އޭސީސީން ބިންވެރިޔާ-ގެދޮރުވެރިޔާ ސްކީމްގެ އަވަސް ތަހުގީގެއް ފަށައިފި

އަހުމަދު ނިހާން

19 ޑިސެމްބަރ 2024 - 21:14

0 comments

ސަރުކާރުން ހިންގާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާކަމަށް ތުހުމަތުތައް ބެލުމަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލް އައްބާސް ޝަރީފު ކަމާ ގުޅުން ހުރި އިދާރާތަކުގެ މައްޗަށް އަމުރުކުރެއްވުމާއި ގުޅިގެން އަވަސް ތަހުގީގެއް ފަށާފައިވާ ކަމަށް އޭސީސީން މިރޭ ބުނެފި އެވެ.

އޭސީސީން ބުނީ ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަޙުޤީޤެއް ހިންގުމަށް ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަނުގެ މައްޗަށް ޕްރޮސިކިއުޓާ ޖެނެރަލް ކުރެއްވި އަމުރާ ގުޅިގެން، ފުލުހުންނާއެކު މަޝްވަރާކޮށް، އަވަސް ތަޙުޤީޤެއް ކުރަމުންދާ ކަމަށެވެ.

"ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަހުގީގެއް ހިންގުމަށް ދިވެހި ފުލުހުންގެ ހިދުމަތަށާއި އެންޓި ކޮރަޕްޝަން ކޮމިޝަނުގެ މައްޗަށް ޕްރޮސިކިއުޓާ ޖެނެރަލް ކުރެއްވި އަމުރާ ގުޅިގެން، ކޮމިޝަނުން މިދަނީ ދިވެހި ފުލުހުންގެ ހިދުމަތާއެކު މަޝްވަރާކޮށް، އަވަސް ތަހުގޭއްއް ކުރަމުންނެވެ." އެ ޕޯސްޓުގައި ބުނެފައިވެ އެވެ.

މި ތަހުގީގާ ގުޅިގެން މިއަދު ފުލުހުންނާއި އޭސީސީގެ އިސް ބޭފުޅުން ވަނީ ބައްދަލުވުމެއް ބާއްވާފަ އެވެ. ފުލުހުން އެކްސްގައި ކުރި ޕޯސްޓުގައި ބުނީ، އެ ތަހުގީގާ ގުޅިގެން އެ ދެ އިދާރާއިން ފުޅާ ދާއިރާއެއްގައި މަޝްވަރާކޮށްފައިވާ ކަމަށެވެ.

ގޯއްޗާއި ފްލެޓްތަކުގެ މައްސަލަތައް ތަހުގީގު ކުރުމަށް ޕީޖީ އަމުރުކޮށްފައި މިވަނީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އުސޫލާ ހިލާފަށް ލިޔެކިޔުން ފޯޖުކޮށްގެން ބަޔަކަށް ގޯތި ދިން ކަމުގެ ތުހުމަތުގައި ފުލުހުންނާއި އޭސީސީން ތަހުގީގު ފަށާފައި ވަނިކޮށެވެ. އެ މައްސަލައިގައި އެޗްޑީސީގެ ވެރިން ވަނީ ސަސްޕެންޑް ވެސް ކޮށްފަ އެވެ.