ކުރިއަށް އޮތް ފަސް ދުވަހު ވިއްސާރަކުރާނެ: މެޓް

އަލީ ރާޒީ

18 ނޮވެމްބަރ 2024 - 12:19

0 comments

ހެނދުނުން ފެށިގެން މާލެއަށް ބޯކޮށް ވެހެމުން އަންނަ ވާރޭގައި މަގުތަކުގައި ވަރަށް ބޮޑަށް ފެންބޮޑުވެއްޖެއެވެ.

ރާއްޖެއަށް މިއަދު ބޯކޮށް ވާރޭވެހޭނެ ކަމަށް ލަފާކޮށްފައިވާއިރު ކުރިއަށް އޮތް ފަސް ދުވަހުވެސް ވިއްސާރަކުރާނެ ކަމަށް ލަފާކުރެވޭ ކަމަށް މެޓް އޮފީހުން ބުނެ އެވެ.

ރާއްޖޭގެ ބައެއް ސަރަހައްދުތަކަށް މިއަދު ބޯކޮށް ވާރޭވެހޭނެ ކަމަށް ލަފާކޮށް މިހާރު ވަނީ ވައިޓް އެލާޓް ނެރެފަ އެވެ.

މެޓުން ބުނި ގޮތުގައި ރާއްޖެ ހުޅަނގު މޫސުން ނިމި، އިރުވައި މޫސުން ފެށޭ ދުވަސް ވަރާ ދިމާކޮށް އުފެދިފައިވާ ލޯ ލެވެލް ސާކިއުލޭޝަންގެ ސަބަބުން ފާއިތުވި 24 ގަޑިއިރުގެ ތެރޭގައި ރާއްޖޭގެ ބޮޑު ބަޔަކަށް ވިއްސާރަކޮށް، ބައެއް ރަށްތަކަށް ވަރަށް ބޯކޮށް ވާރޭވެހުނު ކަމަށެވެ.

އެގޮތުން ފާއިތުވި 24 ގަޑިއިރު ތެރޭގައި ދެވަނަ އަށް އެންމެ ގިނައިން ވާރޭވެހުނީ އައްޑޫ ގަމަށެވެ. އެއީ 106.5 މިލިމީޓަރުގެ ވާރޭ އެވެ. ދެން އެންމެ ގިނައިން ވާރޭ ވެހުނީ އއ. ތޮއްޑުއަށެވެ. އެއީ 103.3 މިލިމީޓަރުގެ ވާރޭ އެވެ.

މެޓުން ބުނި ގޮތުގައި ކުރިއަށް އޮތް ތިން ދުވަހު ވެސް ރާއްޖެ ސަރަހައްދަށް މޫސުން ގޯސްވާނެ އެވެ.