ރާއްޖެ ބަނގުރޫޓުވުމުގެ ވާހަކަ ހުއްޓިއްޖެ: ޒަމީރު

އަލީ ރާޒީ

03 ޑިސެމްބަރ 2024 - 12:17

0 comments

ރާއްޖެ ދަރަނިވެރިވުމަށް އޮތް ހާލަތުން އަރައިގަނެވިފައިވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން ޒަމީރު ވިދާޅުވީ، ވެރިކަމާ ހަވާލުވި އިރު 124 ބިލިއަން ރުފިޔާގެ ދަރަނި އޮތް ކަމަށާއި އޭގެ ތެރެއިން ގާތްގަނޑަކަށް 50 ޕަސެންޓަކީ މިދިޔަ ފަސް އަހަރުގެ ދަރަނި ކަމަށެވެ. އޭނާ ވިދާޅުވީ ލިބޭ އާމްދަނީގެ 24 ޕަސެންޓު ދަރަންޏަށް ހޭދަކުރަން ޖެހޭ ކަމަށެވެ.

މޫސާ ޒަމީރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރެއްވި މަސައްކަތުން އެ ހާލަތުން ރާއްޖެ އަރައިގަނެފައިވާ ކަމަށެވެ.

"އެކަމަކު މިހާރު ރައީސް އެ ސިނާރިއޯއިން އިރާދަކުރެއްވިއްޔާ ރާއްޖެ ނެރެ ރިވެނިއު ސްޓްރީމްތައް ރަނގަޅުކޮށް އަދި އޭގެއިތުރުން ހަރަދުތައް ރޭޝަނަލައިޒްކޮށް ހަމަ އެއާއެއްކޮށް އަޅުގަނޑުމެން ދައްކަންޖެހޭ ބައެއް ދަރަނިތަކުގެ މުއްދަތުތައް އިތުރުކޮށް ބައިލެޓްރަލީ މަސައްކަތް ކުރައްވައިގެން ރަހުމަތްތެރި ގައުމުތަކާއެކު މަސައްކަތް ކުރައްވައިގެން އެ ހުރިހާ ކަމެއް މިހާރު ހުރީ ހަމަޖެހިފައި،" ޒަމީރު ވިދާޅުވި އެވެ.

މިނިސްޓަރު ޒަމީރު ވިދާޅުވީ ވިދާޅުވީ ރާއްޖެ ދަރަނިވެރިވާ ވާހަކަ ދެއްކުން މިހާރު ހުއްޓިފައިވާ ކަމަށާއި ރޭޓިން އެޖެންސީތަކުން މިހާރު ލަފާ ދެމުންދަނީ ހަރަދު ކުޑަކުރުމަށް ކަމަށެވެ.