އޭސީސީގެ މެންބަރުކަމުގެ މަގާމަށް ކުރިމަތިލުމުގެ ފުރުސަތު އަލުން ހުޅުވާލައިފި

‎އޭސީސީގެ މެންބަރުކަމުގެ މަގާމަށް ކުރިމަތިލުމުގެ ފުރުސަތު އަލުން ހުޅުވާލައިފި

އަލީ ރާޒީ

17 ޑިސެމްބަރ 2024 - 20:52

0 comments

އެންޓި ކޮރަޕްޝަން ކޮމިޝަން (އޭސީސީ) ގެ ހުސްވެފައިވާ ދެ މަގާމަށް ކުރިމަތިލުމުގެ ފުރުސަތު ހުޅުވާލައި ފުރަތަމަ ކުރި އިއުލާނު ބާތިލުކޮށް، ރައީސް އޮފީހުން އަނެއްކާވެސް އެ މަގާމުތަކަށް ކުރިމަތިލުމަށް ހުޅުވާލައިފި އެވެ.

މިއާއެކު ރައީސްގެ އޮފީހުން އެންޓި-ކޮރަޕްޝަން ކޮމިޝަނުގެ މެންބަރުކަމުގެ މަގާމަށް ކުރިމަތިލެއްވުމުގެ ފުރުސަތު ހުޅުވާލައި 8 ޑިސެންބަރު 2024 ގައި ކޮށްފައިވާ ނަންބަރު 2024/97//1/ޕީ.އޭ.އޯ-1(އައި.ޔޫ.އެލް) އިއުލާނު ވަނީ ބާތިލުކުރައްވާފަ އެވެ.

‎އެންޓި-ކޮރަޕްޝަން ކޮމިޝަންގެ މެންބަރުކަމަށް އެދި ހުށަހެޅުމުގެ ފުރުސަތު ހުޅުވާލައްވާފައިވަނީ މިއަދުން ފެށިގެން 31 ޑިސެންބަރު 2024 ވާ ހޯމަ ދުވަހުގެ 12:00 ގެ ނިޔަލަށެވެ. އެންޓި-ކޮރަޕްޝަން ކޮމިޝަންގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، މިކަމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން 12:00 އަށް ރައީސްގެ އޮފީހުންނެވެ.

‎އެންޓި-ކޮރަޕްޝަން ކޮމިޝަންގެ މެންބަރުކަމުގެ މަގާމަށް ކުރިމަތިލުމަށް އެދޭ ފޯމު ރައީސްގެ އޮފީހުގެ ރިސެޕްޝަނުން ލިބެންހުންނާނެ އެވެ. އަދި ރައީސްގެ އޮފީހުގެ ވެބްސައިޓް https://presidency.gov.mv އިން ފޯމު ޑައުންލޯޑް ކުރެއްވޭނެ އެވެ.

އާ އިއުލާނުގެ ދަށުން އޭސީސީގެ މެންބަރުކަމަށް ކުރިމަތިލުމުގެ ފުރުސަތު ޑިސެމްބަރު 31، ގެ ރަސްމީ ގަޑީގެ ނިޔަލަށް ވަނީ ހުޅުވާލާފަ އެވެ. މެންބަރުކަމުގެ ޝަރުތުތަކާއި ހުށަހަޅަން ޖެހޭ ލިޔެކިޔުންތަކުގެ ތަފުސީލުތައް ގެޒެޓުކޮށްފައިވާ އިއުލާނުގައި ހިމަނާފައިވެ އެވެ.

އޭސީސީގެ ނައިބު ރައީސް ކަމާއި މެންބަރުކަމުގެ ޖާގައެއް ހުސްވެފައި މިވަނީ، އެ ކޮމިޝަނާއި އިލެކްޝަންސް ކޮމިޝަން (އީސީ) ގެ ރައީސް އާއި ނައިބު ރައީސް އައްޔަނު ކުރުމުގެ ބާރު ލިބޭ ގޮތަށް ސަރުކާރުން މަޖިލީހަށް ހުށަހަޅާ ގާނޫނު ބަދަލުކޮށްފައި ވަނިކޮށެވެ.

އާ ގާނޫނުގެ ދަށުން އޭސީސީގެ ހުސްވެފައިވާ ނައިބު ރައީސްގެ މަގާމަށް އައްޔަންކުރާނެ ބޭފުޅެއްގެ ނަން މަޖިލީހަށް ފޮނުއްވާނީ ރައީސް ޑރ. މުހައްމަދު މުއިއްޒު އެވެ. މެންބަރުކަމުގެ ދައުރު ހަމަވެ އީސީގެ ރައީސްކަން ވެސް މިހާރު ވަނީ ހުސްވެފަ އެވެ.