ގަވައިދަކަށް އެއްވެސް ބަދަލެއް ނާދޭ ނޫސްތަކުން އެވަނީ އޮޅުވާލާފައި: ގަވަރުނަރު

ގަވައިދަކަށް އެއްވެސް ބަދަލެއް ނާދޭ، ނޫސްތަކުން އެވަނީ އޮޅުވާލާފައި: ގަވަރުނަރު

އަހުމަދު ނިހާން

27 ނޮވެމްބަރ 2024 - 15:28

0 comments

ބޭންކިން ނިޒާމުގެތެރެއަށް ޑޮލަރު މާރުކުރަންޖެހޭ ގަވާއިދަށް އެއްވެސް ބަދަލެއް ނާންނަ ކަމަށާއި ނޫސްތަކުން އެވަނީ އެކަން އޮޅުވާލާފައި ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.

ގަވަރުނަރު މިހެން ވިދާޅުވީ، ރާއްޖެ އަންނަ ފަތުރުވެރިންގެ ބޮލަކަށް 500 ޑޮލަރު މާރުކުރަން ލާޒިމްކޮށް އެކުލަވާލި ގަވާއިދަށް ބަދަލު ގެނައީކަމަށް ދެކެވޭ ވާހަކަތައް ދޮގުކުރައްވާ ދެއްކެވި ވާހަކަފުޅުގަ އެވެ.

އެމްއެމްއޭ އިން "ބޭރު ފައިސާއާބެހޭ ބިލް"ގެ ނަމުގައި ގާނޫނެއް އެކުލަވާލުމަށްޓަކައި، އާންމުންގެ ހިޔާލަށް ރޭ ހުޅުވައިލުމުން، މިހާރު އޮތް ގަވާއިދުގެ ދަށުން ބޭންކުތައް މެދުވެރިކޮށް މާރުކުރަންޖެހޭ ޑޮލަރުގެ އަދަދުތަކަށް ލުއިތަކެއް ދީފައިވާ ކަމުގެ އަޑުތައް ފެތުރުނެވެ.

އެކަމާ ގުޅިގެން އެމްއެމްއޭ އިން ބޭއްވި ނޫސްވެރިންގެ ބައްދަލުވުމެއްގައި ގަވަރުނަރު ވިދާޅުވީ މިހާރު އޮތް ގަވާއިދަށް ގާނޫނީ ބާރު ދިނުމަށް ގާނޫނެއް އެކުލައިލުން ފިޔަވައި، އެއްވެސް ލުޔެއް ދީފައެއް ނުވާނެ ކަމަށެވެ.

މުނައްވަރު ވިދާޅުވީ ގަވައިދުގައިވާ ގޮތަށް ޑޮލަރު މާރުކުރުމުގެ ކަންކަން ކުރިއަށް ގޮސްފިނަމަ ރައީސް ޑރ. މުހައްމަދު މުއިއްޒު ވިދާޅުވި ގޮތަށް އެކި ބޭނުންތަކަށް މިހާރު އާންމުންނާއި ވިޔަފާރިވެރިންނަށް ލިބޭ ޑޮލަރުގެ ނިސްބަތް އިތުރުކުރެވި ކަޅު ބާޒާރުން ޑޮލަރު ހޯދަންޖެހޭ މައްސަލައަށް ލުއިތަކެއް ލިބޭނެ ކަމަށެވެ.

"ހަގީގަތުގައި ގަވައިދަކަށް ނާދޭ އެއްވެސް ބަދަލެއް. ނޫސްތަކުން މިއަދު އެކަން އެވަނީ ވަރަށް ބޮޑަށް އޮޅުވާލާފައި،" ގަވަރުނަރު ވިދާޅުވި އެވެ.

