މީޑިއާ ކައުންސިލުގެ ރައީސްއަކަށް ސަގީފް

އަލީ ރާޒީ

16 ޑިސެމްބަރ 2024 - 20:54

0 comments

މީޑިއާ ކައުންސިލްގެ ރައީސަކަށް އިންތިހާބުކުރި ހުސައިން ސަގީފް

މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސްކަމުގެ މަގާމަށް ހުސައިން ސަގީފް އިންތިހާބުކޮށްފި އެވެ.

ރައީސް ކަމުގެ މަގާމަށް ސަގީފް އިންތިހާބުވީ މީޑިއާ ކައުންސިލް މެންބަރުންގެ މެދުގައި މިއަދު ނެގި ވޯޓުން ކުރި ހޯއްދައިގެންނެވެ. ސަގީފް އާ ވާދަކުރީ މިހާރު ނޫހުގެ ޝަނާ އެވެ.

ޝަނާގެ މައްޗަށް ސަގީފް ކުރި ހޯދީ އެންމެ ވޯޓެއްގެ ތަފާތުންނެވެ. ޝަނާއަށް ލިބުނީ ހަތް ވޯޓެވެ. ސަގީފްއަށް ލިބުނީ އަށް ވޯޓެވެ.

މީޑިއާ ކައުންސިލުގެ އައު ދައުރަށް މެންބަރުން އިންތިހާބު ކުރުމަށް ބޭއްވި ވޯޓަށްފަހު އެ ކައުންސިލުގެ ރައީސް އާއި ނައިބު ރައީސް ހޮވަން ވޯޓުލީ އިއްޔެ އެވެ. ރައީސްއަކު ހޮވަން ދެވަނަ ވޯޓަކަށް ދާން ޖެހުނީ އިއްޔެ ނެގި ވޯޓު ހަތް ވޯޓު ކޮންމެ ކޮޅަކަށް ލިބި އެއްވަރުވުމުންނެވެ.

މިއަދު އަލުން ރައީސްކަމުގެ މަގާމުގެ ވޯޓު ވަނީ ކުރިއަށް ގެންގޮސްފަ އެވެ. އެ ވޯޓުގައި ރައީސް ކަމަށް ސަގީފް އިންތިހާބުވީ އަށް މެންބަރުންގެ ވޯޓާއެކު އެވެ. އަދި ޝަނާއަށް ލިބުނީ ހަތް ވޯޓެވެ.

އިއްޔެގެ ވޯޓުގައި ނައިބު ރައީސް ކަމަށް ވާދަކޮށް، އެ މަގާމަށް އިންތިހާބުވީ އަމިއްލަ މެންބަރު އިބްރާހިމް މުހައްމަދެވެ.

މީޑިއާ ކައުންސިލްގައި ތިބެނީ މީޑިއާތަކުން 8 ނޫސްވެރިއަކާއި އަމިއްލަ ގޮތުން 7 މީހަކާ އެކު ޖުމްލަ 15 މީހެކެވެ. އެ ކައުންސިލްގެ ދައުރަކީ ދެ އަހަރެވެ.