ސަރުކާރު ގެރެންޓީއާއެކު އެސްޓީއޯއިން 50 މިލިއަން ޑޮލަރުގެ ލޯނެއް ނަގައިފި

އަލީ ރާޒީ

14 ޑިސެމްބަރ 2024 - 10:20

0 comments

ސަރުކާރުން ސޮވެރިން ގެރެންޓީ ދީގެން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް 50 މިލިއަން އެމެރިކާ ޑޮލަރުގެ ލޯނެއް އެމެރިކާގެ ޕްރައިވެޓް ކްރެޑިޓަރެއްގެ އަތުން ނަގައިފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި ރިޔާސަތުގައި އިންނެވި ނައިބު މުގައްރިރު އަދި، މަޖިލީހުގެ އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވަނީ އެސްޓީއޯއިން ނަގާފައިވާ ލޯނަކާ ގުޅުވައި ފިނޭންސް މިނިސްޓްރީން ފޮނުވި ސިޓީއެއް މެންބަރުންނަށް އިއްވާފައެވެ.

އެ ސިޓީއާ ހަވަލާދެއްވައި ސަލީމް ވިދާޅުވީ، އެސްޓީއޯއިން ލޯނު ނަގާފައި އޮތީ ކާޑާ ބޭހުގެ އިތުރުން ޒަރޫރީ ތަކެތި އެތެރެކުރުމަށް ކަމަށެވެ.

ނަމަވެސް، އެ ހިސާބަށް ސަލީމަށް ވިދާޅުވެވުނު ތަނާހެން، މައިކުގެ އަޑު ކަނޑާލުމުން ލޯނުގެ އިތުރު ތަފްސީލެއް ކޮމިޓީގެ ލައިވަށް އަރާފައެއް ނުވެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީއާ ފިނޭންސް މިނިސްޓްރީން ހިއްސާކޮށްފައިވާ މައުލޫމާތުތަކުން އެނގޭ ގޮތުގައި މި ލޯނު ނަގަން ސޮއިކުރީ ނޮވެމްބަރު 8, ގަ އެވެ. ގާތްގަނޑަކަށް 770 މިލިއަން ރުފިޔާގެ މި ލޯނަށް ސަރުކާރުން ގެރެންޓީ ދޫކުރީ ނޮވެމްބަރު 20, ގަ އެވެ.

އެސްޓީއޯއިން ނެގި ލޯނުގެ އިންޓްރެސްޓް ރޭޓަކީ 13.13 ޕަސެންޓު ކަމަށްވާއިރު ލޯނުގެ މެޗޫރިޓީއަކީ ތިން އަހަރެވެ. ދެ އަހަރާއި ބައި ފާއިތުވުމުން 25 މިލިއަން ޑޮލަރު ދައްކަން ޖެހޭއިރު ބާކީ ދައްކަން ޖެހެނީ ތިންވަނަ އަހަރު އެވެ.