ދަރުމަވަންތަ ހޮސްޕިޓަލާ ދިމާ މޫދުން، އަނިޔާވެފައި އޮއްވައި ފެނުނު މީހާ މަރުވެއްޖެ

މަރިޔަމް އަނާ

27 ނޮވެމްބަރ 2024 - 19:03

0 comments

އަނިޔާވި މީހާ މޫދުން ނަގަނީ - ފޮޓޯ: ޖައިލަމް

ދަރުމަވަންތަ ހޮސްޕިޓަލާ ދިމާ ބޭރު ތޮށި މޫދުން އަނިޔާވެފައި އޮއްވައި މިއަދު ފެނުނު މީހާ މަރުވެއްޖެއެވެ.

އައިޖީއެމްއެޗްގެ ޑޮކްޓަރުންނާ ހަވާލާދީ ފުލުހުން ބުނީ މޫދުން ފެނުނު މީހާގެ ބޮލަށް އަނިޔާވެފައިވާ ކަމަށާއި މި މީހާގެ ބޮލުގައި އުޅަނދަކުން ޖެހިފައިވާ ކަމަށެވެ. އަދި ފަރުވާ ދެމުން ދަނިކޮށް އޭނާ މަރުވެފައިވާ ކަމަށް ފުލުހުން ދެންމެ ބުންޏެވެ.

އޭނާ އަށް އަނިޔާވީ، ތޮށިގަނޑާ ދިމާލުން ދުއްވާފައި ދިޔަ "އުޅަނދެއް" ގައި ޖެހިގެން ކަމަށް ބެލެވޭ ކަމަށް ފުލުހުން ބުނެފައިވެ އެވެ.

އުމުރުން 55 އަހަރުގެ މީހާ މޫދަށް އެރި އުޅުނު ސަރަހައްދުގައި ލޭންޑިން ކްރާފްޓެއް އޮތެވެ. މައުލޫމާތު ލިބިފައިވާ ގޮތުގައި އެމީހާއަށް އަނިޔާވީ އެ ލޭންޑިން ކްރާފްޓް އޭނާގެ ގައިމަތިން ދިޔުމުންނެވެ.

އަނިޔާވެފައި އޮއްވާ ފެނުނު މީހާ މޫދުން ނަގާ މަންޒަރުގެ ވީޑިއޯ މިހާރު ވަނީ ސޯޝަލްމީޑިއާގައި އާންމުކޮށްފަ އެވެ. ވީޑިއޯ އިން ފެންނަ ގޮތުގައި އެމީހާ މޫދުން ނަގައިގެންދާއިރު އެއްވެސް ހަރަކާތެއް ނެތެވެ.

އެ ސަރަހައްދަކީ އާއްމުކޮށް މީހުން މޫދަށް އެރި އުޅޭ ސަރަހައްދެއް ނޫނެވެ. މި މައްސަލަ ފުލުހުން ދަނީ ތަހުގީގުކުރަމުންނެވެ.