އީ ފާހުން މަދެވޭ ގޮތަށް އެމްޑަބްލިޔުއެސްސީގެ ހިދުމަތްތައް އޮންލައިންކޮށްފި

ހުމާ ނަސީމް

30 ޑިސެމްބަރ 2024 - 13:41

0 comments

މާލޭ ވޯޓާރ އެންޑް ސްވަރޭޖު ކޮމްޕެނީ، އެމްޑަބްލިޔުއެސްސީގެ ޚިދުމަތްތައް އޮންލައިންކޮށް ފޯރުކޮށްދޭނެ ޚާއްޞަ ޕޯޓަލެއް ތަޢާރަފްކޮށްފިއެވެ.

އެމްޑަބްލިޔުއެސްސީގެ އެކި ޚިދުމަތަށް އެދި ހުށައެޅުމާއި، އެޕްލިކޭޝަންތައް ކުރިޔަށްދާ މަރުޙަލާތައް ފަސޭހަކަމާއެކު ބަލާލުންފަދަ ޚިދުމަތްތައް މި ޕޯޓަލުން ލިބޭނެކަމަށް އެކުންފުނިން ބުންޏެވެ.

ފެން ކުންފުނީގެ އެކި ހިދުމަތަށް އެދި ހުށައެޅުމާއި، އެޕްލިކޭޝަންތައް ކުރިޔަށްދާ މަރުޙަލާތައް ފަސޭހަކަމާއެކު ބަލާލުން ފަދަ ހިދުމަތްތައް "އެމްޑަބްލިއުއެސްސީ އީ-ޕޯޓަލް" އިން ލިބޭނެ އެވެ.

އެމްޑަބްލިޔުއެސްސީގެ ޕޯޓަލްގެ ހިދުމަތް ލިބޭނީ އީ-ފާސް ނިޒާމު މެދުވެރިކޮށެވެ.

އޮންލައިން ޕޯޓަލް މެދުވެރިކޮށް، ކަސްޓަމަރުން ހުޅުވާފައިވާ ހުރިހާ އެކައުންޓެއްގެ މަޢުލޫމާތު ބެލޭނެކަމަށާއި، އެއް އެކައުންޓެއް މެދުވެރިކޮށް އެއް ބިލަށްވުރެ ގިނަ ބިލުތަކަށް އެއްފަހަރާ ފައިސާ ދެއްކުމުގެ މަގުފަހިވާނެ އެވެ. މީގެ އިތުރުން ސްމާޓް މީޓަރު ހަރުކޮށްފައިވާ ގޭބިސީތަކުގެ ކަސްޓަމަރުންނަށް ވަކިވަކި މީޓަރުތަކުން ފެން ބޭނުން ކުރެވިފައިވާ މިންވަރުގެ ތަފުސީލާއި، ފެން މީޓަރުގެ ރީޑިންގެ އިތުރުން ފެން ބިލުތަކުގެ ތަފުސީލުތައް ވެސް ބެލޭނެ އެވެ.

އެ ޕޯޓަލް އިފުތިތާހުކޮށް ދެއްވީ އެކަމަށްޓަކައި މިއަދު ބޭއްވި ރަސްމިއްޔާތުގައި އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދާއި ޗެއާޕާސަން ޝަމްހޫޒާ އަހުމަދެވެ.

އޮންލައިން ޕޯޓަލް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އެމްޑަބްލިޔުއެސްސީގެ މެނޭޖިން ޑިރެކްޓަރ އަބްދުލް މަތީން މުހައްމަދު ވިދާޅުވީ އެކުންފުނިން މަސައްކަތްކުރަމުންދަނީ ޢާންމު ރައްޔިތުންނަށް ފޯރުކޮށްދެވޭ ހިދުމަތްތަކުގެ ފެންވަރު ރަނގަޅުކޮށް، ވީހާވެސް އަވަހަށް ހިދުމަތްތައް ދިނުމަށްކަމަށެވެ. އެހެންކަމުން އަލަށް ތަޢާރަފްކުރި ޕޯޓަލަކީ ހިދުމަތްތައް އަވަސްކުރުމުގެ ގޮތުން ފަރުމާކޮށްފައިވާ ޕޯޓަލެއްކަމަށް މަތީން ވިދާޅުވި އެވެ.

"މި އަހަރުގެ ތެރޭގައި 23،000 ކަސްޓަމަރުން އެބަވޭ ކައުންޓަރުން ހިދުމަތް ހޯދާފައި. 80،000 ކަސްޓަމަރުން ގުޅާފައެބަވޭ. ނަމަވެސް މި ކޯލުތަކާއި މިގޮތަށް ދެވޭ ހިދުމަތްތައް ޕޯޓަލްގެ ތެރެއިން ވަރަށް ބޮޑަށް މަދުކުރެވޭނެ." މަތީން ވިދާޅުވި އެވެ.