އަންނަ އަހަރު މާޗް މަހު ހެލިކޮޕްޓަރު އޮޕަރޭޓް ކުރަން ފަށަނީ

އަހުމަދު ނިހާން

27 ނޮވެމްބަރ 2024 - 19:11

0 comments

ރާއްޖޭގައި ކުރީން އޮޕަރޭޓް ޖުރި ހަމިންބާޑް ހެލްކޮޕްޓަރެއް:

"ހެލްކޮޕްޓަރު ސާވިސް" ގެ ހިދުމަތް ފެށުމަށް އެ ހިދުމަތް ދޭ ކުންފުންޏާއެކު ވަރަށް އަވަހަށް ސޮއިކުރާނެ ކަމަށާ އަންނަ އަހަރުގެ މާޗު މަހު އެ ހިދުމަތް ރަސްމީކޮށް ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

ދައުލަތުގެ މީޑިއާގައި ވާހަކަ ދައްކަވަމުން މިނިސްޓަރު އަމީން ވިދާޅުވީ "ހެލްކޮޕްޓަރު ސާވިސް" ގެ ހިދުމަތް ފެށުމަށް އެ ހިދުމަތް ދޭ ކުންފުންޏާއެކު ކުރިއަށް އޮތް ދެ ހަފްތާގެ ތެރޭގައި ސޮއި ކުރާނެ ކަމަށެވެ. ހިދުމަތް ދިނުމަށް ޝައުގުވެރިކަން ފާޅުކޮށް 32 ކުންފުންޏަކުން ހުށައަޅާފައިވާ ކަމަށް އަމީން ވިދާޅުވި އެވެ.

އަދި ވިދާޅުވީ އެ ހިދުމަތް ރާއްޖޭގަައި ފަށާނީ އަންނަ މާޗު މަހު ކަމަށާ ހިދުމަތް ފަށާނީ ހުރިހާ ގޮތަކުން ރައްކާތެރިކަން ކަށަވަރު ކޮށް އެންމެ ފުރިހަމަ މިންގަނޑުގައި ކަމަށެވެ.

ހެލްކޮޕްޓަރުގެ ހިދުމަތް ފަށާއިރު ރާއްޖޭގެ ތާރީހުގައި ފުރަތަމަ ފަހަރަށް ގައުމީ ހިދުމަތްތަކެއްގެ ގޮތުގައި ވައިގެ މަގުން ދިވެހި ރައްޔިތުން އުފުލުމުގެ ހިދުމަތް ފަށާފައިވަނީ މާޗް މަހުގެ އެއްވަނަ ދުވަހު އެވެ.

މޯލްޑިވިއަން އިން މި ހިދުމަތް ފެށީ ޑޯނިޔާ މަތިންދާ ބޯޓެއް ބޭނުންކޮށްގެންނެވެ. މި ބޯޓުގައި އެއްފަހަރާ ބަލި މީހުންގެ ދެ މީހުން އުފުލޭނެ އެވެ. އަދި ސީޕްލޭނެއް ވެސް ވަނީ ފްލީޓަށް އިތުރުކޮށްފައެވެ.

ހެލިކޮޕްޓަރުގެ ހިދުމަތް ދޭން ނިންމާފައިވަނީ ކުއްލި ހާލަތްތަކުގައާއި އިމަޖެންސީގައި ހިދުމަތް ދިނުމަށާއި އަދި ފަތުރުވެރިކަމުގެ ދާއިރާގައިވެސް މަސައްކަތް ކުރާ ގޮތަށް ކަމަށެވެ. އެގޮތުން 10 އަހަރު ދުވަހުގެ މުއްދަތަށް މިއެއްބަސްވުމުގެ ދަށުން މަސައްކަތް ކުރެވޭނެ ކަމަށް ޓްރާންޕޯޓް މިނިސްޓްރީން މީގެ ކުރިން ބުނެފައިވެ އެވެ.

މާޗް މަހު އޮތް ރަސްމިއްޔާތެއްގައި ރައީސް މުއިއްޒު ވިދާޅުވީ މި އަހަރު ނިމުމުގެ ކުރީން "ހެލްކޮޕްޓަރު ސާވިސް" ފައްޓަވާނެ ކަމަށެވެ.

ރާއްޖޭގައި މީގެ ތޭވީހަކަށް އަހަރު ކުރީން ވެސް ހެލްކޮޕްޓަރުގެ ހިދުމަތް ދިނެވެ. ހަމިންބާޑް އައިލެންޑް އެއާވޭސް ކުންފުނިން ދެމުން ދިޔަ އެ ހިދުމަތް ހުއްޓާލަން ޖެހުނީ ހެލްކޮޕްޓަރު ވެއްޓުމުގެ ދެ ހާދިސާއެއް ހިނގާ ގިނަ ބަޔަކު މަރުވުމާއި ގުޅިގެންނެވެ.