އެންޓި ކޮރަޕްޝަން ކޮމިޝަނަށް ކުރިމަތިލުމުގެ ފުރުސަތު ހުޅުވާލައިފި

އަހުމަދު ނިހާން

08 ޑިސެމްބަރ 2024 - 13:17

0 comments

އެންޓި ކޮރަޕްޝަން ކޮމިޝަން (އޭސީސީ) ގެ ހުސްވެފައިވާ ދެ މަގާމަށް ކުރިމަތިލުމުގެ ފުރުސަތު ހުޅުވާލައިފި އެވެ.

ރައީސް އޮފީހުން މިއަދު ކުރި އިއުލާނެއްގައި ބުނީ އެ ކޮމިޝަންގެ ދެ މެންބަރަކު އިސްތިއުފާ ދެއްވާފައިވާތީ، ހުސްވެފައިވާ ދެ މަގާމަށް ކުރިމަތިލުމުގެ ފުރުސަތު މި މަހުގެ 16 ވަނަ ދުވަހުގެ މެންދުރު 12:00 އާ ހަމައަށް ހުޅުވާލާފައިވާ ކަމަށެވެ.

އޭސީސީގެ މެންބަރުކަމުން އިސްތިއުފާ ދެއްވާފައިވަނީ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ތޯހާ މުހައްމަދެވެ.

އޭސީސީގައި މެންބަރުންގެ ގޮތުގައި މިވަގުތު ތިއްބެވީ އެ ކޮމިޝަންގެ ރައީސް އާދަމް ޝާމިލާއި މެންބަރުން ކަމަށްވާ ޝިޔާމާ މުހައްމަދުގެ އިތުރުން ޝަޒްނާ ހާޝިމެވެ.

އޭސީސީއާއި އީސީގެ ރައީސް އާއި ނައިބް ރައީސް އަކީ ރައީސުލްޖުމްހޫރިއްޔާ އައްޔަންކުރައްވާ މަގާމުތަކެއްގެ ގޮތުގައި ހެދުމަށް އެ މުއައްސަސާގެ ގާނޫނުވެސް މިހާރު ވަނީ އިސްލާހުކޮށްފަ އެވެ. ނަމަވެސް މި އިސްލާހާ އެއްގޮތަށް އަދި އޭސީސީއާއި އީސީގެ ރައީސް އައްޔަންކޮށްފައެއް ނުވެ އެވެ.