ގޯއްޗާއި ފްލެޓާ ގުޅޭ ޖިނާއީ ތަހުގީގެއް ހިންގަން ޕީޖީ އަމުރުކޮށްފި

އަލީ ރާޒީ

19 ޑިސެމްބަރ 2024 - 13:03

0 comments

ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަހުގީގެއް ހިންގުމަށް ޕްރޮސިކިއުޓާ ޖެނެރަލް އައްބާސް ޝަރީފު ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ)އަށް އަމުރުކުރައްވައިފި އެވެ،

ގާނޫނުއަސާސީން ޕީޖީއަށް ލިބިދޭ ބާރުގެ ދަށުން ޖިނާއީ ތަހުގީގު ހިންގުމަށް އަމުރު ކުރެއްވީ ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ)ގެ މައްޗަށެވެ.

އައްބާސް އަމުރު ކުރައްވާފައި ވަނީ:

ފޯމު ބަލައިގަތުމާއި ފްލެޓާއި ގޯތި ލިބޭ ފަރާތްތައް ކަނޑައެޅުމާއ ގޯއްޗާއި ފްލެޓް ދޫކުރުމުގައި އަމަލުކޮށްފައިވާ ގޮތުގެ ތަހުގީގެއް ހިންގުމަށް
މި ކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ނަމަ، އެކަން ތަހުގީގު ކުރުމަށް ފަހު ދައުވާ ކުރުމަށް ޕީޖީ އޮފީހަށް ހުށަހެޅުމަށް
ތަހުގީގު ހިނގަމުންދާ ގޮތް، ކޮންމެ ހަފުތާއަކު އެއް ފަހަރު ޕީޖީއަށް ހިއްސާކުރަމުން ގެންދިއުމަށާއި އަވަސް ތަހުގީގެއް ހިންގުމަށް

ޕީޖީ އެ އަމުރުކުރެއްވީ، ބިންވެރިޔާ ސްކީމުން ގޯތި ހައްގު ނޫން ބަޔަކަށް ގޯތި ދީފައިވާ ކަމަށް ތުހުމަތުވާ މައްސަލައެއް ފެންމަތިވި ފަހުންނެވެ. އެގޮތުން ލިސްޓުގައި ޝަރުތު ހަމަނުވާ ކަމަށް އޮތް ނަމަވެސް، އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދަށް ގޯއްޗެއް ދީފައިވާ އާންމުވެފައިވާ ލިޔެކިޔުންތަކަކުން ދައްކައެވެ.

އެ މައްސަލައިގެ ޖިނާއީ ތަހުގީގެއް ފަށައިފައިވާ ކަމަށް އިއްޔެ ފުލުހުން ބުނެފައިވެއެވެ.

އެ ތަހުގީގަށް އެހީތެރިވުމުގެ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން ވަނީ ފަޒުލް ސަސްޕެންޑުކޮށްފަ އެވެ. އަދި އެޗްޑީސީގެ ޗެއާމަން އަހުމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ވެސް ވަނީ ސަސްޕެންޑުކޮށްފައެވެ.

މީގެ އިތުރުން އެމްޑަބްލިޔުއެސްސީގެ ބޯޑުން ވެސް ވަނީ ތަހުގީގަށް އެހީތެރިވުމުގެ ގޮތުން ފަޒީލް ސަސްޕެންޑުކޮށްފައިވާކަން ހާމަކޮށްފައެވެ.

ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.

ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ. އޭގެ ތެރެއިން ފުރަތަމަ 4،000 ފުލެޓް ލިބޭ މީހުންގެ ލިސްޓެއް އެމްޑީޕީ ސަރުކާރުގައި ނެރުނު ނަމަވެސް، އެ ލިސްޓުން މައްސަލަތަކެއް ފާހަގަވެ، އޭސީސީން މައްސަލަ ބަލާތީ ފުލެޓު ދިނުން ލަސްވިއެވެ.

އެ މައްސަލަތަކާ ގުޅޭ ގޮތުން ގޮތް ނިންމަން ހައުސިން މިނިސްޓްރީއާ ހަވާލުކުރުމުން، ފުލެޓު ލިސްޓު މުރާޖާ ކުރަން ކޮމިޓީއެއް އެކުލަވައިލީއެވެ. އެ ކޮމިޓީން ބަލައި، ލިސްޓު އާންމުކުރަން އެންމެ ފަހުން ދިން ތާރީޚަކީ މިދިޔަ މަހުގެ 16 ކަމަށްވާއިރު، އެ ތާރީޚަށް ވެސް މަސައްކަތްތައް ނުނިމި މިހާރު ފުލެޓު ލިބޭ ފަރާތްތައް ކަށަވަރު ވާނެ ދުވަހެއް އޮތީ ނޭނގިފައެވެ.

ގޯއްޗާއި ފްލުޓު ދިނުން ލަސްވާތީ ނުރުހުން ފާޅުކޮށް، މާލޭގައި މީގެ ކުރިން މުޒާހަރާތައް ވެސް ބާއްވާފައިވެއެވެ.