެ.

އެމަނިކުފާނު ވިދާޅުވީ ޓޫރިޒަމް ދާއިރާ އާއި ޓެކްސީ ޑްރައިވަރުންގެ ހާލަކީ ވެސް އެއީ ކަމަށާއި މިއަދު ރައްޔިތުން ސިއްހީ ފަރުވާ އަށް ސަލާން ޖަހަން ޖެހިފައިވާ ހާލަތަށް ހިނގައްޖެ ކަަމަށެވެ.

އެފަދަ ސަބަބުތަކާ ހުރެ ސަރުކާރުގެ ސިޔާސަތުތައް އޮތީ ނާއުއްމީދީކޮށް ކަމަށް ވިދާޅުވި އެވެ.

"މިހެން ގޮސް މުޅި ސަރުކާރުގެ ސިޔާސަތުގެ އަމާޒު ހުރި ގޮތުން އަޅުގަނޑު ދަންނަވާނީ ނާއުއްމީދު، އެއްވެސް ކަހަލަ، ވީ ވައުދާ ހިލާފު، އެތައް ދޮގުތަކެއްގެ މައްޗަށް ބިނާވެގެން ކުރިއަށްދާ ސަރުކާރެކޭ މިއީ،" އިބޫ ވިދާޅުވި އެވެ.

އެމަނިކުފާނު ވިދާޅުވި ގޮތުގައި އެ ގޮތަށް ސިޔާސަތުތައް ބައްޓަންކޮށްގެން ކުރިއަށްދާ ނަމަ، މި ސަރުކާރުގެ ސަބަބުން ރައްޔިތުންނަށް ކުރިމަތިވާނީ ވަރަށް ދަތި އުނދަގޫ ދުވަސްތަކެކެވެ.