މަޝްހޫރު ވިޔަފާރިވެރިޔާ ކުވާ މޮހޮދޭ ނިޔާވެއްޖެ

އައިމިނަތު ޝިޔާޒާ

06 ނޮވެމްބަރ 2024 - 14:36

0 comments

ކުރީގެ މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) މިއަދު ނިޔާވެއްޖެ އެވެ.

މޮހޮދޭއަކީ ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އާއި ކުރީގެ ކޮމިޝަނާ ޖެނެރަލް އޮފް ކަސްޓަމްސް މާނިއު ޔޫސުފް އަދި ކުރީގެ އިމިގްރޭޝަން ކޮންޓްރޯލަރ ޑރ. އިބްރާހިމް ޝާފިއުގެ ބައްޕަ ވެސް މެ އެވެ.

މުހައްމަދު ޔޫސުފް ނިޔާވުމާއި ގުޅިގެން ރައީސުލްޖުމްހޫރިއްޔާ ވަނީ ތައުޒީޔާ ދަންނަވާފަ އެވެ. ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ހަޔަރ އެޑިޔުކޭޝަން މިނިސްޓަރު، ޑރ. މަރްޔަމް މާރިޔާގެ ލޮބުވެތި ބައްޕާފުޅު މުހައްމަދު ޔޫސުފް އަވަހާރަވި ހަބަރު އަޑުއެހީ ފުން ހިތާމައާއިއެކުގައިކަމަށެވެ.

އާއިލާއަށް ތައުޒިޔާ ފޮނުއްވައި، ރައީސް ޑރ. މުހައްމަދު މުއިއްޒު ސޯޝަލް މީޑިއާގައި ކުރެއްވި ޕޯސްޓުގައި ވިދާޅުވީ މޮހޮދޭއަކީ ވިޔަފާރީގެ ދާއިރާއިން ބޮޑެތި ހިދުމަތްތަކެއް ކޮށްދެއްވައި އާއްމުންނާއި ޖަމާއަތްތަކަށް ދަރުމަވެރި އެތައް އެހީތަކެއް ފޯރުކޮށްދެއްވާފައިވާ އިހުސާންތެރިއެއް ކަމަށެވެ.

މޮހޮދޭގެ އާއިލާ އިން ބުނީ އުމުރުން 75 އަހަރުގައި އޭނާ ނިޔާވީ އައިޖީއެމްއެޗްގެ އައިސީޔޫގައި ފަރުވާ ހޯއްދަވަމުން ގެންދަވަނިކޮށް ކަމަށެވެ. މޫނު ދެއްކުމާއި ކަށުނަމާދު އޮންނާނީ އިޝާ ނަމާދަށްފަހު އިސްލާމީ މަރުކަޒުގަ އެވެ.

ފުޅާދާއިރާއެއްގައި ޝިޕިންގެ ވިޔަފާރި ކުރެއްވި މުހައްމަދު ޔޫސުފްއަކީ، 1970ގެ އަހަރުތަކުގައި ރާއްޖެއިން ފާހަގަކުރެވުނު އެންމެ ތަނަވަސް ބޭފުޅުންގެ ތެރޭގައި ހިމެނިވަޑައިގެންނެވި ބޭފުޅެކެވެ.
މޮހޮދޭ ވަނީ ކޮލެރާ ފެތުރުނު ދުވަސްވަރު ރާއްޖެ އިން ބޭރުން އަމިއްލަ ހަރަދުގައި ޑޮކްޓަރުންނާއި ބޭސް ގެނެސް ދިވެހިންނަށް ފަރުވާ ކުރެވޭނެ ގޮތް ހަމަޖައްސަވައި ދެއްވައިފަ އެވެ.