އައްޑޫ ހިތަދޫ މޫދަށް ކްލޮރިން އެޅުމުން ދިރުންތައް މަރުވެގެން ލައްގަނީ

އަލީ ރާޒީ

10 ޑިސެމްބަރ 2024 - 13:23

0 comments

އައްޑޫ ކިނބިވައު ސަރަހައްދަށް މަރުވެގެން ލައްގާފައި އޮތް މަހެއް.-- ފޮޓޯ: އައްޑޫ ނޭޗާ ޕާކް

އައްޑޫ ސިޓީގެ ހިތަދޫގެ ފުއްޓަރު ފަރާތު މޫދަށް ކްލޮރިން އެޅުމުން އެ ސަރަހައްދުގައި ދިރިއުޅޭ މަސްތައް މަރުވާން ފަށައިފި އެވެ.

އައްޑޫ ސިޓީގެ މޭޔަރު އަލީ ނިޒާރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ސަރަހައްދަށް ކްލޮރިން އަޅައިފައި ވުމުން މަހާއި ބޯވަ ފަދަ ދިރުންތައް މަރުވެގެން ލައްގަމުން އަންނަ ކަމަށެވެ.

"އަދި ފަރުން ވެސް އެބަ ފެނޭ އޭގެ އަަސަރު، ފަރު ހުދުވެ ވަރަށް ބޮޑަށް މި ސަރަހައްދުގެ ވެއްޓަށް އަނިޔާވެފައިވާކަން. ވަރަށް ދެރަކޮށް ހިނގާފައި ހުރި ކަމެއް، ކޮންމެ ބަޔަކު ކުރި ނަމަވެސް މިއީ ކޮށްގެން ވާނެ ކަމެއް ނޫން،" އޭނާ ވިދާޅުވިއެވެ.

ނިޒާރު ވިދާޅުވީ އެއީ ކޮން ބަޔަކު ގެންދިޔަ ކްލޮރިން ފާޓާތަކެއްކަން މިހާތަނަށް އެނގިފައިނުވާ ކަމަށެވެ. ނަމަވެސް އެހާ ބައިވަރު ކްލޮރިން އާންމު ފަރާތެއްގެ ބޭނުމަށް ގެނެސްފައިވާނެ ކަމަށް ގަބޫލުނުކުރެވޭ ކަމަށާއި އޭނާ ލަފާކުރައްވަނީ އެއީ ސަރުކާރުގެ މުއައްސަސާއެއްގެ ބޭނުމަށް ގެނެސްފައިވާ ކްލޮރިން ކަމަށެވެ.

އެ ސަރަހައްދަށް ގިނަ އަދަދަކަށް ކޮލޮރިން އަޅާފައިވާ ކަމަށް ބެލެވޭތީ އާންމުން މި ވަގުތު އެ ސަރަހައްދަށް މޫދަށް އެރި ނޫޅުމަށް ވެސް ސިޓީ ކައުންސިލުން ވަނީ އިލްތިމާސްކޮށްފަ އެވެ.

ފުލުހުންނާއި އީޕީއޭގެ ސަމާލުކަމަށް މިމައްސަލަ ގެނެސްފައިވާތީ އެ އިދާރާތަކުންވެސް މިހާރު ވަނީ މައްސަލަ ބަލަން ފަށާފަ އެވެ.