ގަވަރުނަރު ވަނީ ރާއްޖެއިން ބޭރަށް ފުރާ ކޮންމެ ދިވެއްސަކަށް ދޭ ޑޮލަރަކީ ބީއެމްއެލުން ދޭ ޑޮލަރު ނޫންކަމާއި، އެއީ ދައުލަތުގެ ރިޒާވުން ދޭ ޑޮލަރުކަން ފާހަގަކުރައްވާފައެވެ. އަދި ރައީސް ވިދާޅުވިފަދައިން ބޭރަށް ފުރާ މީހުންނަށް ދޭ ޑޮލަރު އިތުރުކުރެވޭނީވެސް މި ގަނޫނާއި ގަވާއިދަށް އަމަލުކޮށްގެންކަމަށްވެސް ގަވަރުނަރު ވިދާޅުވި އެވެ.

ގަވަރުނަރު ވިދާޅުވީ ބޭރު ފައިސާ މާރުކުރުމުގެ ޤާނޫނެއް އެކުލަވާލަނީ އެކަމާ ގުޅިގެން ހެދި ގަވާއިދަށާއި އެމްއެމްއެމްއޭއަށް މިހާރު ނެތް އަދި ލިބެންޖެހޭ ބާރުތަކެއް ހޯދުމަށްކަމަށެވެ. ގަވަރުނަރު ވަނީ ޑޮލަރު މާރުކުރަންޖެހޭ ގޮތަށް އެކުލަވާލި ޤަވާއިދަށް ބަދަލު ނުގެންކަން ތަކުރާރުކުރައްވާފައެވެ. ހަމައެކަނި އެ ގަވައިދަށް ގެނައި ބަދަލަކީ ފަތުރުވެރި ނޫން ކެޓަގަރީއެއް އިތުރުކުރުންކަަމަށްވެސް ގަވަރުނަރު އަހުމަދު މުނައްވަރު ވިދާޅުވިއެވެ.

ގަވަރުނަރު ވިދާޅުވީ، ރާއްޖޭގެ ޓޫރިޒަމް ދާއިރާއަށް އަހަރަކު ހަތަރު ބިލިއަން ޑޮލަރު ވަންނަ އިރު، ދައުލަތުގެ ރިޒާވް އިތުރު ނުވަނީ ކީއްވެތޯ އެތައް ބަޔަކު ސުވާލުކުރާ ކަމަށެވެ.

"ރިޒާވް އިތުރު ކުރުމަކީ އެމްއެމްއޭގެ ގާނޫނީ ޒިންމާއެއް. އެ މަސައްކަތް އަޅުގަނޑުމެން މި ކުރަނީ،" އޭނާ ވިދާޅުވި އެވެ.

އެމްއެމްއޭއިން އާންމުކުރި ގަވާއިދަށް ޓޫރިޒަމް ދާއިރާގެ ބޮޑެތި ބައެއް ވިޔަފާރިތަކުން ވަނީ ދެކޮޅު ހަދައިފަ އެވެ. އަދި އެ ގަވައިދުގައި ބުނާ ގޮތަށް އަމަލު ނުކުރެވޭނެ ކަމަށް ވެސް ވަނީ ބުނެފަ އެވެ. ނަމަވެސް، ރައީސް ޑރ. މުހައްމަދު މުއިއްޒު ވަނީ އެ ކަންބޮޑުވުންތައް ހުރި ނަމަވެސް ގަވައިދު ބަދަލުނުކުރައްވާނެ ކަމަށް މީގެ ކުރިން ފާޅުގައި ވިދާޅުވެފަ އެވެ.

އެ ބިލާ ގުޅޭގޮތުން ނޫސްވެރިންގެ ބައްދަލުވުމުގެ ތެރެއިން ނޫސްވެރިންނާ ހިއްސާކުރި ޕްރެޒެންޓޭޝަންގައި ބުނީ، ކެޓަގަރީ "އޭ" ގައި ހިމެނޭ، ރިސޯޓުތަކާއި ހޮޓާތަކާއި ޓޫރިސްޓް އުޅަނދުތައް ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޑޮލަރު މާރުކުރަން ލާޒިމްވެ އެވެ. އަދި ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

އެއީ މިހާރު އޮތް ގަވާއިދުގައި ވެސް ހިމަނާފައި އޮތް އަދަދުތަކެވެ.