މީޑިއާ ކޮންޓްރޯލް ބިލް އަނބުރާ ގެންގޮސްފި

މަރިޔަމް އަނާ

26 ނޮވެމްބަރ 2024 - 13:27

0 comments

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު ހުށަހެޅުއްވި ބިލު އަނބުރާ ގެންދިޔަކަން ރަސްމީކޮށް މަޖިލީހުގައި މިއަދު އިއުލާނުކޮށްފި އެވެ.

މި ބިލަކީ މީޑިއާތަކުގެ ކޮންޓްރޯލް ސަރުކާރަށް ލިބޭ އަދި ނޫސްވެރިންނާއި މީޑިއާތައް ޖޫރިމަނާ ކުރެވޭ ގޮތަށް ހުށަހެޅި ބިލެކެވެ. ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.

މި ބިލު ރައްޔިތުންގެ މަޖިލީހުން ބޭރުކޮށްލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވަނިކޮށް ހަންނާން ވަނީ ބިލު އަނބުރާ ގެންދިއުމަށް ހުށަހަޅާފަ އެވެ. ހަންނާން ވިދާޅުވެފައި ވަނީ ސަރުކާރުގެ މެޖޯރިޓީ ބޮޑުކޮށް އޮތް މަޖިލީހުން ބިލު ބޭރުކޮށްލާނެ ކަމަށް ބުނެފައިވާތީ، ކުރިއަށް ނުދާނެ ބިލެއް ބޭއްވުމުގެ ބޭނުމެއް ނެތް ކަމަށެވެ.

މަޖިލީހުގެ މިއަދުގެ ޖަލްސާ ފައްޓަވަމުން، ރިޔާސަތުން ވަނީ މި ބިލު އަނބުރާ ގެންގޮސްފައިވާކަން އިއުލާނު ކޮށްފަ އެވެ.

މީޑިއާތަކުގެ ބޮޑު ކަންބޮޑުވުމެއް އޮތް ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

އޭގެ އިތުރުން މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ބިލުގައި ބުނެފައިވެ އެވެ.

މީޑިއާތަކުން ނުރުހުން ފާޅުކުރަމުން ދަނީ މީޑިއާތަކުގެ މިނިވަންކަން ގެއްލި، ސަރުކާރުން ކޮންޓްރޯލް ނަގާފާނެތީ އެވެ. އެ ބިލާ ދެކޮޅަށް ނޫސްވެރިންގެ ހައްގުގައި މަސައްކަތްކުރާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިސް ނަގައިގެން "ހަތަރެއްގެ ހައްގުގައި" ނަމުގައި ކެމްޕެއިނެއް ވެސް ފެށި އެވެ.