އެންސްޕާ ހިންގަން ނެގި އިމާރާތުގައި ޓީވީއެއް ހިންގާތީ ހުށަހެޅި ކުއްލި މައްސަލަ ބޭރުކޮށްލައިފި

އަހުމަދު ނިހާން

02 ޑިސެމްބަރ 2024 - 12:24

0 comments

"އެމްއެމް ޓީވީ" ގެ ނަމުގައި މިދިޔަ ހަފުތާގައި އިފުތިތާހުކުރި ޗެނަލް ހިންގާ ކުންފުނިން ކުއްޔަށް ދޫކުރާ ފްލޯތަކެއްގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގަން އެވޯޑްކުރި މައްސަލާގައި ރައްޔިތުންގެ މަޖިލިހަށް އިދިކޮޅުން ހުށަހެޅި ކުއްލި މައްސަލަ އެޖެންޑާގައި ނުހިމަނަން ނިންމައިފި އެވެ.

މީކާއީލް ހުށަހެޅުއްވި ކުއްލި މައްސަލައިގައި ބުނަނީ އެންސްޕާގެ އޮފީސް ހިންގުމަށް އިމާރާތެއް ކުއްޔަށް ނެގުމަށް މި އަހަރުގެ ޖޫން 25 ވަނަ ދުވަހު ނެޝަނަލް ޓެންޑާ ބޯޑު މެދުވެރިކޮށް އިއުލާނުކުރި ކަމަށެވެ.

މީކާއިލްގެ މައްސަލާގައި ވިދާޅުވެފައި ވަނީ އެންސްޕާ އޮފީސް ހިންގުމަށްޓަކައި އޮފީސް އިމާރާތެއް ކުއްޔަށް ނެގުމަށް ޖޫން 25، 2024 ގައި ނޭޝަނަލް ޓެންޑާ ބޯޑް މެދުވެރިކޮށް ކޮށްފައިވާ އިއުލާނަކާ ގުޅިގެން ބިޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ޕްރައިވެޓް ލިމިޓެޑަށް ބިޑް އެވޯޑް ކޮށްފައިވާ ކަމަށެވެ.

އެ އިމާރާތުގެ ހަތަރު ފްލޯއެއް ފަސް އަހަރު ދުވަހުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށް ފަހު، އޭގެ ތެރެއިން ދެ ފްލޯ އެމްއެމްޓީވީ ހިންގުމަށްޓަކައި ކުއްޔަކާ ނުލައި ދީފައިވާ ކަމަށް ސޯޝަލް މީޑިއާގައި ތުހުމަތުތަކެއް ކުރަމުންދާ ކަަމަށް މީކާއިލް ވިދާޅުވެފައިވެ އެވެ.

މޯލްޑިވްސް މިޑިއާ ހައުސް ޕްރައިވެޓް ލިމިޓަޑަކީ މީޑިއާގެ މަސައްކަތް ކުރުމަށް އުފައްދާފައިވާ ކުންފުންޏެއް ކަން އެ ކުންފުނީގެ ނަމުން ވެސް އެކަން ދޭހަވާއިރު އެންސްޕާ އަށް އޮފީހެއް ކުއްޔަށް ނެގުމާ ގުޅޭ ބިޑު މީޑިއާ ކުންފުންޏަކާ ހަވާލު ކުރުމުން ވެސް އެ މުއާމަލާތާ މެދު ޝައްކު ކުރެވޭ ކަމަށް މީކާއިލް ވިދާޅުވި އެވެ.

"...އޭގައި ހަގީގަތެއް އެކުލެވިގެންވާ ނަމަ އޭގެ މާނައަކީ އެންސްޕާ އޮފީސް ހިންގުމަށްޓަކައި ދައުލަތުގެ ބަޖެޓުން ހޭދަ ކުރާ ފައިސާގެ ބައެއް އެމްއެމްޓީވީ ހިންގުމަށްޓަކައި ހޭދަވަމުންދާ ކަން،" ކުއްލި މައްސަލާގައި ވިދާޅުވެފައިވެ އެވެ.

މިއަދުގެ ޖަލްސާ ފައްޓަވަމުން ރިޔާސަތުގައި އިންނަވައި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ކުއްލި މައްސަލައެއް ލިބިފައިވީ ނަމަވެސް އެ މައްސަލައިގެ ޝަރުތު ހަމަނުވާތީ ބަލައިގަނެވެން ނެތް ކަމަށް ނިންމަވާފައިވާ ކަމަށެވެ.